Juni 1, 2023, majengo mengi ya Betheli ulimwenguni pote yalifungua milango ili watu wayatembelee. Hiyo ilikuwa baada ya miaka mitatu ya kusitishwa kwa matembezi kutokana na janga la COVID-19. Ilikuwa siku ya pekee kwa familia ya ulimwenguni pote ya Betheli na kwa ajili ya maelfu waliokuja kutembea.

Wageni walipowasili, Wanabetheli waliwakaribisha kwa mabango, nyimbo, tabasamu, na kuwakumbatia kwa uchangamfu. Ellis Bott, ambaye wakati wa janga alianza kutumika kwenye makao makuu ya ulimwenguni pote huko Warwick, New York, anasema hivi: “Ilipendeza sana kuwaona Wanabetheli wakipanga mstari nje ya mapokezi wakiwa na mabango ya kuwakaribisha wageni. Machozi ya shangwe niliyoona yalinikumbusha jinsi Betheli ilivyo ya pekee sana.” Alexis Alexander, mwanabetheli wa muda anayeishi nje, alifurahi kupata nafasi ya kuwakaribisha na kuwapokea wale waliokuwa wakiwasili kwa ajili ya matembezi. Alisema hivi: “Lilikuwa jambo la pekee kujionea jinsi akina ndugu wanavyompenda Yehova na nyumba Yake.”

Mi-yeon Jo alisisimka hatimaye kumleta Yoon, mwana wake mwenye umri wa miaka minane, kutembelea ofisi ya tawi ya Korea Kusini. Yoon alisisimka sana kutembelea Betheli hivi kwamba alishindwa kulala usiku ulitangulia. Mi-yeon alisema hivi: “Mara tu tulipoamka, tulisikiliza wimbo kuhusu Caleb na Sofia kutembelea Betheli. Na hata tuliucheza wimbo huo ndani ya gari tulipokuwa njiani kwenda kwenye ofisi ya tawi.” Yoon alifurahia sana matembezi hayo hivi kwamba alisema: “Kinachokosekana Betheli ni wanyama tu. Ikiwa wangekuwepo ingekuwa paradiso kamili.”

Noah Johnsen, kijana kutoka Alberta, Kanada, ambaye ana ugonjwa wa kudhoofika kwa misuli ya uti wa mgongo, sikuzote alitamani kutembelea majengo ya Betheli ya New York, Marekani. Kwa kuwa hali yake inamzuia kusafiri kwa ndege, wazazi wake walisafiri naye kwa gari umbali wa kilomita 4,100 ili kutembelea ofisi ya tawi ya Marekani iliyoko Wallkill, New York. Baada ya matembezi hayo Noah alisema hivi: “Ninaweza tu kutumia neno moja kufafanua mambo yote niliyojionea—upendo. Nilihisi upendo wa Yehova na upendo wa akina ndugu.”

Fyodor Zhitnikov mwenye umri wa miaka 76, na mke wake, Yulita, walifurahi sana kutembelea maonyesho ya vitu vya kale katika Betheli ya Kazakhstan. Sehemu moja ya maonyesho hayo ya vitu vya kale inaonyesha baadhi ya ndugu na dada ambao wamedumisha uaminifu kwa makumi ya miaka. Sehemu hiyo ya maonyesho ilikuwa ya pekee sana kwa Fyodor kwa kuwa alitumikia pamoja na wengi kati ya ndugu hao. Fyodor alishukuru sana kwa umakini mwingi uliohusika katika kutayarisha maonyesho hayo. Alisema hivi: “Ikiwa rekodi za huduma yetu na matendo yetu zilihifadhiwa na akina ndugu kwa miaka yote hii, basi bila shaka Yehova anakumbuka hata zaidi kila kitu na anathamini sana kazi ya kila mmoja wetu.”

Tunashangilia kwamba kwa mara nyingine tunaweza kuwakaribisha wageni katika majengo ya Betheli ulimwenguni pote. Tunatazamia kuwakaribisha maelfu ya wengine katika siku zijazo!—Zaburi 122:1.

Hapa chini kuna mkusanyo wa picha za ndugu na dada zetu wakitembelea majengo mbalimbali ya Betheli na maonyesho.