Juni 9, 2024, Ndugu Jeffrey Winder, mshiriki wa Baraza Linaloongoza, alitangaza kutolewa kwa vitabu vya Mathayo na Marko katika Kikrioli cha Guadeloupe kwenye hotuba ya mwisho ya Kusanyiko la Pekee la mwaka wa 2024 lenye kichwa “Tangaza Habari Njema!” lililofanyika Baie-Mahault, Guadeloupe. Jumla ya watu 8,602, walihudhuria kusanyiko hilo. Watu wengine 5,588, waliunganishwa kwenye programu hiyo kupitia video mtandaoni. Wale waliohudhuria kusanyiko hilo walipata nakala zilizochapishwa za Biblia—Habari Njema Kulingana na Mathayo. Vitabu vyote vilikuwa tayari kwa ajili ya kupakuliwa kwenye jw.org na JW Library.

Zaidi ya watu 300,000 kutoka Guadeloupe na 200,000 kutoka Ufaransa wanazungumza Kikrioli cha Guadeloupe. Leo, ndugu na dada 3,300 hivi wanaozungumza lugha hiyo wanatumikia katika makutaniko 42 yaliyoko Guadeloupe na wengine 80 wanatumikia katika vikundi 2 nchini Ufaransa.

Juni 28, 2024, Ndugu Geoffrey Jackson, mshiriki wa Baraza Linaloongoza, alitangaza kutolewa kwa toleo lililorekebishwa la Biblia Takatifu—Tafsiri ya Ulimwengu Mpya katika Kiarmenia. a Tangazo la kutolewa kwa Biblia hiyo lilitolewa katika siku ya kwanza ya Kusanyiko la Eneo la 2024 lenye kichwa “Tangaza Habari Njema!” Kusanyiko hilo la Eneo lilifanyika karibu na Yerevan, nchini Armenia. Jumla ya watu, 6,155 walihudhuria. Toleo lililorekebishwa la Tafsiri ya Ulimwengu Mpya katika Kiarmenia lilipatikana ili liweze kupakuliwa kwenye jw.org na JW Library. Nakala zilizochapishwa zitapatikana baadaye katika mwaka huu wa 2024.

Biblia ya kwanza katika Kiarmenia ilichapishwa katika karne ya tano W.K. Toleo lililokamilika la Tafsiri ya Ulimwengu Mpya katika Kiarmenia lilitolewa kwa mara ya kwanza katika mwaka wa 2010. Kufikia sasa watu milioni tatu hivi wanaozungumza Kiarmenia wanaishi nchini Armenia, kutia ndani ndugu na dada zetu 10,550 wanaotumikia katika makutaniko 117. Kwa kuongezea ndugu na dada 5,200 wanatumikia katika makutaniko na vikundi vya lugha ya Kiarmenia kote barani Ulaya na Marekani.

Juni 28, 2024, Ndugu Freeman Abbey, mshiriki wa Halmashauri ya Tawi ya Ghana, alitangaza kutolewa kwa kitabu cha Biblia cha Mathayo katika lugha ya Kifante wakati wa Kusanyiko la Eneo la 2024 lenye kichwa “Tangaza Habari Njema!” lililofanyika katika Jumba la Kusanyiko la Takoradi lililoko Sekondi-Takoradi, nchini Ghana. Jumla ya ndugu na dada 1,230 walihudhuria programu hiyo uso kwa uso. Kwa kuongezea ndugu na dada 2,022 waliunganishwa kwenye programu hiyo kupitia video mtandaoni. Wale waliohudhuria programu hiyo uso kwa uso walipokea nakala zilizochapishwa za Biblia—Habari Njema Kulingana na Mathayo. Pia, Biblia hiyo iliweza kupakuliwa mara moja kwenye jw.org na JW Library.

Inakadiriwa kwamba watu milioni sita hivi wanazungumza Kifante. Kutaniko la kwanza la lugha ya Kifante lilianzishwa Septemba 1935, katika mji ambao sasa unajulikana kama Sekondi-Takoradi, nchini Ghana. Leo kuna ndugu na dada 9,700 hivi wanaozungumza Kifante wanaotumikia katika makutaniko 158 kote nchini Ghana.

Juni 28, 2024, Ndugu David Splane, mshiriki wa Baraza Linaloongoza, alitangaza kutolewa kwa toleo kamili la Biblia Takatifu—Tafsiri ya Ulimwengu Mpya katika Kiiceland wakati wa Kusanyiko la Pekee la 2024 lenye Kichwa “Tangaza Habari Njema!” lililofanyika Reykjavík, Iceland. Wale waliohudhuria walipokea nakala zilizochapishwa za Tafsiri ya Ulimwengu Mpya. Muda mfupi baada ya tangazo, Biblia hiyo ilipatikana ili iweze kupakuliwa kupitia mfumo wa kielektroni kwenye jw.org na JW Library.

Mwaka wa 2019, ndugu na dada zetu walipokea Tafsiri ya Ulimwengu Mpya ya Maandiko ya Kigiriki ya Kikristo katika Kiiceland. Ndugu na dada 395 wanaozungumza Kiiceland, wanaotumikia katika makutaniko matano wanafurahi sana kuwa na toleo kamili la Tafsiri ya Ulimwengu Mpya na kulitumia katika huduma kwenye kisiwa hicho kilicho na wakaaji 390,000.

Juni 28, 2024, Ndugu Johannes De Jager, mshiriki wa Halmashauri ya Tawi ya Angola, alitangaza kutolewa kwa vitabu vya Biblia vya Mathayo, Luka, na Matendo katika Kingangela. Tangazo hilo lilitolewa mbele ya wahudhuriaji 450 kwenye Kusanyiko la Eneo la 2024, lenye kichwa “Tangaza Habari Njema!” lililofanyika Menongue, nchini Angola. Wale waliohudhuria walipokea nakala zilizochapishwa za Biblia—Habari Njema Kulingana na Mathayo. Vitabu vyote vitatu vilipatikana mara moja kwenye jw.org na JW Library.

Inakadiriwa kwamba watu milioni moja wanaozungumza Kingangela wanaishi nchini Angola. Kutaniko la kwanza la lugha ya Kingangela lilianzishwa mwaka wa 2011. Kufikia sasa, ndugu na dada 260 wanatumikia katika makutaniko na vikundi vinane vya lugha ya Kingangela nchini Angola na Namibia.

Juni 30, 2024, Ndugu Carlos Martinez, mshiriki wa Halmashauri ya Tawi ya Amerika ya Kati, alitangaza kutolewa kwa Biblia—Habari Njema Kulingana na Mathayo katika Kingabere wakati wa programu iliyorekodiwa mapema na kuonyeshwa kwenye Majumba ya Ufalme nchini Kosta Rika na Panama. Ndugu na dada 2,032 waliohudhuria programu hiyo, walipokea nakala zilizochapishwa mara baada ya tangazo hilo kutolewa. Muda mfupi baada ya hapo, toleo la kielektroni lilipatikana ili liweze kupakuliwa kwenye jw.org na JW Library.

Leo inakadiriwa kwamba watu 216,000 wanaozungumza Kingabere wanaishi nchini Kosta Rika na Panama. Ndugu na dada zetu 877 wanatumikia katika makutaniko 26 na vikundi 2 katika nchi hizo.