Septemba 1 hadi 3, 2023, ndugu na dada wanaozungumza Kiromani (cha Rumania) walikusanyika kufurahia Kusanyiko la Eneo la “Iweni na Subira”! la 2023. Ingawa tayari makusanyiko mengine yamefanywa katika lugha nyingine za Kiromani, hili ndilo lililokuwa kusanyiko la kwanza la eneo kufanywa katika Kiromani (cha Rumania). Jumla ya watu 1,353 kutoka Austria, Italia, Moldova, Rumania, Ubelgiji, Ufaransa, Uingereza, na Ujerumani walihudhuria programu hiyo iliyofanyiwa kwenye Jumba la Kusanyiko la Turda, Rumania. Watu 26 walibatizwa.

Ndugu Gage Fleegle, mshiriki wa Baraza Linaloongoza, alitoa hotuba ya mwisho ya kila siku ya kusanyiko. Ndugu Fleegle alikazia umoja wa pekee ambao ni watu wa Mungu pekee wanafurahia leo na akawatia moyo waliohudhuria waendelee kumtumikia Yehova kwa subira na kwa umoja. Mbali na wale waliohudhuria kusanyiko hilo la eneo la Kiromani (cha Rumania), watu 900 hivi walihudhuria makusanyiko mengine ya eneo yaliyofanywa katika Kirumania na Lugha ya Ishara ya Rumania na waliunganishwa kwa ajili ya hotuba ya mwisho ya kila siku kupitia mtandao.

Ndugu mmoja anayezungumza Kiromani (cha Rumania) alisema hivi: “Hili ni tukio ambalo hatutawahi kusahau! Ni baraka yenye kustaajabisha kutoka kwa Yehova kuwa na kusanyiko la eneo katika lugha yetu!” Iraklis Exarcheas, mwangalizi wa mzunguko wa Kiromani (cha Rumania) alisema hivi: “Nina uhakika kwamba kusanyiko hili liligusa akili na mioyo ya watu wengine waliohudhuria wanaozungumza Kiromani (cha Rumania). Programu hiyo ilitusaidia kuelewa kabisa kwamba Mungu anawajali sana watu wote. Ni zawadi ya pekee kutoka kwa Yehova!”

Tunashangilia pamoja na ndugu na dada zetu wanaozungumza Kiromani (cha Rumania) waliokusanyika pamoja ili kumsifu Yehova na kufundishwa naye katika kusanyiko hilo la eneo.​—Zaburi 26:12.