NOVEMBA 17, 2023 | HABARI ZIMEONGEZWA: DESEMBA 8, 2023
INDIA
HABARI ZA KARIBUNI—Idadi ya Waliokufa Kutokana na Mlipuko Nchini India Yaongezeka Kufikia Nane
Jumamosi, Desemba 2, 2023, ndugu mwenye umri wa miaka 76, aliyekuwa akitumikia akiwa mzee na painia wa kawaida, alikufa kutokana na majeraha aliyopata wakati wa milipuko iliyotokea huko Kerala, India. Kwa kusikitisha, siku tano baadaye, Alhamisi, Desemba 7, mke wake mpendwa, ambaye pia alikuwa painia wa kawaida alikufa kutokana na majeraha aliyopata wakati wa mlipuko huo. Kwa ujumla, sasa ndugu na dada zetu wanane wamekufa kutokana na tukio hilo la kikatili.
Jumapili, Oktoba 29, 2023, milipuko kadhaa ilitokea katika kusanyiko la eneo lililofanyiwa Kerala, India. Kwa kusikitisha, mbali na watu watatu ambao tayari waliripotiwa kuwa walikufa, ndugu mmoja mwingine na dada wawili wamekufa pia. Miongoni mwao ni mama na ndugu ya msichana mwenye umri wa miaka 12 ambaye alikufa mapema. Mbali na hilo, ndugu na dada wengine 11 bado wako hospitalini.
Ili kuandaa faraja na kitia-moyo kilichohitajika sana kwa ajili ya walioathiriwa na shambulizi hilo, ofisi ya tawi ya India ilipata kibali cha kupanga mkutano wa pekee, uliofanywa Novemba 4, 2023. Ndugu na dada wa makutaniko 21 yaliyokuwa kwenye kusanyiko la eneo ambako milipuko ilitokea walialikwa kwenye mkutano huo. Programu hiyo ilifanyiwa kwenye Jumba la Ufalme la eneo hilo, ambako watu 200 hivi walihudhuria. Wengine 1,300 waliunganishwa kwenye programu hiyo kupitia mtandao, na programu hiyo ilirekodiwa kwa ajili ya wale ambao bado wako hospitalini. Mzee mmoja kutoka kwenye ofisi ya tawi alizungumzia Zaburi 23:1 na kukazia jinsi Yehova anavyomjali kila mmoja wa watumishi wake: “Katika mstari huu, mtunga-zaburi hasemi kwamba Yehova ni mchungaji fulani tu au hata hasemi ni mchungaji bora. Mtunga-zaburi anamrejelea Yehova kuwa ‘mchungaji wangu.’ Inafariji kwelikweli kujua kwamba Yehova anapendezwa kibinafsi na kila mmoja wetu!”
Akina dada wakifarijiana kwa hisia
Ndugu mmoja aliyekuwepo milipuko hiyo ilipotokea alisema kwamba tangu wakati huo amepata matatizo ya kulala. Hata hivyo, bado alijitolea kuwasaidia wale ambao bado wako hospitalini. Alisema hivi: “Kujionea imani yao na mtazamo wao mzuri kulinisaidia kusahau wasiwasi wangu. Licha ya majeraha na maumivu yao, wengi wao walikuwa wakiimba nyimbo za Ufalme.” Ndugu mwingine alisema hivi: “Huenda ikachukua muda mrefu kwa baadhi ya ndugu na dada zetu wapendwa waliolazwa kurudia utendaji wao wa kawaida. Hata hivyo, ninajua kwamba undugu wetu utaendelea kuwaonyesha upendo mwingi. Nina uhakika kwamba Mungu wetu anayetupenda amewashika kila mmoja wao kwa mkono wake wenye nguvu. Inatia moyo sana.”
Tukiwa familia ya ulimwenguni pote yenye umoja, tuna uhakika na tunafarijika kujua kwamba Yehova anaendelea ‘kuwaponya waliovunjika moyo na kuyafunga majeraha’ ya ndugu na dada zetu wapendwa nchini India.—Zaburi 147:3.