Artur, saurang pangawas wilayah di Armenia, ngadatangan hiji sidang jamaah Saksi-Saksi Yéhuwa. Sidang éta can pernah majang bacaan Alkitab dina rak roda di tempat umum. Pikeun ngajurung sidang ngalakukeunana, Artur jeung Anna pamajikanana, sarta saurang Saksi nu ngaranna Jirayr, masang rak roda di hiji kota leutik. Maranéhna milih tempat nu sok diliwatan ku loba jalma.

 Jalma-jalma nu liwat téh némbongkeun minat jeung nyarokot bacaan. Tapi, éta ogé langsung diperhatikeun ku jalma-jalma nu teu resepeun. Dua pendéta nyampeurkeun maranéhna, salah sahijina ujug-ujug najong éta rak. Tuluy, éta pendéta nyabok Artur nepi ka kaca panon Artur murag ka jalan. Artur, Anna, jeung Jirayr nyoba nenangkeun para pendéta éta, tapi taya hasilna. Para pendéta éta nincak-nincak rak nepi ka bacaan-bacaan pabalatak. Sanggeus nyumpahan jeung ngancam para Saksi, maranéhna indit.

 Artur, Anna, jeung Jirayr ngalapor ka kantor pulisi. Maranéhna ngajelaskeun kajadianana sarta nyaritakeun saeutik ngeunaan Alkitab ka para pulisi jeung pagawé di ditu. Terus, maranéhna dibawa ka kantor saurang pulisi nu leuwih sénior. Mimitina, éta pulisi ngan hayang nyaho kumaha kajadianana. Tapi, waktu sadar yén Artur nu awakna gedé teu ngabales sanajan dicabok, pulisi éta henteu tatanya deui ngeunaan kajadianana. Manéhna malah nanyakeun kapercayaan Saksi-Saksi Yéhuwa. Tungtungna, maranéhna ngobrol nepi ka opat jam! Pulisi éta tajub pisan kana kapercayaan Saksi, nepi ka ngomong, ”Mani alus agama téh! Cik ah, urang hayang nyaho!”

 Isukanana, Artur tetep majang bacaan Alkitab dina rak roda. Terus, saurang bapa nu merhatikeun kajadian kamari ujug-ujug nyampeurkeun. Bapa-bapa éta muji Artur lantaran tetep kalem jeung teu kapancing pikeun ngabales para pendéta éta. Manéhna ogé ngaku yén manéhna jadi rada ngéwa ka para pendéta éta.

 Peuting éta, pulisi nu sénior téa ménta Artur datang deui ka kantor pulisi. Tapi lainna ngabahas kasus kamari, manéhna kalah ka tatanya deui ngeunaan Alkitab. Dua pulisi séjén gé milu ngadéngékeun.

 Isukanana, Artur datang deui ka kantor pulisi pikeun nyetélkeun vidéo-vidéo nu dumasar Alkitab. Si pulisi sénior ngajak pulisi-pulisi séjén pikeun nongton babarengan.

 Ku lantaran sikep goréng para pendéta, loba pulisi jadi dibéré kasaksian. Maranéhna gé jadi boga pandangan nu alus ka Saksi-Saksi Yéhuwa.