1. Naon kahayang Yéhuwa kiwari?

 KIWARI, Yéhuwa téh hayang warta hadé ngeunaan Pamaréntahan Allah diuarkeun ka sakuliah dunya. (Mar. 13:10; 1 Tim. 2:3, 4) Ieu téh pagawéan Yéhuwa. Keur Yéhuwa, ieu téh penting pisan. Ku kituna, Anjeunna milih Putra-Na pikeun mingpin pagawéan ieu. Lantaran Isa nu jadi pangawasna, urang bisa yakin, saacan ahir dunya datang, pagawéan ieu téh pasti bérés, luyu jeung naon nu dipiharep ku Yéhuwa.​—Mat. 24:14.

2. Naon nu bakal dibahas dina artikel ieu?

² Dina artikel ieu, urang bakal ningali kumaha Isa ngagunakeun palayan nu satia jeung bijaksana pikeun nyadiakeun kadaharan rohani sarta ngatur kagiatan pangwawaran nu panggedéna sapanjang sajarah. (Mat. 24:45) Urang gé bakal ningali naon nu bisa dilakukeun ku urang pikeun ngadukung Isa jeung palayan nu satia.

3. Isa dibéré kakawasaan pikeun naon?

³ Isa téh pangawas tina kagiatan pangwawaran. Ti mana urang nyaho? Saacan Isa ka sorga, manéhna téh panggih jeung murid-muridna di hiji gunung di Galiléa. Kieu ceuk manéhna, ”Kabéh kakawasaan di sorga jeung di bumi geus dipasrahkeun ka urang.” Perhatikeun kekecapan sanggeusna, ”Ku sabab éta, datangan jalma-jalma ti sagala bangsa jaradikeun murid.” (Mat. 28:18, 19) Jadi, Isa téh geus dibéré kakawasaan pikeun mingpin kagiatan pangwawaran.

4. Ku naon urang bisa yakin yén Isa téh masih ngawaskeun kagiatan pangwawaran?

 ⁴ Isa nyebutkeun yén ngawawar sarta ngajadikeun murid téh bakal dilakukeun di ”sagala bangsa”. Salian ti éta, Isa gé ngomong yén manéhna bakal nyarengan murid-muridna ”nepi ka panungtungan jaman ieu”. (Mat. 28:20) Kekecapan éta nunjukkeun yén Isa téh bakal terus ngawaskeun kagiatan pangwawaran nepi ka ayeuna.

5. Sadérék boga andil naon dina ngawujudkeun Jabur 110:3?

⁵ Isa teu sieun bakal kakurangan jalma pikeun ngawawar dina ahir jaman. Manéhna yakin kekecapan dina Jabur téh bakal ngawujud. Di ditu disebutkeun, ”Dina dintenan Gusti merangan musuh, rahayat baris maju sukarela.” (Jab. 110:3) Jadi lamun Sadérék getol ngawawar, éta hartina Sadérék téh ngadukung Isa sarta palayan nu satia jeung bijaksana. Sadérék gé boga andil dina ngawujudkeun nubuat ieu. Mémang pagawéan ieu téh keur dijalankeun, tapi aya tangtanganana.

6. Tangtangan naon nu disanghareupan ku para pawarta ayeuna?

⁶ Salah sahiji tangtangan nu disanghareupan ku para pawarta téh nyaéta jalma-jalma nu nentang. Misalna, jalma-jalma murtad, para pamingpin agama, jeung pulitikus nyebarkeun loba kabohongan ngeunaan pangwawaran urang. Bisa waé kulawarga, babaturan, jeung batur gawé urang kapangaruhan ku kabohongan ieu. Mun kitu, maranéhna bisa jadi maksa urang pikeun eureun ngawula Yéhuwa jeung eureun ngawawar. Malah, di sababaraha nagri mah dulur-dulur urang téh diancam, diserang, ditéwak, jeung dijebloskeun ka panjara. Urang teu kudu héran kana hal ieu. Isa geus nganubuatkeun, ”Maranéh gé bakal dipikangéwa ku kabéh bangsa lantaran nuturkeun urang.” (Mat. 24:9) Justru lamun urang ditentang, éta bukti yén urang téh dipikaresep ku Yéhuwa. (Mat. 5:11, 12) Nu ngatur kabéh tangtangan ieu téh Sétan. Tapi, Isa jauh leuwih kuat tibatan Sétan. Ku bantuan Isa, warta hadé bisa diuarkeun ka sagala bangsa. Hayu urang tingali bukti-buktina.

7. Naon buktina nubuat dina Wahyu 14:6, 7 keur ngawujud?

⁷ Tangtangan séjénna nyaéta rupa-rupa basa nu digunakeun ku jalma-jalma. Waktu méré titingalian ka Rasul Yahya, Isa méré nyaho yén warta hadé bakal diuarkeun dina rupa-rupa basa. (Baca Wahyu 14:6, 7.) Kumaha carana? Urang hayang kabéh jalma boga kasempetan pikeun ngadéngé warta hadé. Ayeuna, bahan bacaan Alkitab dina situs jw.org geus aya dina 1.000 basa leuwih. Terus, buku Hirup Bagja Salilana!, buku utama pikeun ngajadikeun murid, geus disatujuan pikeun ditarjamahkeun ka leuwih ti 700 basa. Geus kitu, aya ogé vidéo-vidéo pikeun tunarungu sarta publikasi dina hurup Braille pikeun tunanétra. Urang ningali nubuat-nubuat dina Alkitab téh keur ngawujud, jalma-jalma ti ”unggal bangsa” keur diajar ”basa nu murni”, nyaéta bebeneran Alkitab. (Jak. 8:23; Sep. 3:9, Terjemahan Dunia Baru) Ieu kabéh bisa laksana lantaran pangawasna téh Isa Al-Masih.

8. Nepi ka ayeuna, naon hasil tina kagiatan pangwawaran urang?

⁸ Kiwari, aya leuwih ti 8.000.000 jalma di 240 nagri nu geus ngagabung ka organisasi Yéhuwa. Unggal taunna, aya leuwih ti 100.000 jalma nu dibaptis. Tapi nu leuwih penting téh nyaéta maranéhna terus maké ”kapribadian nu anyar”, maksudna ngupayakeun sipat-sipat Kristen. (Kol. 3:8-10) Loba jalma geus eureun tina kabiasaan cabul, teu  kasar deui, teu goréng sangka, jeung teu nasionalisme. Nubuat dina Yesaya 2:4 gé keur ngawujud, nyaéta ”maranéhna henteu diajar perang deui”. Ku lantaran urang geus ngusahakeun pikeun maké kapribadian anyar, batur gé jadi hayang ngagabung ka organisasi Allah. Éta ngabuktikeun yén urang téh nuturkeun bingbingan ti pangawas urang, nyaéta Isa Al-Masih. (Yah. 13:35; 1 Pét. 2:12) Ku naon urang bisa ngalakukeun éta? Ku lantaran urang téh dibantu ku Isa.

9. Nurutkeun Matius 24:45-47, naon nu bakal kajadian dina ahir jaman?

⁹ Baca Matius 24:45-47. Isa méré nyaho yén dina ahir jaman, manéhna bakal ngangkat ”palayan nu satia jeung bijaksana” pikeun nyadiakeun kadaharan rohani. Jadi, pasti palayan ieu téh sibuk pisan digawé dina jaman urang. Mémang kitu kanyataanana. Pangawas urang ngagunakeun sakelompok jalma pikeun ngurus umat Allah sarta jalma-jalma nu minat. Maranéhna bakal méré ”dahar pas dina waktuna”. Para priya ieu henteu nganggap dirina téh dunungan keur iman batur. (2 Kor. 1:24) Maranéhna sadar yén Isa Al-Masih téh ’pamingpin jeung kapalana’ urang Kristen.​—Yes. 55:4.

10. Siga dina gambar, publikasi naon nu geus ngabantu Sadérék pikeun ngawula Yéhuwa?

¹⁰ Ti saprak 1919, palayan nu satia téh nyiapkeun rupa-rupa publikasi nu geus ngabantu jalma-jalma nu minat pikeun ngasaan kadaharan rohani. Dina taun 1921, palayan ieu geus nyadiakeun buku The Harp of God nu ngabantu jalma-jalma nu minat pikeun diajar pangajaran dasar Alkitab. Beuki ka dieu, beuki loba publikasi séjén nu diterbitkeun. Publikasi mana nu geus ngabantu Sadérék pikeun kenal jeung nyaah ka Bapa urang di sorga? Meureun buku ”Karena Allah Itu Benar  Adanya”, atawa Kebenaran yang Membimbing kepada Hidup yang Kekal, atawa Saudara Dapat Hidup Kekal Dalam Firdaus di Bumi, atawa Pengetahuan yang Membimbing kepada Kehidupan yang Abadi, atawa Apa yang Sebenarnya Alkitab Ajarkan?, atawa Naon nu Diajarkeun Kitab Suci?, atawa Hirup Bagja Salilana!, buku nu panganyarna? Kabéh publikasi ieu dirancang supaya cocog jeung jalma-jalma dina jamanna.

11. Ku naon urang butuh kadaharan rohani?

¹¹ Jalma-jalma nu anyaran diajar bebeneran téh kudu boga pamahaman nu jero ngeunaan Yéhuwa jeung Alkitab. Tapi urang geus lila jadi saksi gé kudu kitu. Rasul Paulus nulis, ”Kadaharan nu teuas mah keur jalma déwasa.” Paulus gé nyebutkeun yén lamun urang ngalarapkeun naon nu diajarkeun tina Alkitab, urang bakal ”bisa ngabédakeun nu bener jeung nu salah”. (Ibr. 5:14) Ahlak jalma-jalma dina jaman ayeuna téh geus ruksak, jadi pasti hésé keur urang pikeun nuturkeun patokan hirup ti Yéhuwa. Tapi, Isa mastikeun supaya urang narima kadaharan rohani nu bisa nguatkeun iman urang. Sumber kadaharan rohani ieu téh nyaéta Firman Allah, Alkitab. Isa ngabingbing para palayan nu satia pikeun nyiapkeun jeung nyadiakeun kadaharan ieu.

12. Kumaha urang nuturkeun Isa dina ngamulyakeun nami Allah?

¹² Sarua siga Isa, urang gé ngamulyakeun nami Allah. (Yah. 17:6, 26) Misalna ti saprak 1931, urang ngagunakeun nami Saksi-Saksi Yéhuwa nu dasarna tina Alkitab. Ku kituna, urang némbongkeun sakumaha pentingna nami Allah keur urang, sarta urang gé hayang dikenal ku ngaran éta. (Yes. 43:10-12) Terus ti saprak Oktober taun éta, nami Allah nu suci ieu téh muncul dina sampul majalah Warta Hadé dina unggal terbitanana.  Salian ti éta, Kitab Suci Tarjamahan Dunya Anyar gé geus mulihkeun deui nami Allah ka tempat-tempat nu sakuduna. Ieu téh béda pisan jeung garéja-garéja Kristen nu geus mupus nami Allah tina tarjamahan-tarjamahan Alkitabna!

13. Naon nu ngayakinkeun Sadérék yén ayeuna Isa téh ngagunakeun ”palayan nu satia jeung bijaksana”? (Yahya 6:68)

¹³ Isa ngagunakeun ”palayan nu satia jeung bijaksana” pikeun ngajarkeun ngeunaan ibadah nu murni. Kumaha parasaan Sadérék kana organisasi ieu? Bisa jadi, Sadérék ngarasa siga rasul Pétrus nu ngomong kieu ka Isa, ”Juragan, ka saha deui urang-urang rék indit? Ucapan Juragan téh mawa kahirupan nu langgeng.” (Yah. 6:68) Pék pikirkeun, kumaha kaayaan urang lamun teu ngagabung jeung organisasi Yéhuwa? Organisasi ieu digunakeun ku Isa pikeun méré kadaharan rohani keur urang. Geus kitu, Isa gé ngalatih urang supaya leuwih tarampil dina dines. Isa gé mantuan urang pikeun maké ”kapribadian anyar” supaya bisa dipikaresep ku Yéhuwa.—Éf. 4:24.

14. Salila pandémi COVID-19, mangpaat naon nu geus dirasakeun ku Sadérék lantaran aya dina organisasi Yéhuwa?

¹⁴ Isa méré pituduh nu alus dina mangsa kasusah. Waktu pandémi COVID-19 dimimitian, urang bisa ngarasakeun mangpaat tina pituduhna Isa. Basa éta, loba jalma teu nyaho kudu ngalakukeun naon. Tapi Isa méré pituduh nu alus supaya urang bisa tetep aman. Urang dijurung pikeun maké masker waktu kaluar imah sarta ngajaga jarak jeung batur. Para kokolot gé diingetan supaya terus nguatkeun pawarta di sidang sarta merhatikeun  pangabutuh jasmani jeung rohani maranéhna. (Yes. 32:1, 2) Urang gé bisa dikuatkeun jeung narima pituduh-pituduh séjén liwat Laporan Badan Pimpinan.

15. Salila pandémi, urang meunang pituduh naon ngeunaan masamoan sarta dines, jeung naon hasilna?

¹⁵ Salila pandémi, urang meunang pituduh ngeunaan carana masamoan sarta dines. Urang langsung masamoan sarta nongton kongrés liwat konperénsi vidéo. Urang gé bisa dines liwat surat sarta telepon. Upaya urang téh diberkahan ku Yéhuwa. Loba kantor cabang ngalaporkeun yén aya loba pisan pawarta anyar di cabangna. Salian ti éta, loba ogé nu boga pangalaman alus salila pandémi. Tingali kotak ” Yéhuwa Ngaberkahan Pangwawaran Urang”.

16. Urang bisa yakin kana hal naon?

¹⁶ Meureun aya nu ngarasa salila pandémi ieu, organisasi téh meni ati-ati teuing. Tapi geus sababaraha kali kabukti yén pituduh nu urang tarima téh mémang cocog pisan. (Mat. 11:19) Jadi lamun urang mikirkeun cara Isa ngabingbing urang Kristen, urang bisa yakin yén teu sual naon waé nu bakal kajadian ka hareupna, Yéhuwa sarta Putra-Na bakal terus nyarengan urang.​—Baca Ibrani 13:5, 6.

17. Kumaha parasaan Sadérék lantaran boga pangawas siga Isa?

¹⁷ Urang bungah pisan boga pangawas siga Isa. Urang téh aya dina organisasi nu ngahijikeun jalma-jalma ti rupa-rupa budaya, suku bangsa, jeung basa. Urang dibéré loba pituduh tina Firman Allah sarta dilatih pikeun ngawawar. Urang masing-masing diajarkeun pikeun maké kapribadian anyar sarta pikeun mikanyaah batur. Urang reueus lantaran Isa téh pangawas urang.