Yosua 6:1-27
6 Ari gerbang kota Yérikho ditutup rapet pisan lantaran jalma-jalma di dinya sieuneun ka urang Israél. Euweuh nu bisa asup atawa kaluar ti dinya.
2 Tuluy Yéhuwa ngomong ka Yosua, ”Tuh, Kuring geus nyerahkeun Yérikho, rajana, jeung para prajuritna nu perkasa ka manéh.
3 Maranéh para prajurit kudu baris jeung ngurilingan éta kota sapoé sakuriling. Lakukeun éta salila genep poé.
4 Tujuh imam kudu mawa tujuh tarompét tanduk* di hareupeun peti perjangjian. Tapi dina poé nu katujuh, maranéh kudu baris sarta ngurilingan éta kota tujuh kali, jeung para imam kudu niup tarompétna.
5 Barang ngadéngé sora* tarompét, kabéh prajurit kudu ngagorowok sing tarik. Geus kitu, témbok éta kota bakal rugrug, rata jeung taneuh, terus para prajurit kudu nyerbu asup ka éta kota.”
6 Seug Yosua anak Nun ngageroan imam-imam jeung nitah kieu, ”Pék gotong peti perjangjian, tuluy tujuh imam kudu mawa masing-masing hiji tarompét tanduk di hareupeun peti perjangjian Yéhuwa.”
7 Tuluy manéhna nitah para prajurit, ”Pék baris ngurilingan éta kota, jeung prajurit nu mawa senjata leumpangna kudu di hareupeun peti perjangjian Yéhuwa.”
8 Sakumaha paréntah Yosua, tujuh imam nu masing-masing mawa tarompét tanduk di hareupeun Yéhuwa maju jeung niup tarompétna, dituturkeun ku para imam nu ngagotong peti perjangjian Yéhuwa.
9 Pasukan nu mawa senjata leumpang di hareupeun para imam nu niup tarompét tanduk, pasukan séjénna ngawal di tukangeun peti perjangjian. Salila éta, tarompét terus ditiup.
10 Para prajurit gé geus diomat-omatan ku Yosua, ”Ulah aya nu ngagorowok. Maranéh kudu bener-bener jempé, ulah aya nu ngomong sakecap-kecap acan. Engké lamun ku urang dititah ngagorowok, kakara maranéh ngagorowok.”
11 Manéhna nitah supaya peti perjangjian Yéhuwa dibawa ngurilingan kota éta sakali. Geus kitu, maranéhna balik ka pakémahan jeung meuting di dinya.
12 Isukna, Yosua hudang isuk-isuk, tuluy para imam ngagotong peti perjangjian Yéhuwa.
13 Tujuh imam séjénna nu mawa tarompét tanduk leumpang di hareupeun peti perjangjian Yéhuwa bari terus niup tarompétna. Pasukan nu mawa senjata leumpang panghareupna, ari pasukan séjénna mah ngawal di tukangeun peti perjangjian Yéhuwa. Salila éta, tarompét terus ditiup.
14 Maranéhna baris jeung ngurilingan kota éta sakali dina poé nu kadua. Geus kitu, maranéhna balik ka pakémahan. Kitu baé terus nepi ka poé nu kagenep.
15 Dina poé nu katujuh, maranéhna hudang isuk-isuk pas panonpoé rék medal, tuluy maranéhna baris jeung ngurilingan kota éta tujuh kali ku cara nu sarua. Ngan dina poé éta maranéhna ngurilingan kota éta tujuh kali.
16 Waktu nguriling katujuh kalina, para imam niup tarompét tanduk, jeung Yosua nitah para prajurit, ”Pék ngagorowok, sabab Yéhuwa geus nyerahkeun kota ieu ka maranéh!
17 Kota ieu jeung sagala eusina kudu dimusnakeun. Éta kabéh milik Yéhuwa. Nu meunang hirup téh ngan Rahab palacur téa jeung saeusi imahna, lantaran manéhna geus nyumputkeun mata-mata urang.
18 Tapi singkahan sagala nu kudu dimusnakeun, ngarah maranéh teu kabita tuluy nyokot. Lamun maranéh nyokot, musibat bakal datang ka pakémahan Israél jeung maranéhna kudu dimusnakeun.
19 Ari sakabéh pérak, emas, sarta barang-barang tina tambaga jeung beusi mah suci keur Yéhuwa. Kabéhanana kudu dibawa ka tempat paranti nyimpen harta Yéhuwa.”
20 Barang tarompét-tarompét tanduk ditiup, ger para prajurit ngagorowok tarik pisan. Bruk témbok kota téh rugrug, rata jeung taneuh. Burudul para prajurit nyerbu ka jero kota jeung ngarebut kota éta.
21 Saeusi kota, teu sual awéwé, lalaki, nu kolot, nu ngora, sapi, domba, jeung kaldé, kabéhanana dipaéhan ku pedang.
22 Yosua nitah dua jalma nu jadi mata-mata téa, ”Jung indit ka imah palacur éta, bawa kaluar manéhna jeung saeusi imahna, sakumaha sumpah maranéh ka manéhna.”
23 Bral dua mata-mata ngora éta arindit. Rahab dibawa kaluar bareng jeung bapana, indungna, dulur-dulur lalakina, jeung saeusi imahna. Kabéh kulawarga Rahab dibawa ka tempat nu aman di luar pakémahan Israél.
24 Geus kitu, kota éta jeung sagala eusina diduruk. Tapi pérak, emas, sarta barang-barang tina tambaga jeung beusi mah dibawa ka tempat paranti nyimpen harta di imah Yéhuwa.
25 Nu teu dipaéhan ku Yosua mah ngan Rahab palacur téa, kulawarga bapana, jeung saeusi imahna. Manéhna cicing bareng jeung urang Israél nepi ka ayeuna, lantaran manéhna nyumputkeun mata-mata nu diutus ku Yosua ka Yérikho.
26 Harita, Yosua sumpah,* ”Saha waé nu nyoba-nyoba ngabangun deui kota Yérikho sing dikutuk di hareupeun Yéhuwa. Anu nyieun pondasina bakal paéh anak cikalna, ari anu masang panto-panto gerbangna bakal paéh anak bungsuna.”
27 Yéhuwa nyarengan Yosua, jeung ngaranna* jadi kasohor ka sakuliah bumi.
Catetan Tambihan
^ As. ”tanduk domba jalu”.
^ Atawa ”sora tiupan panjang ti”.
^ Atawa bisa jadi ”nitah jalma-jalma sumpah”.
^ Atawa bisa jadi ngamaksudkeun ngaran Yéhuwa.
