Pamindo 7:1-26
7 ”Waktu Yéhuwa Allah maranéh mawa asup maranéh ka tanah nu bakal direbut ku maranéh, Anjeunna gé bakal nyingkirkeun tujuh bangsa nu gedé, nyaéta urang Hét, urang Girgasyi, urang Amori, urang Kanaan, urang Périz, urang Héwi, jeung urang Yébus. Maranéhna téh bangsa nu leuwih gedé jeung leuwih kuat tibatan maranéh.
2 Éta bangsa-bangsa téh ku Yéhuwa Allah maranéh bakal dipasrahkeun. Maranéh bakal ngéléhkeun maranéhna. Éta bangsa-bangsa kudu dimusnakeun. Ulah nyieun perjangjian jeung maranéhna atawa mikarunya maranéhna.
3 Ulah kawin jeung maranéhna.* Anak-anak awéwé maranéh ulah dikawinkeun ka anak-anak lalaki maranéhna. Anak-anak awéwé maranéhna ulah dijadikeun pamajikan anak-anak lalaki maranéh.
4 Teu meunang kitu téh sabab anak-anak lalaki maranéh ku maranéhna bakal diajak mungkir ti Allah sarta nyembah ka allah-allah séjén. Upama nepi ka kitu, Yéhuwa bakal ambek pisan sarta langsung ngabinasakeun maranéh.
5 ”Jadi, ieu nu kudu dilampahkeun: Ancurkeun mézbah-mézbahna, runtuhkeun pilar-pilar berhala* jeung tihang-tihang berhalana,* sarta duruk patung-patung ukiranana.
6 Kudu kitu téh sabab maranéh bangsa nu suci keur Yéhuwa Allah maranéh. Ti antara sakabéh bangsa di bumi, maranéh geus dipilih ku Yéhuwa Allah maranéh pikeun jadi umat-Na, milik-Na nu istiméwa.*
7 ”Maranéh dipikanyaah jeung dipilih ku Yéhuwa téh lain ku lantaran maranéh bangsa nu panggedéna di antara sakabéh bangsa, justru maranéh téh nu pangleutikna.
8 Ku lantaran Yéhuwa nyaah ka maranéh sarta nedunan ikrar-Na ka karuhun maranéh, Yéhuwa ngabudalkeun maranéh ku kawasa-Na nu gedé. Maranéh ditebus ti tempat maranéh diperbudak, ti kawasa Firaun raja Mesir.
9 Maranéh apal pisan yén Yéhuwa Allah maranéh téh Allah nu sajati, Allah nu satia, nu nyepeng kana perjangjiana-Na, sarta némbongkeun asih satia ka jalma nu nyaah ka Anjeunna jeung ngajalankeun paréntah-Na, malah nepi ka génerasina nu kasarébu.
10 Tapi, Anjeunna pasti bakal ngabales jeung ngabinasakeun jalma nu ngéwa ka Anjeunna. Jalma nu ngéwa ka Anjeunna bakal langsung dihukum jeung dibales.
11 Ku kituna, paréntah, aturan, jeung putusan hukum nu ditepikeun ku kuring poé ieu kudu enya-enya dijalankeun, kabéhanana kudu dilampahkeun.
12 ”Lamun maranéh terus ngadéngékeun, ngajalankeun, jeung nurut kana putusan hukum ieu, Yéhuwa Allah maranéh bakal terus nyepeng kana perjangjiana-Na sarta némbongkeun asih satia, sakumaha sumpah-Na ka karuhun maranéh.
13 Anjeunna bakal mikanyaah jeung ngaberkahan maranéh. Turunan maranéh bakal jadi loba. Maranéh bakal dibéré loba anak, hasil tanah, sisikian, cianggur anyar, minyak, anak-anak sapi jeung domba di tanah nu dijangjikeun ku Anjeunna ka karuhun maranéh pikeun dibikeun ka maranéh.
14 Ti antara sakabéh bangsa, maranéh bakal jadi bangsa nu dibéré berkah panglobana. Moal aya lalaki atawa awéwé di antara maranéh anu mandul, kitu deui jeung ingon-ingon maranéh.
15 Maranéh ku Yéhuwa bakal dijauhkeun tina sagala panyakit sarta moal diterapan panyakit parah nu ditingali ku maranéh basa di Mesir. Tapi, éta kabéh bakal dikeunakeun ka kabéh jalma nu ngéwa ka maranéh.
16 Maranéh kudu ngamusnakeun sakabéh bangsa nu geus dipasrahkeun ku Yéhuwa Allah maranéh. Ulah karunya ka maranéhna, sarta ulah nyembah ka allah-allah maranéhna, lantaran éta téh jiret keur maranéh.
17 ”Lamun maranéh ngomong di jero haté, ’Bangsa-bangsa ieu leuwih gedé tibatan urang, kumaha urang bisa ngusir maranéhna?’
18 Ulah sieun ka maranéhna. Sing inget naon nu dilampahkeun ku Yéhuwa Allah maranéh ka Firaun jeung ka sakuliah Mesir.
19 Sing inget kana hukuman nu beurat nu ditempo ku maranéh, tanda-tanda, mujijat-mujijat, kawasa-Na nu gedé jeung kakuatana-Na nu hébat, nu dipaké ku Yéhuwa Allah maranéh pikeun ngabudalkeun maranéh. Éta nu bakal dipidamel ku Yéhuwa Allah maranéh ka bangsa-bangsa nu dipikasieun ku maranéh.
20 Maranéhna bakal disina leungit sumanget* ku Yéhuwa Allah maranéh. Nu nyésa jeung nu nyumput ti maranéh gé bakal disingkirkeun.
21 Ulah sieun ka maranéhna, sabab Yéhuwa Allah maranéh nu hébat jeung matak tajub téh nangtayungan maranéh.
22 ”Bangsa-bangsa éta pasti diusir ku Yéhuwa Allah maranéh, diusirna saeutik-saeutik. Ku maranéh dibasmina ulah disakalikeun, supaya sato-sato galak henteu ngalobaan jeung nyilakakeun maranéh.
23 Yéhuwa Allah maranéh bakal masrahkeun bangsa-bangsa éta ka maranéh. Anjeunna bakal ngéléhkeun maranéhna nepi ka béak.
24 Raja-rajana bakal dipasrahkeun ka maranéh. Ngaran raja-raja éta moal diinget-inget deui. Moal aya nu bisa ngalawan maranéh. Maranéh bakal ngabasmi maranéhna.
25 Duruk patung ukiran allah-allahna. Ulah kabita atawa nyokot emas jeung pérak maranéhna, sabab éta bisa jadi jiret. Éta téh dipikageuleuh ku Yéhuwa Allah maranéh.
26 Ulah mawa barang-barang nu pikageuleuheun ka imah maranéh supaya maranéh teu dimusnakeun kawas barang-barang éta. Maranéh kudu geuleuh pisan ka barang-barang éta, lantaran éta téh kaasup barang-barang nu kudu dimusnakeun.
Catetan Tambihan
^ Atawa ”Ulah mimitraan jeung maranéhna ku perkawinan”.
^ Tingali Daptar Istilah.
^ Tingali Daptar Istilah.
^ Atawa ”nu dipikanyaah”.
^ Atawa bisa jadi ”disina geumpeur; kasieunan”.
