Pamindo 13:1-18
-
Nu kudu dilampahkeun waktu aya nu murtad (1-18)
13 ”Lamun di antara maranéh aya nabi atawa tukang napsirkeun impian nu méré nyaho tanda atawa ramalan,
2 seug éta tanda atawa ramalan téh bener kajadian, terus ceuk manéhna, ’Hayu urang nyembah ka allah-allah séjén, urang ngalalayanan allah-allah éta,’ padahal maranéh teu kenal ka allah-allah éta,
3 omongan nabi atawa tukang napsirkeun impian éta téh ulah didéngékeun, sabab Yéhuwa Allah maranéh keur nguji maranéh, hayang nyaho maranéh téh mikanyaah Yéhuwa Allah maranéh ku sapinuhna haté jeung sagemblengna nyawa* atawa henteu.
4 Nu kudu disembah jeung dihormat* téh Yéhuwa Allah maranéh. Maranéh kudu ngajalankeun paréntah-paréntah-Na, taat kana firman-Na. Maranéh kudu ngalalayanan jeung satia* ngan ka Anjeunna.
5 Tapi, nabi atawa tukang napsirkeun impian éta kudu dipaéhan, sabab manéhna ngajurung maranéh barontak ka Yéhuwa Allah maranéh nu geus ngabudalkeun maranéh ti Mesir jeung nebus maranéh ti pangbudakan. Éta jalma rék nyimpangkeun maranéh tina jalan nu geus dituduhkeun ku Yéhuwa Allah maranéh. Maranéh kudu nyingkirkeun kajahatan ti antara maranéh.
6 ”Lamun adi atawa lanceuk lalaki, anak lalaki, anak awéwé, pamajikan nu dipikacinta, atawa sobat dalit maranéh cicing-cicing ngajak nyembah ka allah-allah séjén, allah-allah nu teu dikenal ku maranéh jeung karuhun maranéh,
7 allah ti bangsa-bangsa di sabudeureun maranéh, boh nu deukeut boh nu jauh, ti tungtung nepi ka tungtung ieu nagri,
8 ulah kababawa, jeung ulah didéngé. Maranéh gé ulah karunya, watir, atawa hayang ngabéla.
9 Sabalikna, manéhna kudu dipaéhan. Maranéh nu kudu ngabalédogan ti heula, tuluy balédogan ku saréréa.
10 Balédogan nepi ka paéh, sabab manéhna rék ngajak nyimpang ti Yéhuwa Allah maranéh, nu geus ngabudalkeun maranéh ti Mesir, tempat maranéh diperbudak.
11 Seug éta bakal kadéngé ku sakabéh urang Israél, tuluy maranéhna bakal sarieuneun. Ku kituna, di antara maranéh moal aya nu ngalampahkeun kajahatan siga kitu deui.
12 ”Lamun di salah sahiji kota nu dibikeun ku Yéhuwa Allah maranéh kadéngé béja yén
13 aya jalma-jalma nu teu guna nyasabkeun penduduk kota pikeun nyembah ka allah-allah séjén nu teu dikenal ku maranéh,
14 pariksa ku maranéh, silidik bener-bener, pék tatanya ka batur. Lamun enya aya kajadian pikageuleuheun kawas kitu di antara maranéh,
15 paéhan jalma-jalma di éta kota ku pedang. Musnakeun éta kota jeung sagala eusina, kaasup ingon-ingonna.
16 Kumpulkeun sakabéh jarahan ka tengah lapangan kota, tuluy duruk kotana. Éta jarahan bakal jadi kawas kurban beuleuman keur Yéhuwa Allah maranéh. Kotana bakal jadi tumpukan barangkal keur salilana sarta teu meunang diwangun deui.
17 Maranéh teu meunang nyokot sagala nu geus ditangtukeun pikeun dimusnakeun. Ku kituna amarah Yéhuwa bakal sirna, Anjeunna bakal némbongkeun welas asih sarta bakal karunya ka maranéh. Maranéh gé bakal dijadikeun loba, sakumaha sumpah-Na ka karuhun maranéh.
18 Maranéh kudu taat ka* Yéhuwa Allah maranéh ku cara ngajalankeun sakabéh paréntah-Na nu ditepikeun ku kuring poé ieu. Ku kituna, maranéh ngalampahkeun nu bener di payuneun Yéhuwa Allah maranéh.
Catetan Tambihan
^ Atawa ”jiwa”. Tingali Daptar Istilah.
^ As. ”dipikasieun”.
^ Atawa ”muntang”.
^ Atawa ”kudu ngadéngékeun ucapan”.
