Kisah Para Rasul 12:1-25
12 Dina mangsa éta, Raja Hérodés mulai nindes sababaraha jalma di sidang jamaah.
2 Manéhna maéhan Yakobus dulurna Yahya ku pedang.
3 Basa nyaho tindakanana téh dipikaresep ku urang Yahudi, manéhna gé néwak Pétrus. (Éta téh kajadianana waktu Parayaan Roti nu Teu Diragian.)
4 Pétrus ditéwak tuluy dijebloskeun ka panjara. Manéhna dijaga ku opat regu prajurit, sareguna téh opatan. Rencanana, manéhna bakal dibawa ka* hareupeun jalma-jalma sanggeus Paskah.
5 Salila Pétrus dipanjara, sidang jamaah terus sasambat ka Allah ngadoakeun manéhna.
6 Dina peuting saacan Hérodés mawa Pétrus ka hareupeun jalma-jalma, Pétrus keur saré bari dihapit ku dua prajurit sarta ditalian ku dua ranté. Di hareupeun panto panjara gé aya panjaga-panjaga.
7 Ujug-ujug, jleg aya malaikat Yéhuwa ngadeg di dinya. Sél panjara gé jadi caang. Malaikat éta ngageuingkeun Pétrus tuluy ngomong, ”Geura hudang!” Harita kénéh ranté-ranté di leungeunna lalésot.
8 Malaikat éta ngomong, ”Siap-siap,* paké sendal manéh.” Ku Pétrus diturutan. Terus, malaikat éta ngomong, ”Paké baju luar manéh, tuturkeun urang.”
9 Ku kituna Pétrus kaluar jeung nuturkeun malaikat éta, bari teu engeuh naon nu dilakukeun ku malaikat éta téh nyaanan. Disangkana mah éta téh titingalian.
10 Maranéhna ngaliwatan pos jaga nu kahiji jeung nu kadua, tuluy nepi ka gerbang beusi nu losna ka kota. Bray éta gerbang muka sorangan. Sanggeus kaluar, maranéhna nepi ka hiji jalan. Les baé malaikat téh ninggalkeun manéhna.
11 Kakara Pétrus sadar kana kajadianana tuluy ngagereyem, ”Ayeuna aing yakin Yéhuwa téh geus ngutus malaikat-Na jang nyalametkeun aing ti leungeun Hérodés jeung ti sagala maksud jahatna urang Yahudi.”
12 Sanggeus mikir kitu, manéhna indit ka imahna Maryam indungna Yahya nu disebut Markus. Di dinya aya sababaraha murid nu kumpul keur ngadoa.
13 Waktu manéhna keketrok panto gerbang, saurang palayan awéwé nu ngaranna Roda nyampeurkeun rék mangmukakeun panto.
14 Manéhna nyahoeun éta téh sorana Pétrus. Tapi bakating ku atoh-atohna, lainna mangmukakeun panto, manéhna kalah ka lumpat ka jero jeung ngabéjaan yén Pétrus aya di hareupeun gerbang.
15 Ceuk maranéhna, ”Ah, manéh mah ngalindur.” Tapi manéhna keukeuh éta téh bener. Terus maranéhna ngomong, ”Malaikatna meureun éta mah.”
16 Ari Pétrus haben baé keketrok. Barang panto dibuka, maranéhna ngajenghok rareuwaseun ningali Pétrus.
17 Ku Pétrus maranéhna diisaratan sina jarempé, tuluy manéhna ngajéntrékeun kumaha Yéhuwa ngaluarkeun manéhna ti panjara. Ceuk manéhna, ”Jung béjakeun ieu ka Yakobus jeung dulur-dulur séjén.” Geus kitu manéhna kaluar jeung indit ka tempat séjén.
18 Isukna, para prajurit raribut, baringungeun Pétrus téh ka mana.
19 Hérodés néangan Pétrus ka mamana tapi teu kapanggih. Para prajurit nu ngajagana gé dipariksa tuluy dibawa pikeun dihukum. Geus kitu, Hérodés indit ti Yudéa ka Kaisaréa jeung cicing di dinya sababaraha waktu.
20 Hiji waktu, Hérodés ambek pisan ka* urang Tirus jeung Sidon. Jadi jalma-jalma éta mupakat rék ménta tulung ka Blastus, kapala rumah tangga* raja, supaya maranéhna bisa akur deui jeung raja, lantaran nagri maranéhna meunang dahareun ti nagrina raja.
21 Dina poé nu geus ditangtukeun, Hérodés maké baju karajaan, diuk dina korsi pangadilan, tuluy pidato.
22 Jalma-jalma nu kumpul di dinya tingsarurak, ”Ieu sora allah, lain sora manusa!”
23 Harita kénéh, manéhna digebug ku malaikat Yéhuwa lantaran henteu ngamulyakeun Allah. Akibatna, manéhna gering, dihakan ku cacing, terus maot.
24 Tapi firman Yéhuwa beuki nyebar, jeung beuki loba jalma nu jadi murid.
25 Ari Barnabas jeung Saulus, sanggeus bérés ngirim bantuan ka Yérusalém, maranéhna balik ka Antiokhia bari ngajak Yahya, nu disebut ogé Markus.
Catetan Tambihan
^ Atawa ”diadilan di”.
^ Atawa ”Paké beubeur”.
^ Atawa ”hayang merangan”.
^ As. ”kamar tempat saréna”.
