Imamat 4:1-35
-
Kurban pangampura dosa (1-35)
4 Yéhuwa ngomong deui ka Musa,
2 ”Béjaan urang Israél, ’Lamun aya nu nyieun dosa lantaran teu kahaja ngalampahkeun naon nu dilarang ku Yéhuwa, ieu nu kudu dilampahkeun:
3 ”’Lamun nu nyieun dosana téh imam nu dilantik, tuluy ieu bangsa jadi kababawa salah, manéhna kudu ngabaktikeun hiji sapi jalu ngora nu séhat ka Yéhuwa pikeun jadi kurban pangampura dosa. Éta téh kurban keur dosa manéhna.
4 Bawa sapina ka hareupeun Yéhuwa, ka lawang asup kémah tepangan. Manéhna kudu numpangkeun leungeun kana hulu éta sapi. Sapina kudu dipeuncit di hareupeun Yéhuwa.
5 Geus kitu imam nu dilantik éta kudu nyokot getih sapina sawaréh, tuluy bawa asup ka kémah tepangan.
6 Manéhna kudu nganclomkeun ramona kana éta getih. Képrét-képrétkeun getihna tujuh kali di hareupeun Yéhuwa, di hareupeun hordéng nu aya di tempat suci.
7 Manéhna gé kudu ngulaskeun getih saeutik kana tanduk-tanduk mézbah dupa, nu aya di hareupeun Yéhuwa, di kémah tepangan. Getih sésana kucurkeun kana dasar mézbah kurban beuleuman, nu aya di lawang asup kémah tepangan.
8 ”’Tuluy, manéhna kudu ngala sakabéh gajih sapi nu jadi kurban pangampura dosa, nyaéta gajih nu nutupan peujit, gajih nu napel dina peujit,
9 dua giginjel deukeut cangkéng jeung gajih-gajihna, sarta gajih dina atina.
10 Ngala gajihna kudu sakumaha ngala gajih sapi nu dijadikeun kurban karukunan. Éta kabéh ku imam kudu dibeuleum dina mézbah kurban beuleuman supaya haseupna ngebul.
11 ”’Ari kulitna, dagingna, huluna, bitisna, sarta peujit jeung eusina,
12 nyaéta sakabéh babagian séjén éta sapi, kudu dibawa ka luar pakémahan, ka tempat nu geus ditangtukeun,* nyaéta tempat miceun lebu.* Manéhna kudu ngaduruk éta kabéh di luhureun kai, ngadurukna kudu di tempat miceun lebu.
13 ”’Lamun sakumna jamaah Israél dianggap salah lantaran teu kahaja nyieun dosa, tapi maranéhna* teu sadar geus ngalampahkeun naon nu dilarang ku Yéhuwa,
14 tuluy dosana téh kanyahoan, maranéhna* kudu ngabaktikeun hiji sapi jalu ngora pikeun jadi kurban pangampura dosa. Éta kudu dibawa ka hareupeun kémah tepangan.
15 Para pamingpin jamaah kudu numpangkeun leungeunna kana hulu éta sapi di hareupeun Yéhuwa. Sapina kudu dipeuncit di hareupeun Yéhuwa.
16 ”’Geus kitu, imam nu dilantik kudu mawa getih sapina sawaréh ka kémah tepangan.
17 Manéhna kudu nganclomkeun ramona kana éta getih. Képrét-képrétkeun getihna tujuh kali di hareupeun Yéhuwa, di hareupeun hordéng.
18 Manéhna gé kudu ngulaskeun getih saeutik kana tanduk-tanduk mézbah, nu aya di hareupeun Yéhuwa, di kémah tepangan. Getih sésana kucurkeun kana dasar mézbah kurban beuleuman, nu aya di lawang asup kémah tepangan.
19 Ala sakabéh gajihna tuluy beuleum dina mézbah supaya haseupna ngebul.
20 Cara ngabaktikeun éta sapi téh kudu sarua kawas sapi nu tadi téa, nu dibaktikeun waktu éta imam nyieun dosa. Éta nu kudu dilampahkeun ku imam pikeun mangméntakeun pangampura keur sakumna jamaah. Ku kituna, dosa maranéhna bakal dihampura.
21 Manéhna kudu mawa sapina ka luareun pakémahan, tuluy beuleum éta sapi kawas sapi nu tadi téa. Éta téh kurban pangampura dosa keur sakumna jamaah.
22 ”’Lamun aya pamingpin nu dianggap salah lantaran teu kahaja nyieun dosa ku cara ngalampahkeun naon nu dilarang ku Yéhuwa Allahna,
23 atawa lamun manéhna sadar manéhna geus nyieun dosa lantaran ngalanggar paréntah Allah, manéhna kudu mawa hiji embé jalu ngora nu séhat.
24 Manéhna kudu numpangkeun leungeun kana hulu éta embé. Embéna kudu dipeuncit di hareupeun Yéhuwa, nyaéta di tempat meuncit sato keur kurban beuleuman. Éta téh kurban pangampura dosa.
25 Imam kudu nganclomkeun ramona kana getih kurban pangampura dosa, tuluy ulaskeun kana tanduk-tanduk mézbah kurban beuleuman. Getih sésana kucurkeun kana dasar mézbah kurban beuleuman.
26 Kabéh gajih satona kudu dibeuleum dina mézbah supaya haseupna ngebul, sakumaha gajih sato kurban karukunan. Imam kudu mangméntakeun pangampura keur éta pamingpin. Ku kituna, dosa éta pamingpin bakal dihampura.
27 ”’Lamun ti antara sakumna bangsa aya nu dianggap salah lantaran teu kahaja nyieun dosa ku cara ngalampahkeun naon nu dilarang ku Yéhuwa,
28 atawa lamun manéhna sadar manéhna geus nyieun dosa, manéhna kudu mawa hiji embé bikang ngora nu séhat pikeun jadi kurban keur dosa manéhna.
29 Manéhna kudu numpangkeun leungeun kana hulu éta embé nu jadi kurban pangampura dosa. Embéna kudu dipeuncit di tempat meuncit kurban beuleuman.
30 Imam kudu nganclomkeun ramona kana getih éta embé, tuluy ulaskeun kana tanduk-tanduk mézbah kurban beuleuman. Getih sésana kucurkeun kana dasar mézbah.
31 Imam kudu ngala sakabéh gajih satona, sakumaha ngala gajih sato nu jadi kurban karukunan. Beuleum éta kabéh dina mézbah supaya haseupna ngebul, seungitna téh nyukakeun Yéhuwa. Imam kudu mangméntakeun pangampura keur éta jalma. Ku kituna, dosa éta jalma bakal dihampura.
32 ”’Tapi lamun éta jalma méré domba pikeun jadi kurban pangampura dosa, manéhna kudu méré hiji domba bikang ngora anu séhat.
33 Manéhna kudu numpangkeun leungeun kana hulu éta sato nu jadi kurban pangampura dosa. Dombana kudu dipeuncit di tempat meuncit kurban beuleuman.
34 Imam kudu nganclomkeun ramona kana getih kurban pangampura dosa, tuluy ulaskeun kana tanduk-tanduk mézbah kurban beuleuman. Getih sésana kucurkeun kana dasar mézbah.
35 Imam kudu ngala sakabéh gajih satona, sakumaha ngala gajih domba jalu ngora nu jadi kurban karukunan. Teundeun éta kabéh di luhureun kurban beuleuman keur Yéhuwa. Éta kudu dibeuleum dina mézbah supaya haseupna ngebul. Imam kudu mangméntakeun pangampura keur éta jalma. Ku kituna, dosa éta jalma bakal dihampura.
Catetan Tambihan
^ As. ”tempat nu bersih”.
^ Atawa ”lebu nu aya gajihna”, nyaéta lebu nu pacampur jeung gajih sato nu dikurbankeun.
^ Bisa jadi ngamaksudkeun para pamingpin nu ngawakilan jamaah.
^ Bisa jadi ngamaksudkeun para pamingpin nu ngawakilan jamaah.
