Imamat 2:1-16
-
Kurban kadaharan (1-16)
2 ”’Lamun aya nu rék ngabaktikeun kurban kadaharan ka Yéhuwa, manéhna kudu ngabaktikeun tipung lemes. Tipungna kudu dikucuran ku minyak sarta di luhureunana dibéré menyan.
2 Éta kudu dibawa ka para imam, nyaéta anak-anak lalakina Harun. Imam bakal nyokot sakabéh menyan jeung tipung lemes sakeupeul nu geus dicampur ku minyak, tuluy dibeuleum dina mézbah supaya haseupna ngebul. Éta téh pikeun ngawakilan sakabéh kurban kadaharan. Seungit kurban kadaharan nu dibeuleum éta nyukakeun Yéhuwa.
3 Sésa kurban kadaharan téh jadi milik Harun jeung anak-anak lalakina. Éta téh bagian nu kacida sucina tina kurban nu dibeuleum keur Yéhuwa.
4 ”’Lamun aya nu rék méré kurban kadaharan nu dipanggang, manéhna kudu méré roti nu teu diragian nu bentukna siga geulang jeung dicampur ku minyak. Lamun henteu, manéhna kudu méré roti ipis nu teu diragian nu diulasan ku minyak. Kabéhanana kudu dijieun tina tipung lemes.
5 ”’Lamun kurban kadaharanana dipanggang dina katél cépér, dijieunna kudu tina tipung lemes nu dicampur ku minyak, tapi ulah diragian.
6 Éta kudu disemplékan tuluy dikucuran ku minyak. Éta téh kurban kadaharan.
7 ”’Lamun kurban kadaharanana dipasak dina panci, adonanana kudu tina tipung lemes jeung minyak.
8 Kurban kadaharanana kudu dibawa ka Yéhuwa. Bikeun éta ka imam, engké ku manéhna bakal dibawa ka deukeut mézbah.
9 Kurban kadaharan éta ku Imam bakal dicokot sawaréh tuluy dibeuleum dina mézbah supaya haseupna ngebul. Éta téh pikeun ngawakilan sakabéh kurban kadaharan. Seungit kurban kadaharan nu dibeuleum éta nyukakeun Yéhuwa.
10 Sésa kurban kadaharan téh jadi milik Harun jeung anak-anak lalakina. Éta téh bagian nu kacida sucina tina kurban nu dibeuleum keur Yéhuwa.
11 ”’Sakabéh kurban kadaharan nu dibaktikeun ka Yéhuwa teu meunang diragian. Naon waé nu aya ragi atawa sari buahna* teu meunang dijadikeun kurban nu dibeuleum keur Yéhuwa.
12 ”’Éta meunang dijadikeun kurban keur Yéhuwa sabagé kurban hasil panén nu mimiti. Tapi éta teu meunang dibeuleum dina mézbah, teu meunang jadi kurban nu seungitna nyukakeun Allah.
13 ”’Unggal kurban kadaharan kudu diuyahan, ulah nepi ka teu diuyahan. Ku ayana uyah, maranéh jadi inget kana perjangjian Allah jeung maranéh. Unggal maranéh ngabaktikeun kurban, éta kudu diuyahan.
14 ”’Lamun aya nu ngabaktikeun kurban kadaharan tina hasil panén nu mimiti ka Yéhuwa, nu dibaktikeun téh kudu sisikian anyar nu dipanggang jeung ditutu. Éta téh kurban kadaharan tina hasil panén nu mimiti.
15 Éta kudu dikucuran ku minyak jeung dibéré menyan luhureunana. Éta téh kurban kadaharan.
16 Imam bakal nyokot sakabéh menyan sarta sawaréh sisikian nu geus ditutu jeung dicampur ku minyak, tuluy éta dibeuleum supaya haseupna ngebul. Éta téh pikeun ngawakilan sakabéh kurban kadaharan keur Yéhuwa.
Catetan Tambihan
^ As. ”maduna”, katingalina ieu ngamaksudkeun sari buah.
