Ibrani 8:1-13
8 Jadi, nu diomongkeun ku urang-urang téh ieu intina: Urang boga imam agung nu siga kitu. Ayeuna, manéhna geus diuk di katuhueun tahta Allah Nu Agung di sorga,
2 salaku palayan di Rohangan Mahasuci jeung di kémah nu sajati, nu diadegkeun ku Yéhuwa, lain ku manusa.
3 Unggal imam agung dilantik pikeun nyanggakeun pangbakti jeung kurban, nya kitu ogé imam agung nu ieu perlu nyanggakeun korban.
4 Lamun manéhna aya di bumi, manéhna moal jadi imam, lantaran geus aya jalma séjén nu nyanggakeun pangbakti nurutkeun Torét.
5 Palayanan suci maranéhna téh mangrupa gambaran jeung kalangkang* tina hal-hal nu aya di sorga. Ieu ditémbongkeun dina paréntah Allah ka Musa waktu manéhna dititah nyieun kémah, ”Manéh kudu nyieun sagalana nuturkeun conto nu ditémbongkeun ka manéh di gunung ieu.”
6 Tapi ayeuna, Isa narima tugas palayanan nu leuwih luhur, lantaran manéhna gé jadi perantarana perjangjian nu leuwih hadé, nu dijieun dumasar kana hukum jeung jangji-jangji nu leuwih hadé.
7 Lamun perjangjian nu mimiti taya kakuranganana, geus teu perlu aya perjangjian nu kadua.
8 Tapi, Allah ningali aya kakurangan ti bangsa éta lantaran, ”Ceuk Yéhuwa, ’Bakal aya mangsana, Kuring rék nyieun perjangjian anyar jeung urang Israél sarta urang Yéhuda.’
9 Yéhuwa gé ngomong, ’Éta teu siga perjangjian nu dijieun ku Kuring jeung karuhun maranéhna basa Kuring nungtun maranéhna kaluar ti nagri Mesir. Lantaran maranéhna teu nyekel deui perjangjian Kuring, Kuring teu paduli deui ka maranéhna.’
10 ”’Ieu perjangjian nu rék dijieun ku Kuring jeung urang Israél sanggeus mangsa éta,’ ceuk Yéhuwa, ’Hukum-hukum Kuring rék diteundeun dina pikiran maranéhna, jeung ditulis dina haté maranéhna. Kuring bakal jadi Allah maranéhna, jeung maranéhna bakal jadi umat Kuring.
11 ”’Moal aya deui nu ngajar jalma nu sabangsa jeung manéhna atawa ngajar dulurna pikeun kenal ka Yéhuwa, sabab kabéhanana bakal kenal ka Kuring, ti jalma biasa nepi ka jalma penting.
12 Kasalahan-kasalahan maranéhna ku Kuring bakal dihampura, jeung dosa-dosa maranéhna ku Kuring moal diinget-inget deui.’”
13 Ku sabab Anjeunna nyebutkeun ”perjangjian anyar”, perjangjian nu saacanna téh jadi perjangjian nu heubeul. Sagala nu heubeul jeung beuki kolot sakeudeung deui bakal leungit.
Catetan Tambihan
^ Atawa ”bayangan”.
