Budalan 38:1-31
38 Manéhna nyieun mézbah korban beuleuman tina kai akasia, bangunna pasagi. Panjangna kira-kira 2 méter, lébarna kira-kira 2 méter, jeung jangkungna kira-kira saméter.*
2 Manéhna nyieun tanduk dina opat juru mézbah. Tanduk-tandukna ngahiji jeung mézbah, tuluy mézbahna dilapisan ku tambaga.
3 Geus kitu, manéhna nyieun sakabéh parabot mézbah, nyaéta émbér, singkup, baskom, garpuh, sarta wadah paranti areng ruhay. Kabéhanana dijieun tina tambaga.
4 Manéhna gé nyieun panggangan tina tambaga nu dibentuk kawas jaring. Tuluy éta diteundeun di handapeun biwir mézbah, di bagian tengah mézbah.
5 Manéhna nyieun opat geulang nu dipasang dina opat juruna, deukeut panggangan tina tambaga. Tongkat-tongkat paranti ngagotong bakal diasupkeun kana geulang-geulang éta.
6 Terus manéhna nyieun tongkat-tongkat tina kai akasia tuluy dilapisan ku tambaga.
7 Manéhna ngasupkeun tongkat-tongkat éta kana geulang-geulang nu aya dina dua sisi mézbah, supaya mézbahna bisa digotong. Mézbahna dijieun tina papan-papan, bangun mézbahna pasagi.
8 Terus manéhna nyieun jolang jeung panyanggana tina tambaga. Éta kabéh dijieun tina eunteung-eunteung* para wanita nu ngalalayanan di lawang asup kémah tepangan.
9 Manéhna nyieun kaén keur sakuriling buruan tabernakel. Keur sisi buruan tabernakel nu nyanghareup ka kidul, manéhna nyieun kaén tina benang linén alus nu panjangna 44,5 méter.*
10 Tuluy manéhna nyieun 20 tihang sarta 20 dadampar nu aya liangan tina tambaga. Kakait-kakaitna jeung sambunganana* dijieun tina pérak.
11 Keur sisi kalér gé, panjang kaénna 44,5 méter.* Dua puluh tihang sarta 20 dadampar nu aya liangan dijieun tina tambaga. Ari kakait jeung sambunganana* mah dijieun tina pérak.
12 Keur sisi kulon, panjang kaénna kira-kira 22 méter.* Terus, manéhna nyieun sapuluh tihang jeung sapuluh dadampar nu aya liangan. Kakaitna jeung sambunganana* dijieun tina pérak.
13 Lébar sisi wétan, nyaéta nu nyanghareup ka panonpoé medal, kira-kira 22 méter.*
14 Lawang tabernakel aya di sisi beulah dieu. Di katuhueun lawangna aya kaén nu panjangna kira-kira 7 méter.* Manéhna gé nyieun tilu tihang jeung tilu dadampar nu aya liangan.
15 Di kéncaeun lawang buruan aya kaén nu panjangna kira-kira 7 méter.* Manéhna gé nyieun tilu tihang jeung tilu dadampar nu aya liangan.
16 Sakabéh kaén di sakuriling buruan téh dijieun tina benang linén alus.
17 Sakabéh dadampar nu aya liangan keur tihang-tihang éta dijieun tina tambaga. Ari kakait jeung sambunganana* dijieun tina pérak. Bagian luhur tihang-tihangna dilapisan ku pérak. Terus, aya panyambung tina pérak keur sakabéh tihang nu aya di buruan.
18 Hordéng dina lawang asup buruan ditinun tina benang biru, wol ungu, benang beureum, jeung benang linén alus. Panjangna 8,9 méter, jangkungna kira-kira 2 méter,* sarua kawas jangkung kaén di sakuriling buruan.
19 Opat tihang jeung opat dadampar nu aya liangan dijieun tina tambaga. Kakaitna jeung sambunganana* dijieun tina pérak. Bagian luhur tihang-tihangna dilapisan ku pérak.
20 Sakabéh patok keur tabernakel sarta patok di sakuriling buruan dijieun tina tambaga.
21 Ieu* bahan-bahan nu dipaké pikeun ngabangun tabernakel, nyaéta kémah nu di jerona aya dua papan batu. Musa maréntahkeun urang Léwi pikeun nyieun daptar bahan-bahan ieu. Nu mingpin urang Léwi nyieun daptar éta téh Itamar anakna imam Harun.
22 Bézalél anak Uri incu Hur ti kaom Yéhuda ngalaksanakeun sakabéh nu diparéntahkeun ku Yéhuwa ka Musa.
23 Oholiab anak Ahisamakh ti kaom Dan digawé bareng jeung manéhna. Oholiab téh ahli nyieun rupa-rupa barang, nyulam, sarta ninun ku benang biru, wol ungu, benang beureum, jeung linén alus.
24 Sakabéh emas nu dipaké keur ngabangun tempat suci téh jumlahna sarua jeung emas anu jadi pangbakti nu diayun-ayunkeun, nyaéta 1.000 kilo* nurutkeun patokan beurat di tempat suci.
25 Pérak nu dibawa ku jalma-jalma nu didaptar téh jumlahna 3.440 kilo* nurutkeun patokan beurat di tempat suci.
26 Unggal lalaki nu didaptar nu umurna 20 taun ka luhur méré 5,7 gram* pérak nurutkeun patokan beurat di tempat suci. Jumlah maranéhna téh 603.550 urang.
27 Jumlah pérak nu dipaké keur nyieun dadampar nu aya liangan paranti rangka tabernakel jeung pilar-pilar hordéng téh 3.420 kilo.* Saratus dadampar dijieun tina 3.420 kilo, hiji dadamparna 34,2 kilo.*
28 Nu 20 kilona* deui dipaké keur nyieun kakait-kakait pilar sarta ngalapisan bagian luhur pilar-pilar éta. Tuluy, éta disambung-sambungkeun ku manéhna.
29 Tambaga nu disumbangkeun* téh jumlahna 2.420* kilo.
30 Tambagana dipaké keur nyieun dadampar nu aya liangan di lawang asup kémah tepangan, mézbah tambaga jeung pangganganana, kabéh parabot mézbah,
31 dadampar nu aya liangan keur tihang-tihang di sakuriling buruan, dadampar nu aya liangan keur lawang asup buruan, jeung sakabéh patok keur tabernakel sarta patok di buruan.
Catetan Tambihan
^ As. ”Panjangna 5 hasta, lébarna 5 hasta, jeung jangkungna 3 hasta”. Tingali Lamp. B14.
^ Nyaéta eunteung tina logam nu digosok nepi ka hérang.
^ As. ”100 hasta”. Tingali Lamp. B14.
^ Atawa ”geulangna”.
^ As. ”100 hasta”. Tingali Lamp. B14.
^ Atawa ”geulangna”.
^ As. ”panjang kaénna 50 hasta”. Tingali Lamp. B14.
^ Atawa ”geulangna”.
^ As. ”50 hasta”. Tingali Lamp. B14.
^ As. ”panjangna 15 hasta”. Tingali Lamp. B14.
^ As. ”panjangna 15 hasta”. Tingali Lamp. B14.
^ Atawa ”geulangna”.
^ As. ”Panjangna 20 hasta, jangkungna 5 hasta”. Tingali Lamp. B14.
^ Atawa ”geulangna”.
^ Maksudna, ayat 24-31.
^ As. ”nyaéta 29 talénta jeung 730 syékel”. Tingali Lamp. B14.
^ As. ”100 talénta jeung 1.775 syékel”. Tingali Lamp. B14.
^ As. ”1/2 syékel”. Tingali Lamp. B14.
^ As. ”100 talénta”. Tingali Lamp. B14.
^ As. ”satalénta”. Tingali Lamp. B14.
^ As. ”Nu 1.775 syékelna”. Tingali Lamp. B14.
^ Atawa ”nu jadi pangbakti nu diayun-ayunkeun.”
^ As. ”70 talénta jeung 2.400 syékel”. Tingali Lamp. B14.
