Yésaya 3:1-26
3 Tingali! Gusti nu sajati, Yéhuwa, pangawasa pasukan sorga,Bakal nyingkirkeun ti Yérusalém jeung Yéhuda sagala bantuan nu aya,Nyaéta kadaharan jeung cai,
2 Pahlawan jeung prajurit,Hakim jeung nabi, tukang ramal jeung kokolot,
3 Panglima nu ngapalaan 50 urang, pajabat, jeung jurunaséhat,Ahli élmu gaib jeung tukang jampé.
4 Barudak leutik ku Allah bakal dijadikeun pamingpin maranéhna,Sarta jalma nu bingbang* bakal maréntah maranéhna.
5 Jalma-jalma bakal silih gencét,Unggal jalma bakal ngagencét sasamana.
Nu ngora bakal nyerang nu kolot,Jalma nu disapirakeun bakal ngarendahkeun jalma nu dihormat.
6 Unggal jalma bakal nyekel leungeun dulurna nu aya di imah bapana bari ngomong kieu,
”Manéh boga jubah, sok manéh wéh nu jadi pamingpin urang.
Urus ieu ruruntuhan.”
7 Tapi ceuk dulurna dina poé éta kénéh,
”Kuring embung ngubaran raheut maranéh,Di imah kuring téh euweuh dahareun, euweuh pakéan.
Nu dijadikeun pamingpin ieu bangsa mah ulah kuring.”
8 Yérusalém geus tigubrag,Yéhuda geus rubuh,Lantaran omongan jeung kalakuanana téh ngalawan Yéhuwa.Maranéhna barontak di hareupeun Allah nu mulya.
9 Beungeut maranéhna nyirikeun kajahatanana.Maranéhna nguar-nguar dosana kawas penduduk Sodom,Dosana geus teu disumput-sumput.
Cilaka maranéhna, sabab maranéhna bakal katarajang musibat ku lantaran kalakuanana sorangan.
10 Béjaan jalma bener yén maranéhna bakal narima kahadéan.Sagala usaha maranéhna bakal diberkahan.*
11 Cilaka jalma jahat!
Manéhna bakal katarajang ku musibat,Lalampahanana ka batur bakal malik ka manéhna sorangan!
12 Bangsa kuring ditindes ku para mandornaSarta dikawasaan ku awéwé-awéwé.
Hé bangsa kuring, maranéh téh dibawa sasar ku para pamingpin,Nepi ka teu nyaraho kudu ka jalan nu mana.
13 Yéhuwa geus siap muka perkara,Anjeunna ngadeg pikeun ngucapkeun putusan keur bangsa-bangsa.
14 Yéhuwa bakal ngahakiman para kokolot jeung para pamingpin umat-Na.
Saur Anjeunna, ”Maranéh ngaduruk kebon anggur.Di imah maranéh aya barang-barang meunang maok ti nu mariskin.”
15 Yéhuwa, pangawasa pasukan sorga, Gusti Nu Maha Agung, nyarios kieu,”Wawanianan maranéh ngagencét umat Kuring sarta kacida nindesna ka nu balangsak!”
16 Yéhuwa nyarios, ”Awéwé-awéwé Zion téh garumedé,Leumpangna mani darangah,Bari gular-giler maén mata, ngaléngkahna randak-reundeuk,Ngarah geulang-geulang dina sukuna tingkirincing.
17 Awéwé-awéwé Zion ku Yéhuwa sirahna rék dijieun borok,Sarta sirahna ku Yéhuwa rék disina gundul.
18 Dina waktu éta, Yéhuwa bakal ngarampas perhiasan maranéhna,Nyaéta perhiasan dina suku, bando, perhiasan nu bangunna bulan sapasi,*
19 Anting, geulang, tiung,
20 Tutup sirah, geulang suku, sabuk,Wadah minyak seungit, jimat,*
21 Cingcin, anting irung,
22 Baju pésta, baju luar, jubah, kantong leutik,
23 Eunteung leutik, baju linén,*Sorban jeung tiung.
24 Seungit minyak balsem bakal diganti ku bau bangké,Sabuk diganti ku tali,Modél buuk nu alus jadi gundul,Baju nu méwah diganti ku kaén goni,Sarta kageulisan diganti ku tapak raheut.
25 Lalaki-lalaki manéh bakal tiwas ku pedang,Prajurit-prajurit manéh bakal tiwas di pangperangan.
26 Lawang-lawang Zion bakal careurik tingharegung.Éta kota bakal kawas awéwé nu diuk dina taneuh.”
Catetan Tambihan
^ Atawa ”teu boga pamadegan”.
^ As. ”Maranéhna bakal ngadahar hasil pagawéanana”.
^ Atawa ”bulan sabit”.
^ Atawa ”jimat kerang”.
^ Atawa ”pakéan jero”.
