Yésaya 24:1-23
24 Tempo! Yéhuwa ngosongkeun éta nagri* nepi ka jadi kalantar.
Éta nagri diburak-barik, pendudukna sina paburisat.
2 Kabéh jalma kaayaanana bakal sarua,
Rahayat jeung imam,Palayan lalaki jeung juraganana,Palayan awéwé jeung dununganana,Nu meuli jeung nu ngajual,Nu nginjeumkeun jeung nu nginjeum,Nu ngahutangkeun jeung nu boga hutang.
3 Éta nagri bakal kosong pisan,Sagalana bakal dijarah,Sabab Yéhuwa geus ngucapkeun kitu.
4 Éta nagri bakal sungkawa* jeung bakal ancur.
Tanah nu tadina subur bakal garing, moal ngahasilkeun nanaon.
Para pajabat di éta nagri bakal nguyung.
5 Éta nagri jadi najis ku lantaran pendudukna,Sabab maranéhna geus ngalanggar hukum,Ngarobah aturan,Jeung ingkar tina perjangjian nu langgeng.*
6 Nu matak, éta nagri dikutuk nepi ka ancur,Sarta pendudukna dianggap salah.
Éta sababna pendudukna ngurangan,Sésana kari saeutik.
7 Cianggur anyar saat, tangkal anggur garing.Kabéh jalma nu tadina gumbira ayeuna nguluwut.
8 Sora rabana nu nyukakeun haté geus leungit.Surakna jalma nu suka-suka geus eureun.Sora harpa nu nyenangkeun haté geus leungit.
9 Maranéhna ngarinum cianggur, tapi teu bari kakawihan.Inuman keras karasana teu ngeunah ku nu nginumna.
10 Kota nu kalantar téh geus runtuh.Kabéh imah ditutup supaya euweuh nu bisa asup.
11 Jalma-jalma tinggarero di jalan ménta cianggur.
Kabungah geus leungit ti dinya,Kabagjaan geus leungit ti éta nagri.
12 Éta kota diculkeun, tuluy jadi ruruntuhan.Gerbangna ancur jadi tumpukan barangkal.
13 Kieu pijadieunana éta nagri di antara bangsa-bangsa séjén:
Éta bakal kawas tangkal zaitun nu dioyag-oyag pikeun dipanén,Kawas sésa buah anggur waktu usum* panén enggeusan.
14 Jalma-jalma bakal susurakan,Maranéhna bakal sarurak gumbira.
Ti kulon,* maranéhna bakal nguarkeun kaagungan Yéhuwa.
15 Ti wétan,* maranéhna bakal ngamulyakeun Yéhuwa.Ti pulo-pulo di laut, maranéhna bakal ngamulyakeun nami Yéhuwa Allah Israél.
16 Ti tungtung-tungtung bumi, kadéngé ieu lagu:
”Mugia Allah nu adil dimulyakeun!”
Tapi ceuk abdi, ”Abdi nalangsa, abdi nalangsa!
Cilaka abdi téh! Tukang hianat ngahianat.Maranéhna licik jeung pinuh ku tipu daya.”
17 Hé penduduk nagri, maranéh didago-dago ku kasieun, ku lombang, jeung ku jiret.
18 Nu kabur nyingkiran sora pikasieuneun bakal tigebrus ka jero lombang,Nu bisa hanjat ti jero lombang bakal karingkus ku jiret.
Panto-panto cai di langit bakal dibuka,Éta nagri bakal eundeur.
19 Éta nagri beulah.Éta nagri oyag-oyagan.Éta nagri inggeung.
20 Éta nagri galuang-galéong kawas jalma mabok,Endag-endagan kawas saung katebak ku angin.
Éta nagri ngarempeyek, beurateun ku dosa-dosana,Tuluy andiprek, moal cengkat-cengkat deui.
21 Dina waktu éta, Yéhuwa bakal ngahukum pasukan nu aya di sorgaJeung raja-raja nu aya di bumi.
22 Maranéhna bakal dikumpulkeunKawas tawanan nu dikumpulkeun dina hiji lombang.Maranéhna bakal dikerem di panjara jero taneuh.Sanggeus sababaraha lila, maranéhna bakal diadilan.
23 Yéhuwa, pangawasa pasukan sorga, geus jadi Raja di Gunung Zion jeung di Yérusalém.Kamulyaana-Na bakal katémbong hareupeun para kokolot umat-Na.Ku kituna, bulan purnama bakal katingali poék,Panonpoé nu ngempray bakal katingali surem.
Catetan Tambihan
^ Katingalina ngamaksudkeun Yéhuda jeung Yérusalém.
^ Atawa bisa jadi ”garing”.
^ Atawa ”perjangjian di jaman baheula”.
^ Atawa ”usim”.
^ Atawa ”Ti laut”.
^ Atawa ”Ti wilayah caang”.
