2 Samuél 10:1-19
-
Daud ngéléhkeun Ammon jeung Siria (1-19)
10 Ka dieunakeun, raja urang Ammon maot, tuluy manéhna digantikeun ku Hanun anakna.
2 Ceuk Daud, ”Kuring rék nunjukkeun kahadéan* ka Hanun anak Nahas, lantaran bapana gé geus hadé* ka kuring.” Jadi, Daud ngutus para palayanna pikeun ngucapkeun milu sungkawa ka Hanun nu kakara ditinggal maot ku bapana. Tapi barang para utusan Daud nepi di nagri urang Ammon,
3 para pamingpin urang Ammon ngomong ka Hanun rajana, ”Saur Juragan, enya kitu Daud ngutus para palayanna ka Juragan téh lantaran ngahormat bapa Juragan? Lainna maranéhna diutus téh sina jadi mata-mata nu mariksa kaayaan kota ieu supaya urang ditalukkeun?”
4 Jadi Hanun néwak para palayan Daud. Janggot maranéhna dikurudan sabeulah, pakéanana diteukteuk nepi ka sacangkéng, tuluy dititah indit.
5 Waktu Daud dibéjaan, manéhna langsung ngirim utusan sina manggihan maranéhna, lantaran maranéhna téh geus bener-bener dihina. Raja ngirim pesen, ”Sok cicing heula wéh di Yérikho nepi ka janggot maranéh jaradi deui, geus kitu kakara balik.”
6 Karasaeun ku urang Ammon yén Daud téh geuleuheun ka maranéhna. Jadi, urang Ammon ngirim utusan pikeun nyéwa prajurit Siria ti Bét-réhob jeung prajurit Siria ti Zoba, jumlahna aya 20.000 prajurit nu leumpang. Maranéhna gé nyéwa raja Maaka jeung 1.000 prajuritna, sarta 12.000 prajurit ti Istob.*
7 Ngadéngé kitu, Daud ngutus Yoab jeung sakabéh pasukanna, kaasup para prajurit nu panghébatna.
8 Urang Ammon kalaluar ti kota sarta nyieun barisan tempur di deukeut gerbang kota. Ari urang Siria ti Zoba jeung ti Réhob aya di tegalan, bareng jeung urang Istob* sarta urang Maaka.
9 Waktu Yoab ningali manéhna rék diserang ti hareup jeung ti tukang, manéhna milih sabagian prajurit Israél nu panghébatna tuluy nyieun barisan tempur sina ngalawan urang Siria.
10 Sésana dipercayakeun ka Abisyai lanceukna, supaya Abisyai bisa nyieun barisan tempur pikeun ngalawan urang Ammon.
11 Seug Yoab ngomong, ”Lamun urang kadesek ku urang Siria, gancang tulungan urang. Tapi lamun manéh kadesek ku urang Ammon, urang bakal nulungan manéh.
12 Urang kabéh kudu kuat jeung wani demi bangsa urang jeung demi kota-kota Allah urang. Yéhuwa bakal ngalakukeun bagiana-Na.”
13 Yoab jeung pasukanna maju nyerang urang Siria, terus urang Siria kalabur.
14 Barang ningali urang Siria kalabur, urang Ammon gé kalabur ti Abisyai, tuluy arasup ka kota. Sanggeus merangan urang Ammon, Yoab balik ka Yérusalém.
15 Urang Siria sadar geus diéléhkeun ku urang Israél, jadi maranéhna ngumpulkeun deui pasukanna.
16 Hadadézér ngadatangkeun urang Siria anu aya di daérah Walungan Éfrat. Maranéhna daratang ka Hélam, dipingpin ku Syobakh panglima tentarana Hadadézér.
17 Waktu éta dilaporkeun ka Daud, manéhna gancang ngumpulkeun sakabéh pasukan Israél, meuntasan Walungan Yordan, tuluy datang ka Hélam. Di dinya, urang Siria nyieun barisan tempur tuluy merangan Daud.
18 Tapi urang Siria kalabur ti urang Israél. Daud maéhan 700 prajurit nu numpak karéta jeung 40.000 prajurit nu numpak kuda. Daud gé maéhan Syobakh panglima maranéhna.
19 Waktu sakabéh raja bawahan Hadadézér sadar maranéhna geus diéléhkeun ku Israél, maranéhna langsung nyerah jeung taluk ka Israél. Urang Siria gé teu wani deui mantuan urang Ammon.
Catetan Tambihan
^ Atawa ”asih nu satia”.
^ Atawa ”nunjukkeun asih nu satia”.
^ Atawa ”urang Tob”.
^ Atawa ”urang Tob”.
