Saha nu sakuduna ngajar budak ngeunaan séks? Ceuk Alkitab, éta téh tanggung jawab kolotna. Loba kolot meunang mangpaat tina saran-saran di hadap ieu:

•   Ulah éra-éra. Alkitab ngajelaskeun ngeunaan séks jeung aorat. Allah ngomong ka bangsa Israil yén ”barudak” gé kudu diajar ngeunaan hal ieu. (Pamindo 31:12; Imamat 15:​2, 16-​19) Sadérék bisa maké kekecapan nu alus pikeun ngajelaskeun yén aorat téh lain hal anu ngérakeun.

•   Ngajarna diluyukeun jeung kaayaan budak. Sanggeus budak puber, ulah ngajarkeun kabéh hal sakaligus ngeunaan séks. Tapi ajarkeun saeutik-saeutik, luyu jeung nu dipikaharti ku budak.​—1 Korinta 13:11.

•   Ajarkeun ahlak nu bener. Bisa jadi, budak diajarkeun ngeunaan séks di sakola. Tapi, Alkitab ngajurung kolot pikeun teu ngan saukur ngajarkeun naon organ-organ séks téh, tapi ogé ngajarkeun supaya budak boga cara pandang jeung sikep nu pantes ngeunaan séks.​—Siloka 5:​1-​23.

•   Déngékeun budak Sadérék. Lamun budak Sadérék nanya ngeunaan séks, ulah kaleuleuwihi jeung buru-buru nyieun kasimpulan. Sabalikna, ”sing lambat kana nyarita, jeung ulah gancang ambek.”—Yakobus 1:19.

Cara nyalindungan budak Sadérék ti jelema cabul

•   Téangan informasi. Téangan informasi naon nu biasana dilakukeun ku jelema cabul.—Siloka 18:15; tingali pasal 32 tina buku Pertanyaan Kaum Muda—Jawaban yang Praktis, Jilid 1.

•   Perhatikeun budak Sadérék. Mun aya jalma nu ngasuh budak Sadérék, pastikeun manéhna téh bisa dipercaya. Budak ogé ulah ”diantep sakarepna”.​—Siloka 29:15.

•   Ajarkeun kataatan nu saimbang. Budak kudu diajar supaya taat ka kolot. (Kolosa 3:20) Tapi, ulah ngajar budak supaya terus taat ka kabéh jelema déwasa, sabab manéhna bisa jadi sasaran jelema cabul. Kolot Kristen bisa mapatahan budakna kieu, ”Ulah daék lamun aya nu ménta manéh ngalakukeun hal nu dilarang ku Allah.”—Rasul 5:29.

•   Latih cara-cara pikeun nyalindungan diri. Ajarkeun budak Sadérék naon nu kudu dilakukeun lamun aya jalma nu rék ngalakukeun hal cabul ka manéhna waktu Sadérék teu aya. Ayakeun pintonan singget supaya budak Sadérék bisa wani ngomong, ”Ulah kitu! Engké urang béjakeun!”, tuluy buru-buru indit. Bisa jadi budak Sadérék téh babari poho, jadi kudu sering diingetkeun.​—Pamindo 6:7.