Aya sababaraha budak ngora anu embung nuturkeun aturan ti kolotna. Meureun maranéhna ngabohong, cicing-cicing kaluar ti imah supaya bisa ulin jeung babaturanana, jeung balik leuwih peuting ti jam nu geus ditangtukeun. Sadérék kudu kumaha lamun budak Sadérék hésé dipercaya?

•  Budak abdi téh tukang ngalawan kitu?

•  Abdi kudu kumaha mun budak abdi osok ngabohong?

•  Saha nu salah?

•  Carana ngabantu budak supaya bisa dipercaya deui

•  Ceuk para kolot séjénna

 Can tangtu. Kitab Suci nyebutkeun, ”Barudak ngora téh sok ngalakukeun hal nu bodo.” (Siloka 22:15, Terjemahan Dunia Baru) Kalolobaan budak ngora mémang siga kitu. Dr. Laurence Steinberg nulis, ’Barudak ngora sok buru-buru nyieun putusan, terus hasilna goréng. Jadi teu héran mun maranéhna nyieun kasalahan.’ a

 Ulah langsung nganggap yén budak Sadérék téh ngahaja ngalawan Sadérék. Hasil risét nunjukkeun yén sabenerna barudak ngora téh nganggap penting pandangan kolotna ngeunaan maranéhna, sanajan katingalina mah teu siga kitu. Budak Sadérék meureun kuciwa ka dirina sorangan jeung ngarasa sedih lantaran geus nguciwakeun Sadérék.

•    Salah lingkunganana? Ceuk Alkitab, ”Pergaulan nu goréng ngaruksak kabiasaan nu hadé.” (1 Korintus 15:33) Enya, barudak ngora téh gampang kapangaruhan ku babaturanana. Salian ti éta, maranéhna gé gampang kapangaruhan ku média sosial jeung iklan. Biasana barudak ngora can boga loba pangalaman, jadi teu héran mun maranéhna nyieun putusan anu salah. Sanajan kitu, maranéhna kudu diajar pikeun tanggung jawab kana putusanana supaya maranéhna jadi jalma nu déwasa.

•    Salahna abdi kitu? Sadérék meureun mikir yén barudak osok ngalawan téh lantaran Sadérék méré loba teuing aturan. Atawa, barudak jadi bébas teuing téh lantaran Sadérék teu tegas. Tibatan teterusan mikirkeun hal éta, mending Sadérék mikirkeun carana ngabantu budak Sadérék.

•   Ulah ambek-ambekan. Budak Sadérék meureun nyangka yén manéhna bakal dicarékan. Tibatan ambek-ambekan, Sadérék bisa nyobaan cara séjén. Pék ngobrol sing tenang jeung budak ngeunaan masalahna. Ku naon manéhna nyieun salah téh? Lantaran panasaran? Bosen? Ngarasa sorangan? Atawa butuh babaturan? Mémang, éta kabéh téh teu bisa dijadikeun alesan pikeun teu nurut. Tapi lamun geus diobrolkeun, Sadérék jeung budak Sadérék jadi leuwih paham naon sababna budak Sadérék ngalakukeunana.

   Naséhat Kitab Suci: ”Kudu gancang ngadéngé, ulah gancang ngomong, jeung ulah gancang ambek.”​—Yakobus 1:19.

•   Bantu budak Sadérék diajar tina kasalahanana. Sadérék bisa nanya ka budak Sadérék: Hidep diajar naon tina kajadian ieu? Mun aya deui kajadian anu siga kieu, hidep bakal kumaha? Pananya-pananya siga kitu bisa ngabantu budak Sadérék sangkan manéhna bisa nyieun putusan anu bener.

   Naséhat Kitab Suci: ”Béré tegoran, pépéling, jeung naséhat, tapi kudu sabar jeung maké cara ngajar nu alus.”​—2 Timotius 4:2.

•   Béré hukuman. Hukuman nu cocog téh nyaéta nu aya hubunganana jeung kasalahanana. Contona, mun budak Sadérék maké motor tapi teu bébéja heula ka Sadérék, Sadérék bisa ngalarang manéhna maké motor pikeun sababaraha waktu.

   Naséhat Kitab Suci: ”Naon nu dipelak, éta ogé nu bakal kaala.”​—Galatia 6:7.

•   Yakinkeun budak Sadérék yén manéhna bisa dipercaya deui. Mémang butuh waktu supaya budak bisa Sadérék dipercaya deui. Tapi, Sadérék kudu terus ngayakinkeun manéhna yén lila-lila manéhna bisa dipercaya deui. Lamun budak Sadérék ngarasa manéhna moal bakal dipercaya deui ku Sadérék, manéhna bisa jadi nyerah.

   Naséhat Kitab Suci: ”Ulah ngalantarankeun barudak jadi keuheul, bisi maranéhna jadi leutik haté.”​—Kolose 3:21.