Ka selemo sa 1990 ho ea ho sa 2015, palo ea batho ba lilemo tse ka holimo ho 49 ba hlalanang e ile ea imena habeli United States, ha e le ea batho ba lilemo tse ka holimo ho 65 eona e ile ea imena hararo. Ke eng e etsang hore batho ba nang le lilemo tse ngata ba nyalane ba hlalane? Uena u ka etsa’ng hore lenyalo la hao le atlehe?

Seo re tl’o ithuta sona sehloohong sena

•  Ke eng e etsang hore batho ba nang le lilemo tse ngata ba nyalane ba hlalane?

•  Seo u ka se etsang e le hore lenyalo la hao le atlehe

•  Lipotso tse ka le tataisang

•    Hangata lebaka le etsang hore batho ba nang le nako e telele ba nyalane ba hlalane ke hobane lerato la bona le ile la ’na la fokotseha hanyane hanyane. Ha nako e ntse e e-ea banyalani ba qalella ho rata lintho tse fapaneng ’me sena se ka etsa hore ho be le lintho tse fokolang tseo ba thabelang ho li etsa ’moho. Ka linako tse ling ha bana ba se ba holile ba lula mahabona, banyalani ba ka hlokomela hore ba ne ba phathahane ba holisa bana empa ba se ba sa ratane joaloka banyalani.

•    Lilemong tsa morao tjena batho ba nkoang e le litsebi tsa lenyalo ba re banyalani ba lokela ho icheba bobona. Ba etsa hore batho ba ipotse lipotso tse kang: ‘Na ke thabile lenyalong lee?’ ‘Na ho na le ntho e molemo eo ke e fumanang lenyalong lee?’ ‘Na molekane oa ka o nkhotsofatsa maikutlong joalokaha e le tokelo ea ka?’ Ba re haeba e ’ngoe ea likarabo tsa lipotso tsena e le che, u lokela ho batla se molemo bakeng sa hao ka hore u hlale molekane oa hao ’me u qale bophelo bo bocha.

•   Hona joale batho ha ba sa nka ho hlalana e le ntho e mpe. Eric Klinenberg, eo e leng setsebi tseleng eo batho ba etsang lintho ka eona o re: “Lilemong tse ’maloa tse fetileng ha motho a ne a sa thaba lenyalong la hae o ne a lokela ho fana ka mabaka a utloahalang a ho batla ho hlala molekane oa hae. Leha ho le joalo, mehleng ena ho fapane hobane batho ba bangata ba lumela hore ntho ea bohlokoa bophelong ke hore motho e mong le e mong a etse ntho e mo tsoelang molemo, a ikhotsofatse.” a

 Le hoja ho ka bonahala eka tlhalo e felisa mathata empa ’nete ke hore e baka mathata a mang a macha. Ka mohlala, phuputso e ’ngoe e ileng ea etsoa e bontša hore ho hlalana ha batho ba nang le nako e telele ba nyalane ho baka mathata a lichelete, haholo-holo ho batho ba bo-’mè.

 Mohlomong u ka nahana ka sena. Buka ea Don’t Divorce e re: “Le haeba u ka iqalla bophelo bo bocha empa u ntse u le motho ea tšoanang. U entse’ng e le hore u fetole tsela eo u buisanang le batho ka eona ho akarelletsa le molekane oa hao? Ke eng eo u e entseng ho fetola tsela eo u neng u itšoara ka eona ha u na le liqabang le molekane oa hao?” b

•   Amohela taba ea hore lintho li tla fetoha lenyalong la hao. U se ke oa lebella hore lintho li tla lula li tšoana lenyalong la hao. Kamano ea hao le molekane oa hao e ka ’na eaba e fetotsoe ke taba ea hore bana ha ba sa lula hae kapa mohlomong hobane le se le sa rate lintho tse tšoanang. Ho e-na le ho lula u nahana kamoo lintho li neng li le kateng pele, nahana kamoo u ka ntlafatsang lenyalo la hao hona joale.

   Molao-motheo oa Bibele o ka u thusang: “U se ke oa re: ‘Matsatsi a khale a ne a le molemo ho feta ana.’ Ha se bohlale hore u bue joalo.”—Moeklesia 7:10.

•   Loanelang hore lerato la lona le lule le le matla. Na u ka rata ho ithuta ntho e ’ngoe eo mohatsa oa hao a e thahasellang kapa na u ka thusa molekane oa hao hore a rate ntho eo u seng u e thahasella? Na le ka ithuta ho etsa ntho eo bobeli ba lona le e thabelang ’me le e etse ’moho? Sepheo sa lona e lokela ho ba ho qeta nako hammoho e le hore molekane oa hao a utloe hore le banyalani eseng batho feela ba lulang hammoho.

   Molao-motheo oa Bibele o ka u thusang: “Lulang le etsa lintho tse tla tsoela ba bang molemo eseng tse tla tsoela lona feela molemo.”—1 Bakorinthe 10:24.

•   Tsoela pele u hlompha molekane oa hao. U se ke oa khaotsa ho bontša mosa hobane feela le se le e-na le nako e telele le nyalane. Bua le molekane oa hao ka tsela e bontšang hore oa mo hlompha feela joalokaha le ne le le leferehong. Sebelisa mantsoe a kang “kea kopa” le “kea leboha.” Itloaetse ho bontša molekane oa hao hore oa mo rata le ho ananela lintho tseo a u etsetsang tsona.

   Molao-motheo oa Bibele o ka u thusang: “Le bontšane mosa, le be le qenehelo.”—Baefese 4:32.

•   Nahana ka linako tse monate tseo le bileng le tsona. Shebang linepe tsa lona tsa lenyalo kapa tsa liketsahalo tse monate tseo le bileng ho tsona ’me le lule le ratana. Ho etsa joalo ho tla le thusa hore le lule le ratana le ho hlomphana joaloka pele.

   Molao-motheo oa Bibele o ka u thusang: “E mong le e mong oa lona o lokela ho rata mosali oa hae joalokaha a ithata. Mosali le eena o lokela ho hlompha monna oa hae haholo.”—Baefese 5:33 .