Ka mor’a ho qeta likhoeli tse hlano li ithuta ka matla, liithuti tse 48 li ile tsa fumana mangolo Sekolong sa Bibele sa Gileade sa Watchtower se setsing sa thuto sa Lipaki Tsa Jehova, Patterson, New York. Lenaneong lena la kabo ea mangolo, ho ne ho e-na le batho ba 9 694, ba akarelletsang ba malapa a liithuti, metsoalle hammoho le batho ba bang ba tl’o li khothatsa.

Ho tloha ka 1943, baboleli ba fetang 8 000 ba nang le phihlelo, ba ’nile ba koetlisetsoa tšebeletso ea borumuoa. Thupelo ena eo ho eona ho sebelisoang Bibele e le buka e ka sehloohong, e matlafatsa tumelo ea liithuti le ho li thusa hore li be le litšobotsi tsa moea tse tla li thusa ho tobana le mathata a fapaneng mosebetsing oa tsona oa borumuoa.

“Nahana ka Hloko ka Lintho Tse Ratehang.” Anthony Morris, e leng setho sa Sehlopha se Busang sa Lipaki Tsa Jehova, e bile e le molula-setulo oa lenaneo leo, o ile a theha selelekela sa hae lengolong la Bafilipi 4:8 le reng: “Lintho life kapa life tse ratehang, . . . le tsoele pele ho nahana ka lintho tsena.”

Mor’abo rōna Morris o ile a hlalosa hore ho nahana ka lintho tse ratehang ho ka re thusa hore re be le boikutlo bo nepahetseng lefatšeng lena le sa rateheng. O ile a re: “Lekang ho fumana lintho tse ratehang tseo le ka nahanang ka tsona, ’me le bontše litšobotsi tse ratehang.”

Ka mohlala, Ntate oa rōna oa leholimo o re behela mohlala o motle ka ho se tsepamise maikutlo liphosong tsa rōna. (Pesaleme ea 130:3) Mor’abo rōna Morris o ile a phehella liithuti a re: “Le se ke la tsepamisa maikutlo liphosong tsa bara le baralib’abo lōna, bontšang litšobotsi tse ratehang.”

“Fumana Tsebo—Empa U se ke Ua ba Bohlale ka ho Fetisa.” Harold Corkern, e leng setho sa Komiti ea Lekala la United States, o ile a beha puo eo sehlooho sa eona se thehiloeng lengolong la Moeklesia 7:16. Molimo o batla hore re sebelise tsebo eo re nang le eona ka tsela e nepahetseng eseng e etse hore re ikhohomosetse batho ba bang.

Mor’abo rōna Corkern, o ile a boela a re re lokela ho bontša lerato ha re eletsa ba bang kapa re ba khalemela. Ha rea lokela ho lebella hore batho ba bang ba etse lintho tse fetang tseo Molimo a li lebeletseng ho bona. Mor’abo rōna Corkern o ile a phehella liithuti a re: “Sebelisang bohlale ba lōna, tsebo le kutloisiso ka tsela e nepahetseng, ’me barab’abo lōna ba tla thabela ho ba le lōna.”

‘Le se ke la Lebala Liketso Tsa Molimo.’ (Pesaleme ea 78:7) Guy Pierce oa Sehlopha se Busang o ile a qala puo ea hae ka ho hlalosa hore ngoana, ebang o itšoere hantle kapa hampe—o bontša hore na batsoali ba hae ke batho ba mofuta ofe. (Liproverbia 20:11) Ka ho tšoanang, liketso tsa rōna li bonahatsa botho ba Ntate oa rōna oa leholimo. “Bana ba Molimo le bana ba Diabolose ba totobala ka ’nete ena: E mong le e mong ea sa tsoeleng pele ho etsa ho loka ha a simolohe ho Molimo.”—1 Johanne 3:10.

Mor’abo rōna Pierce o ile a re liithuti li menngoe Sekolong sa Gileade hobane li e-na le litšobotsi tse ntle tsa Bokreste, tse akarelletsang boikokobetso. O ile a hopotsa liithuti hore li lule li ikokobelitse. Thuto eo li e fumaneng, ha e etse hore li be betere ho feta batho ba bang. Ho e-na le hoo, li hlomeletsoe hore li tlatsetse bonngoeng ba bara ba motho ba lefatšeng lohle le hore li behe mohlala oa boikokobetso. (Pesaleme ea 133:1) Mor’abo rōna Pierce o ile a re: “Le se le utloisisa Bibele haholoanyane, ’me le ka sebelisa tsebo ena hore le lule le e-na le kamano e haufi le Jehova Molimo.”

“Seo re se Entseng ke Seo re Neng re Tšoanela Hore Ebe re se Entse.” William Samuelson, e leng molebeli oa Lefapha la Likolo Tsa Puso ea Molimo, o ile a re: “Na re tla amohela mosebetsi oo Jehova a re abelang oona, esita leha re sa o rate?” Re ka ithuta mantsoeng a ho Luka 17:7-10 a reng: “Ha le entse lintho tsohle tseo le li abetsoeng, le re, ‘Re makhoba a se nang molemo. Seo re se entseng ke seo re neng re tšoanela hore ebe re se entse.’” Ha re bapisoa le Mong’a rōna, Jehova, ka sebele “ha re na molemo.”

Liithuti li ile tsa qeta libeke li ithutela ka tlelaseng. E ka ’na eaba ba bang ba ile ba thatafalloa ke seo. Mor’abo rōna Samuelson o ile a re: “Empa le entse seo le neng le tšoanela hore ebe le se entse, ’me joale le tla bona kamoo le tla rua molemo kateng le ho ba le tumelo e eketsehileng.” Mor’abo rōna Samuelson o ile a phetha ka ho re: “Kaha le bahlanka ba tšeptjoang, e se eka le ka lula le ananela tlotla ea ho sebeletsa Mong’a bokahohle.”

“Hopolang Litšepiso Tsa Jehova ha le Tobana le Mathata.” Sam Roberson, e leng mothusi oa molebeli oa Lefapha la Likolo Tsa Puso ea Molimo, o ile a lemosa liithuti hore ka nako e ’ngoe li tla nyahama. Kahoo, o ile a khothalletsa liithuti hore li hopole batho ba bangata ba hlahang ka Bibeleng bao Molimo a ileng a ba khothatsa. Ka mohlala, Moshe o ile a tiisetsa Joshua a re: “Jehova . . . a ke ke a u lahla kapa a u tlohela ka ho feletseng.” (Deuteronoma 31:8) Qetellong ea bophelo ba hae, Joshua o ne a ka re: “Ha ho lentsoe leha le le leng mantsoeng ’ohle a molemo ao Jehova Molimo oa lōna a le boleletseng ’ona le hlōlehileng ho phethahala.”—Joshua 23:14.

Jehova Molimo o tšepisa bahlanka ba hae: “Ho hang nke ke ka u tlohela kapa ka u furalla.” (Baheberu 13:5) O re tiisetsa hore o tla phelela seo lebitso la hae Jehova le se bolelang (“O Etsa Hore ho be”), ’me o tla ba ntho e ’ngoe le e ’ngoe e le hore a hlokomele bahlanka ba hae. Mor’abo rōna Roberson o ile a phehella liithuti: “Le se ke la tela le ka mohla. Le ka mohla, le se ke le khaotsa ho sebeletsa Jehova. Le ka mohla le se ke la nyahama. Hopolang hore a ke ke a le soetsa le ka mohla.”

“Molumo oa Bona o Ile oa Kena Lefatšeng Lohle.” (Baroma 10:18) Mark Noumair e leng e mong oa barupeli ba Gileade o ile a tataisa liithuti tse tsoang linaheng tse fapaneng ha li pheta liphihlelo le ha li bontša lintho tse li etsahaletseng tšimong e tikolohong ea Patterson. Ka mohlala, banyalani ba bang ba tsoang Afrika Boroa ba ile ba thaba haholo ho kopana le basali ba bararo ba tsoang naheng ea habo bona le ho buisana le bona ka Sezulu le Sexhosa. Athe banyalani ba bang ba tsoang Sri Lanka, ba ile ba kopana le monna e mong oa Moindia eo mosali oa hae le morali oa hae ba lulang Sri Lanka. Monna eo o ne a e-s’o ka a bona Bibele, kahoo banyalani bao ba ile ba thabela ho mo fa ea bona.

‘Le Hlomeletsoe ka ho Feletseng Bakeng sa Mosebetsi o Mong le o Mong o Molemo.’ Gene Smalley, eo e leng mothusi Komiting ea Bongoli, o ile a buisana le banyalani ba babeli ba fumaneng mangolo. Banyalani bana ba tsoang Sierra Leone ba ile ba bolela hore letsatsi ka leng ba ne ba lokela ho il’o kha metsi hōle le hae. Empa mathata a kang ao, e ne e se letho ha a bapisoa le thabo ea ho ithuta Bibele le batho ba 50 ba thahasellang. Liithuti tseo tse ’nè tse fumaneng mangolo, li ile tsa bolela hore li ananela tsela eo thupelo eo li e fumaneng e li hlomeletseng ka eona bakeng sa mosebetsi o mong le o mong o molemo o larileng kapele.—2 Timothea 3:16, 17.

“Mamellang ho Fihlela Qetellong le ka Mor’a Mahlomola a Maholo.” Gerrit Lösch, e leng setho sa Sehlopha se Busang, o ile a qala puo ea sehlooho ka ho hlalosa kamoo limathi tsa lebelo la mokoka li lokelang ho matha ka tsela e tla etsa hore li hlōle. Le hoja lipapaling ho hlōla motho a le mong feela, lebelong la Bokreste teng, ho hlōla batho bohle ba mameletseng ho fihlela qetellong.

Ho mamella ho bolela ho sebeletsa Molimo re sa khaotse le ho se felloe ke tšepo le ha ho e-na le litšitiso, mahloriso, liteko kapa ho soetseha. Jesu o ile a re: “Ea mameletseng ho isa bofelong ke eena ea tla pholoha.” (Matheu 24:13) Ho khothatsa hakaakang ho tseba hore Jehova le Jesu ba elelloa mamello ea rōna! Ka mor’a moo, Mor’abo rōna Lösch o ile a thathamisa lintlha tse ’maloa tse tla re thusa ho mamella le har’a mathata. Tse ling tsa tsona ke tsena:

• Rapelang Molimo, “ea fanang ka mamello” le “eo letsatsi le leng le le leng a re jarelang mojaro.”—Baroma 15:5; Pesaleme ea 68:19.

• Ikemisetseng ho lula le tšepahala, le kholisehile hore “Molimo oa tšepahala, ’me a ke ke a le tlohela hore le lekoe ho feta seo le ka se jarang, empa hammoho le moleko o tla boela a le bulele tsela ea ho tsoa e le hore le khone ho o mamella.”—1 Bakorinthe 10:13.

• Lulang le nahana ka tšepo eo le nang le eona. “Ka lebaka la thabo e neng e behiloe ka pel’a [Jesu] o ile a mamella thupa ea tlhokofatso.”—Baheberu 12:2.

Mor’abo rōna Lösch o ile a hatisa taba ea hore bofelo ba tsamaiso ena bo atametse, kahoo ha rea lokela ho tela. “A re matheng ka mamello peisong e behiloeng ka pel’a rōna.”—Baheberu 12:1.

Qetellong ea lenaneo leo le monate, e mong oa liithuti tse fumaneng mangolo o ile a bala lengolo le tsoang ho liithuti-’moho le eena, moo li neng li leboha koetliso e molemo eo li e fumaneng. Lengolong leo, liithuti li ile tsa hlalosa hore ho ithuta Bibele ka tsela e tebileng le ho ithuta eona ho ea ka tatellano ea liketsahalo, ho entse hore li utloisise merero ea Molimo ’me ho boetse ho matlafalitse tumelo ea tsona haholo. Lengolo leo le ile la re: “Re ikemiselitse ho sebelisa lintho tse molemo tseo re ithutileng tsona.”