Ka August 2013, Lipaki Tsa Jehova tsa Philippines li ile tsa fihlela tlhoro ea bohlokoa ha ho ne ho phetheloa Holo ea ’Muso ea sekete ka lenaneo le khethehileng. Joalokaha e le tloaelo libakeng tse ngata, hangata liphutheho tsa Philippines li ne li se na chelete kapa li se na batho ba tsebang ho haha ba ka ba hahelang Liholo Tsa ’Muso. Ka lilemo tse ngata, ba bang ba ne ba kopanela mahaeng a ba bang ’me ba bang ba kopanela mehahong e menyenyane e hahiloeng ka liqala.

Khōlo e ntseng e eketseha ea palo ea Lipaki Tsa Jehova tse Philippines le linaheng tse ling tse ngata e ile ea eketsa tlhoko ea Liholo tsa ’Muso. Ka lebaka leo, ka 1999 Sehlopha se Busang sa Lipaki Tsa Jehova se ile sa etsa lenaneo la ho haha Liholo tsa ’Muso libakeng tse se nang thepa e lekaneng. Ka lebaka la tokisetso ena, Lipaki tsa moo li ntša monehelo oo li nang le oona ebe o tlatseletsoa ka menehelo e tsoang linaheng tse ling. Lihahi tse nang le boiphihlelo li hlophisitsoe ka lihlopha ho thusa liphutheho ho haha Liholo tsa tsona tsa ’Muso. Ka November 2001, lenaneo lena la machaba le ile la qala naheng ea Philippines.

Iluminado ke setho sa phutheho e Marilao, Bulacan, moo Holo ea ’Muso ea sekete e ileng ea hahoa. O ile a re: “Ka sebele ke ile ka bona bonngoe ba mokhatlo oa bara ba motho ba Bakreste. Ho ne ho e-na le baithaopi ba bangata—banna le basali, bana le batho ba baholo. Re ile ra sebetsa hammoho mochesong o bataolang oa letsatsi. Le hoja re ne re khathetse ka mor’a letsatsi le le lelele la mosebetsi, re ne re thabile haholo ka seo re se finyelletseng hammoho.”

Batho bao e seng Lipaki le bona ba ile ba khahloa ke boiteko boo baithaopi ba ileng ba bo etsa. Mong’a teraka e ileng ea tlisa lehlabathe le lehlohlojane moo ho neng ho hahoa teng o ile a re: “Le tšoana le likokoanyana—le bangata! Motho e mong le e mong oa thusa. Ha ke e-so bone ntho e tjena.”

Baithaopi ba ile ba qeta ho haha ka mor’a libeke tse ka tlaase ho tse tšeletseng ho tloha ha ba ne ba qala ho cheka moralo. Ka ho haha Holo ea ’Muso kapele hakaalo, litho tsa phutheho li ile tsa khona ho kopanela ka botlalo mosebetsing oa bohlokoa haholo oa ho bolela litaba tse molemo tsa ’Muso oa Molimo.—Matheu 24:14.

Ellen, e leng setho se seng sa phutheho ea moo, o re: “Re ne re sa khone ho fella kaofela ka Holong ea ’Muso ’me bongata ba rōna re ne re lula ka ntle. Holo e ncha ea ’Muso e ntle ’me re khona ho lula ka bolokolohi, kahoo re khona ho rua molemo le ho feta lithutong le khothatsong eo re e fumanang libokeng.”