Lilemong tse 40 tse fetileng, ka la 2 February, 1973 ho ile ha kenngoa mechine e mecha e hatisang Wallkill, New York, U.S.A., e le hore ho hlahisoe limakasine tsa Molula-Qhooa le Tsoha!

Lilemo tse leshome pele ho moo, Lipaki Tsa Jehova li ile tsa reka polasi moo e le hore ho ka hlahisoa lijo bakeng sa batho ba sebetsang ntlo-khōlō ea tsona e Brooklyn, New York. Empa sebaka seo se ne se tla boela se sebelisetsoe ho hlahisa lijo tsa mofuta o mong, e leng lijo tsa moea.—Matheu 24:45-47.

Philip Wilcox, eo ka nako eo e neng e le molebeli oa lefapha la khatiso, o hopola letsatsi la ha ba ne ba qala ho sebelisa mechine ea khatiso, Wallkill, o re: “Ho ne ho re nkile khoeli hore re kopanye mechine ea khatiso e sebetsang ka tsela e rarahaneng. E ne e se e lokile, ’me re ile ra e hlahloba hore na e sebetsa joang. Ho e-s’o ee kae, re ne re se re hatisitse limakasine tse likete tse ’maloa. Re ile ra li isa mohahong oa rōna oa khatiso o Brooklyn, e leng moo li ileng tsa romeloa liphuthehong. Re ne re batla ho qoba ho senya ka hohle kamoo ho ka khonehang.”

Lipaki Tsa Jehova li ile tsa haha mohaho oo o mocha oa khatiso e le hore li khone ho phetha mosebetsi o moholo oa ho hatisa, oo ka nako eo o neng o etsetsoa Brooklyn. Mathoasong a bo-1970, ho ne ho hlokahala lingoliloeng tsa Bibele tse ngata, ’me lefapha le ne le sa khone ho hlahisa tse lekaneng, kahoo ho ne ho sebetsoa le bosiu lefapheng la khatiso le Brooklyn, e le hore ho ka phethoa mosebetsi oo.

Ha ho se ho qetiloe ho hahoa mohaho oa pele oa khatiso Wallkill, ho ile ha kenngoa mechine e mene ea khatiso le thepa ea lefapha la thomello ’me ho ne ho boetse ho e-na le Holo ea ’Muso. Leha ho le joalo, pele o ka sebelisoa ka ho feletseng, ho ile ha hahoa mohaho oa bobeli o moholo o kopaneng le oona. Tlhoko ea lingoliloeng tse thehiloeng Bibeleng e ne e le khōlō hoo ho ileng ha kenngoa mechine e meng e hatisang e tšeletseng ka mohahong oa bobeli, le pele o fela.

Ka lilemo tse ngata, theknoloji ea mechine e ’nile ea tsoela pele ’me tlhoko ea lingoliloeng tsa rōna tse thehiloeng Bibeleng le eona ea eketseha. E le hore re khone ho finyella tlhoko eo, re ile ra lokela ho batla mechine e meng le ho atolosa mohaho oa khatiso o Wallkill ka makhetlo a ’maloa. Ka bo-1980, re ile ra kenya mechine e mecha ea khatiso e hatisang ka potlako ’me ra ntša ea khale e hatisang litlhaku feela.

Ka 2004, lefapha la khatiso le Brooklyn le ile la koaloa, ’me ka lekhetlo la pele libuka tsa qala ho hatisoa Wallkill. Ka 2010, mosebetsi oa ho hatisa limakasine o ile oa fallisetsoa ka leboea, ’me khetlong lena oa isoa ofising ea lekala ea Lipaki Tsa Jehova e Canada. Mochine oa moo o mocha o ka hatisa limakasine tse 200 000, ka hora.

Kajeno mohaho oa khatiso o Wallkill o na le mechine ea othomathike ea boleng bo phahameng haholo, e sebelisoang ke banna le basali ba 281 ba baithaopi. Selemong se fetileng ho ile ha hlahisoa libuka le Libibele tse fetang limilione tse 17. Ho phaella litsing tsa khatiso tse Wallkill le Canada, Amerika Leboea, Lipaki Tsa Jehova li na le litsi tse ling tsa khatiso Afrika, Asia, Australia, Europe le Amerika Boroa—tse thusang ho khotsofatsa tlhoko ea moea ea batho ba limilione.—Matheu 5:3.