Ithute Lentsoe la Molimo

U ka Atamela ho Molimo Joang?

Sehlooho sena se na le lipotso tseo e ka ’nang eaba u ’nile ua ipotsa tsona ’me se bontša hore na u ka fumana likarabo hokae Bibeleng. Lipaki Tsa Jehova li ka thabela ho tšohla likarabo tsena le uena.

1. Na Molimo o mamela lithapelo tsohle?

Jehova o khothalletsa batho ba lichaba tsohle hore ba atamele haufi le eena ka thapelo. (Pesaleme ea 65:2) Empa ha a mamele lithapelo tsohle. Ka mohlala, ha Baiseraele ba ne ba tsoela pele ho etsa lintho tse mpe, Molimo o ne a hana ho mamela lithapelo tsa bona. (Esaia 1:15) Hape lithapelo tsa monna ea tšoarang mosali oa hae hampe li ka sitisoa. (1 Petrose 3:7) Leha ho le joalo, Molimo o mamela le baetsalibe ba feteletseng haeba ba baka.—Bala 2 Likronike 33:9-13.

2. Re lokela ho rapela joang?

Ho rapela Molimo ke tlotla ebile ke karolo ea borapeli ba rōna, kahoo re lokela ho rapela Jehova feela. (Matheu 4:10; 6:9) Kaha ha rea phethahala, re lokela ho rapela ka lebitso la Jesu hobane Bibele e re ke eena “tsela” e khethiloeng. (Johanne 14:6) Jehova ha a batle hore re pheta-phete lithapelo tseo re li tsebang ka hlooho kapa tseo re li ngotseng empa o batla hore re mo bolelle se ka lipelong tsa rōna.—Bala Matheu 6:7; Bafilipi 4:6, 7.

’Mōpi oa rōna a ka utloa le lithapelo tse etsetsoang ka pelong. (1 Samuele 1:12, 13) O re khothalletsa hore re rapele ka linako tsohle, tse kang ha re tsoha, ha re il’o robala, nakong ea lijo le ha re tobana le mathata.—Bala Pesaleme ea 55:22; Matheu 15:36.

3. Ke hobane’ng ha Bakreste ba bokana hammoho?

Ha ho bonolo hore re atamele haufi le Molimo hobane re phela le batho ba sa lumeleng ho Molimo le ba somang tšepiso ea hae ea hore ho tla ba le khotso lefatšeng. (2 Timothea 3:1, 4; 2 Petrose 3:3, 13) Kahoo re lokela ho tloaelana le batho ba re matlafatsang, e leng balumeli-’moho le rōna.—Bala Baheberu 10:24, 25.

U ka atamela haufi le Molimo haeba u etsa setsoalle le batho ba Mo ratang. Liboka tsa Lipaki Tsa Jehova li re fa menyetla ea ho rua molemo tumelong ea batho ba bang.—Bala Baroma 1:11, 12.

  4. U ka atamela haufi le Molimo joang?

U ka atamela haufi le Jehova ka hore u nahanisise ka lintho tseo u ithutileng tsona Lentsoeng la hae. Nahanisisa ka mesebetsi ea hae, ka litaelo tsa hae le ka litšepiso tsa hae. Ha u rapela u bile u nahanisisa ka lintho tsena, u tla ananela lerato la Molimo le bohlale ba hae ka pelo eohle.—Bala Joshua 1:8; Pesaleme ea 1:1-3.

U ka atamela haufi le Molimo hafeela u mo tšepa ’me u lumela ho eena. Empa tumelo e tšoana le ntho e phelang e lokelang ho hlokomeloa. U lokela ho lula u matlafatsa tumelo ea hao ka ho nahanisisa ka mabaka a seo u se lumelang.—Bala 1 Bathesalonika 5:21; Baheberu 11:1, 6.

5. Ho atamela haufi le Molimo ho tla u tsoela molemo joang?

Jehova o hlokomela ba mo ratang. O ba sireletsa nthong leha e le efe e ka ’nang ea etsa hore ba felloe ke tumelo le tšepo ea bophelo bo sa feleng. (Pesaleme ea 91:1, 2, 7-10) O re lemosa ka mekhoa ea bophelo e ka re kulisang le e ka re sitisang ho thaba. Jehova o re ruta ho phela ka tsela e molemo ka ho fetisisa.—Bala Pesaleme ea 73:27, 28; Jakobo 4:4, 8.

E le hore u fumane boitsebiso bo eketsehileng, sheba khaolo ea 17 ea buka ena ea Ha e le Hantle ke Eng Seo Bibele e se Rutang? e hatisoang ke Lipaki Tsa Jehova.