Na Merero ea Hao e Lumellana le Morero oa Molimo?

CLARK’S nutcracker ke nonyana e ’mala o bosoeu bo bothokoa eo motho a ka e bonang e ntse e tšema-tšema merung ea karolo e ka bophirimela ea Amerika Leboea. E thonaka lithootse tse ka bang 33 000 ka selemo ebe e li epela libakeng tse sa tšoaneng tse ka bang 2 500 e li bolokela likhoeli tse batang tsa mariha. Ka sebele, tsela eo nonyana ena e bokellang lijo ka eona e bontša hore e “bohlale ka tlhaho.”​—Liproverbia 30:24.

Batho ba na le bokhoni bo tsotehang ho feta boo. Har’a tsohle tseo Jehova a li bōpileng, batho ke bona ba nang le bokhoni bo khethehileng ba ho ithuta linthong tse etsahetseng le ho etsa hore li ba thuse ho seo ba rerang ho se etsa. Morena Solomone ea bohlale o itse: “Merero e ka pelong ea motho e mengata.”​—Liproverbia 19:21.

Leha ho le joalo, hangata merero ea batho e itšetlehile ka seo ba nahanang hore se ka ’na sa etsahala nakong e tlang. Ka mohlala, u ka ’na ua rera lintho tseo u tla li etsa hosane hobane u nahana hore letsatsi le tla chaba ’me u tla be u ntse u phela. Hoa utloahala hore letsatsi le tla chaba; empa ho ke ke ha tiisoa hakaalo hore u tla be u ntse u phela. Mongoli oa Bibele ea bitsoang Jakobo o buile ’nete ha a re: “Ha le tsebe hore na bophelo ba lōna bo tla ba joang hosasane.”​—Jakobo 4:13, 14.

Jehova Molimo o fapane le rōna tabeng eo. O tseba “qetello ho tloha tšimolohong.” Joang kapa joang morero oa hae o tla phethahala. O re: “Morero oa ka o tla ema o tiile, ’me ke tla etsa ntho e ’ngoe le e ’ngoe eo ke e thabelang.” (Esaia 46:10) Ho etsahala’ng haeba motho a rera ho etsa lintho tse sa lumellaneng le morero oa Molimo?

Ha Batho ba sa Natse Molimo Mererong ea Bona

Lilemong tse ka bang 4 000 tse fetileng, lihahi tsa Tora ea Babele li ne li rerile ho thibela moloko oa batho hore o hasane. Li ile tsa re: “Tloong! A re ikaheleng motse le tora eo tlhōrō ea eona e leng maholimong, ’me re iketsetseng lebitso le tummeng, esere ra hasanngoa lefatšeng lohle.”​—Genese 11:4.

 Leha ho le joalo, Molimo o ne a e-na le morero o fapaneng le oo ka lefatše. O ne a laetse Noe le bara ba hae, a re: “Atang le ngatafale le tlale lefatše.” (Genese 9:1) Molimo o ile a etsa’ng ka merero ea batho bao ba marabele ba Babele? O ile a ferekanya puo ea bona hoo ba ileng ba sitoa ho buisana. Phello ea e-ba efe? “Tumellanong le hoo Jehova a ba hasanya lefatšeng lohle ho tloha moo.” (Genese 11:5-8) Lihahi tsa Babele li ile tsa qobelloa ho ithuta thuto ea bohlokoa. Ha batho ba rera ho etsa lintho tse sa lumellaneng le morero oa Molimo, “morero oa Jehova o tla ema o tiile.” (Liproverbia 19:21) Na u ithuta ho hong linthong tse joalo tsa nakong e fetileng?

Morui oa Leoatla

Mohlomong ha ua rera ho haha tora, empa kajeno batho ba bangata ba rera ho ba le chelete e ngata bankeng le ho ipokella matlotlo e le hore ba ka phela bophelo bo hlamatsehang ha ba tlohela mosebetsi. Ke ntho ea tlhaho hore motho a batle ho thabela litholoana tsa mosebetsi oa matsoho a hae. Solomone o itse: “Motho e mong le e mong a je ’me a noe le ho bona se molemo bakeng sa mosebetsi oohle oa hae o thata. Ke mpho ea Molimo.”​—Moeklesia 3:13.

Re ikarabella ho Jehova bakeng sa tsela eo re sebelisang mpho ena ka eona. Lilemong tse ka bang 2 000 tse fetileng, Jesu o ile a etsetsa barutuoa ba hae papiso e hatisang ntlha ena. O itse: “Tšimo ea motho ea itseng ea ruileng e ile ea beha hantle. Ka lebaka leo a qala ho nahana, a re, ‘Ke tla etsa joang, kaha joale ha ke na moo ke bokellelang lijalo tsa ka teng?’ Kahoo a re, ‘Ke tla etsa sena: Ke tla qhaqha matlo a ka a polokelo ’me ke hahe a maholo, ’me ke tla bokellela lijo-thollo tsohle tsa ka le lintho tsohle tsa ka tse molemo moo; ’me ke tla re ho moea oa ka: “Moea, u na le lintho tse ngata tse molemo tse bolokiloeng ka lilemo tse ngata; khatholoha, u je, u noe, u ithabise.”’” (Luka 12:16-19) Na merero ea morui eo ha e utloahale? Joaloka nonyana e boletsoeng pejana, e bitsoang Clark’s nutcracker, ho ne ho bonahala motho enoa ea boletsoeng papisong a folofela leraha.

Leha ho le joalo, monahano oa hae o ne o fosahetse. Jesu o ile a tsoela pele a re: “Empa Molimo a re ho eena, ‘Uena ea se nang kahlolo e molemo, bosiung bona ba batla moea oa hao ho uena. Joale, ke mang ea tla ba le lintho tseo u li bokeletseng?’” (Luka 12:20) Na Jesu o ne a hanyetsa seo Solomone a se buileng ha a re mosebetsi le litholoana tse ntle tseo o li hlahisang ke limpho tse tsoang ho Molimo? Ha ho joalo. Joale Jesu o ne a bolela’ng? Jesu o itse: “Kahoo ho joalo le ka motho ea ipolokelang letlotlo empa a sa ruela ho Molimo.”​—Luka 12:21.

 Jesu o ne a ruta bamameli ba hae hore Jehova o batla hore re Mo kenye mererong ea rōna. Morui eo o ne a ka ruela ho Molimo ka ho batla litsela tsa ho matlafatsa kamano ea hae le Molimo, le ka ho hōlisa bohlale le lerato la hae. Mantsoe a monna eo ha a bontše hore o ne a thahasella lintho tse joalo, ebile ha a bontše hore o ne a thahasella ho siela mafutsana lijalo tse ling tsa hae hore a khoahlapise, hape o ne a sa thahaselle ho nyehela linyehelo ho Jehova. Morui eo o ne a sa etse liketso tse joalo tse lumellanang le thato ea Molimo. Morero oa hae e ne e le feela hore a fumane seo a se lakatsang le se mo thabisang.

Na u hlokometse hore kajeno lintho tseo batho ba bangata ba li nkang e le tsa bohlokoa li tšoana le tsa morui eo Jesu a buileng ka eena? Ebang re hafa ka nkatana kapa re kojoana-li-mahetleng, ho bonolo hore re be le moea oa ho rata maruo, ebe re hlokomoloha kamano ea rōna le Molimo ka lebaka la ho tšoareha ka lintho tseo re li lakatsang le tseo re li hlokang bophelong ba letsatsi le letsatsi. U ka qoba leraba leo joang?

Ho Lokisetsa se Nkoang e le Bophelo bo Tloaelehileng

E ka ’na eaba boemo ba hao bo fapane le ba morui ea boletsoeng papisong ea Jesu; mohlomong ua sokola licheleteng. Leha ho le joalo, haeba u nyetse kapa u nyetsoe, ha ho pelaelo hore u ikemiselitse ho hlokomela lelapa la hao ka lintho tse hlokahalang, ’me ha ho khoneha u thuse bana ba hao hore ba fumane thuto e ntle ea motheo. Haeba u lesoha, mohlomong merero ea hao e akarelletsa ho fumana mosebetsi kapa ho lula ho oo u nang le oona, e le hore u se ke ua ba mokhoka-khoale ho batho ba bang. Bona ke boikemisetso bo botle.​—2 Bathesalonika 3:10-12; 1 Timothea 5:8.

Leha ho le joalo, ho bonolo hore ho sebetsa, ho ja, ho noa—ho phela bophelo bo nkoang e le bo tloaelehileng—ho etse hore motho a etse se khahlanong le thato ea Molimo. Ka tsela efe? Jesu o itse: “Feela kamoo matsatsi a Noe a neng a le kateng, ho ba teng ha Mor’a motho ho tla ba joalo. Etsoe joalokaha matsatsing ao pele ho moroallo, ba ne ba ja ’me ba noa, banna ba nyala ’me basali ba nyalisoa, ho fihlela letsatsing leo Noe a ileng a kena ka arekeng ka lona; ’me ba se ke ba elelloa ho fihlela moroallo o tla ’me o ba hohola bohle, ho ba teng ha Mor’a motho ho tla ba joalo.”​—Matheu 24:37-39.

Pele ho Moroallo, batho ka kakaretso ba ne ba phela bophelo boo ba neng ba nka hore ke bo tloaelehileng. Leha ho le joalo, bothata ba bona ke hore ha baa ka ba “elelloa” morero oa Molimo oa ho felisa lefatše le khopo ka moroallo oa metsi. Ntle ho pelaelo, ba ne ba nka hore Noe o phela bophelo bo sa tloaelehang. Empa, ha Moroallo o fihla, ho ile ha bonahala hore bophelo ba Noe le lelapa la hae ke bona bo nepahetseng.

Kajeno, matšoao ’ohle a supa hore re phela nakong ea bofelo. (Matheu 24:3-12; 2 Timothea 3:1-5) Haufinyane, ’Muso oa Molimo o tla “silakanya o felise” mebuso ea hona joale. (Daniele 2:44) ’Musong oo, lefatše e tla ba paradeise. ’Muso oo o tla felisa ho kula le lefu. (Esaia 33:24; Tšenolo 21:3-5) Libōpuoa tsohle tse lefatšeng li tla phela ka kutloano ’me li ke ke tsa hlola li lapa.​—Pesaleme ea 72:16; Esaia 11:6-9.

Empa, pele Jehova a nka khato, morero oa hae ke hore litaba tse molemo tsa ’Muso oa hae li “[boleloe] lefatšeng lohle leo ho ahiloeng ho lona hore e be bopaki ho lichaba tsohle.” (Matheu 24:14) Tumellanong le morero oa Molimo, Lipaki Tsa Jehova tse ka bang limilione tse supileng, li bolela evangeli linaheng tse 236 ka lipuo tse fetang 400.

Batho ba bang ba ka ’na ba bona eka tsela eo Lipaki Tsa Jehova li phelang ka eona ea makatsa—kapa ebile ha e na kelello. (2 Petrose 3:3, 4) Joaloka batho ba mehleng ea pele ho Moroallo, kajeno batho ba bangata ba phathahane ka mabaka a letsatsi le letsatsi. Ba ka ’na ba nka hore motho ea hanang ho phela bophelo bo nkoang e le bo tloaelehileng ha aa tlala. Empa ho batho ba nang le tumelo litšepisong tsa Molimo, ho phela bophelo ba ho sebeletsa Molimo ho molemo e le kannete.

Ka lebaka leo, ebang u morui kapa u mofutsana kapa u batla u eme hantle, ke bohlale hore nako le nako u hlahlobe merero ea hao ea nakong e tlang. Ha u ntse u e hlahloba, ipotse, ‘Na merero ea ka e lumellana le morero oa Molimo?’

[Setšoantšo se leqepheng la 11]

Ha batho ba rera ho etsa lintho tse sa lumellaneng le morero oa Molimo, morero oa Jehova ke oona o tla ema o tiile

[Setšoantšo se leqepheng la 12]

Ha morui ea boletsoeng papisong ea Jesu a rera seo a tla se etsa, ha aa ka a nahana ka morero oa Molimo