MOHLOLOHALI e mong ea futsanehileng o haka mora oa hae, ngoana ea mong feela. Ha a kholoe seo a se bonang. Pejana ho moo, o ne a sikile setopo sa mora oa hae eo a mo ratang. Joale o shebile mora oa hae ea tsositsoeng bafung ’me o thabela ho bona a bososela. Moeti oa hae o re: “Bona, mora oa hao oa phela.”

Ketsahalo eo e hlollang e etsahetse lilemong tse ka bang 3 000 tse fetileng. U ka bala ka eona ho 1 Marena khaolo ea 17. O ne a etetsoe ke moprofeta oa Molimo ea bitsoang Elia. Mosali eo eena ke mang? Ke mohlolohali ea sa boleloang ka lebitso ea neng a lula motseng oa Sarepta. Ho tsosoa ha mora oa hae bafung ke e ’ngoe ea lintho tse matlafatsang tumelo ka ho fetisisa tse kileng tsa mo etsahalla. Ha re ntse re tšohla pale ea hae, re tla ithuta lintlha tsa bohlokoa.

Jehova o ne a entse qeto ea hore ho tla ba le komello sebakeng se busoang ke morena ea khopo oa Iseraele ea bitsoang Akabe. Ka mor’a hore Elia a phatlalatse komello, Molimo o ile a mo patela Akabe, ’me a fa moprofeta eo bohobe le nama tseo a neng a li tlisetsoa ka mohlolo ke makhoaba. Kahoo, Jehova o ile a re ho Elia: “Tloha, u ee Sarepta, ea Sidone, ’me u lule moo. Bona! Ka sebele ke tla laela mosali moo, mohlolohali, hore a u fe lijo.”—1 Mar. 17:1-9.

Ha Elia a fihla Sarepta, o ile a bona mosali e mong ea futsanehileng oa mohlolohali a ntse a roalla patsi. Na ebe ke eena mosali ea neng a tla fa moprofeta lijo? Hona o ne a tla mo fa eng, kaha le eena o ne a futsanehile? Le hoja e ka ’na eaba Elia o ile a ipotsa lipotso tseo, o ile a qala ho buisana le eena. O ile a re: “Ka kōpo, ntlele metsinyana ka sejana e le hore nka noa.” Ha a il’o mo khella metsi, Elia a phaella ka ho re: “Ka kōpo, ntlele bohobe.” (1 Mar. 17:10, 11) E ne e se bothata hore mohlolohali eo a mo  khelle metsi, empa ho mo fa bohobe teng e ne e le bothata.

O ile a mo araba, a re: “Ka Jehova Molimo oa hao ea phelang, ha ke na polokoe, haese lefupu la phofo ka nkhong e khōlō le oli e nyenyane ka nkhong e nyenyane; bona! ke roalla likotoana tse seng kae tsa patsi, ke tla kena ’me ke etse ho hong bakeng sa ka le mora oa ka, ’me re tla lokela ho ho ja ebe rea shoa.” (1 Mar. 17:12) A re ke re nahane ka seo puisano ena e se senolang.

Mohlolohali eo o ile a hlokomela hore Elia ke Moiseraele ea tšabang Molimo. Sena se bontšoa ke mantsoe a hae a reng “ka Jehova Molimo oa hao ea phelang.” Ho bonahala eka le hoja a ne a tseba ho itseng ka Molimo oa Iseraele, o ne a sa tsebe Jehova hoo a ka reng “Molimo oa ka” ha a bua ka eena. O ne a lula Sarepta, eo ho bonahalang eka e ne e itšetlehile ho motse oa Foenisia o Sidone. Mohlomong Sarepta, ho ne ho lula barapeli ba Baale. Leha ho le joalo, ho ne ho e-na le ntho e ikhethang eo Jehova a e boneng ho mohlolohali eo.

Le hoja mohlolohali ea futsanehileng oa Sarepta a ne a lula har’a batho ba rapelang litšoantšo, o ile a bontša tumelo. Jehova o ile a romela Elia ho mohlolohali eo, ’me seo e ne e le molemong oa bona ba le babeli. Re ka ithuta thuto ea bohlokoa tabeng ena.

Le hoja Sarepta ho ne ho rapeloa Baale, hase baahi bohle ba teng ba neng ba bolile ka ho feletseng. Jehova o ile a bontša hore o ela hloko batho ba lipelo li ntle ba e-s’o ka ba mo sebeletsa, ka hore a romele Elia ho mohlolohali eo. Ha e le hantle, ‘sechabeng se seng le se seng motho ea tšabang Molimo le ea sebetsang ho loka oa amoheleha ho eena.’—Lik. 10:35.

Ke batho ba bakae tšimong ea lōna ba tšoanang le mohlolohali eo oa Sarepta? Le hoja e ka ’na eaba ba pota-potiloe ke batho ba tšehetsang bolumeli ba bohata, e ka ’na eaba ba labalabela ho tseba ’nete. E ka ’na eaba ha ba tsebe Jehova kapa ha ba mo tsebe hakaalo ’me kahoo ba hloka ho thusoa e le hore ba ka amohela borapeli ba ’nete. Na u batla batho ba joalo le ho ba thusa?

Ak’u nahanisise seo Elia a ileng a kōpa mohlolohali eo hore a se etse. Mohlolohali eo o ne a qeta ho mo bolella hore o tl’o pheha lijo tsa ho qetela, ebe ka mor’a moo o oa ichoella le mora oa hae. Empa Elia o ile a re’ng? O ile a re: “U se ke ua tšoha. Kena, u etse ho ea ka lentsoe la hao. Feela u nketsetse polokoe e nyenyane ka se teng ka moo pele, u e tlise ho ’na, ’me ka mor’a moo u ka etsa ho hong bakeng sa hao le mora oa hao. Etsoe sena ke seo Jehova Molimo oa Iseraele a se boletseng, ‘Nkho e khōlō ea phofo e ke ke ea fela, le nkho e nyenyane ea oli e ke ke ea fela ho fihlela letsatsing leo ka lona Jehova a fanang ka pula ea litloebelele holim’a lefatše.’”—1 Mar. 17:11-14.

Motho e mong a ka be a itse: ‘U re’ng, ke u fe lijo tsa ka tsa ho qetela? Ua bapala.’ Empa mohlolohali eo ha aa ka a bua joalo. Le hoja a ne a sa tsebe Jehova hantle, o ile a kholoa Elia ’me a etsa seo a reng a se etse. Ruri eo e ne e le teko e matla ea tumelo, empa o ile a etsa qeto e bohlale!

Molimo ha aa ka a lahla mohlolohali eo ea futsanehileng. Feela joalokaha Elia a ne a tšepisitse, Jehova o ile a atisa lijo tse seng kae tseo a neng a e-na le tsona hore li fepe Elia, mohlolohali eo le mora oa hae ho fihlela komello e feta. Ha e le hantle, “nkho e khōlō ea phofo ha ea ka ea fela, le nkho e nyenyane ea oli ha ea ka ea fela, ho ea ka lentsoe la Jehova leo a neng a le buile ka Elia.” (1 Mar. 17:16; 18:1) Mohlomong  hoja mosali eo a se ke a etsa seo, polokoe eo a e entseng ka phofo e seng kae eo a neng a e-na le eona le oli e ka be e bile lijo tsa hae tsa ho qetela. Empa o ile a bontša tumelo le hore o tšepa Jehova, ’me a ngoathela Elia pele.

Seo re ithutang sona tabeng ena ke hore Molimo o hlohonolofatsa batho ba bontšang tumelo. Ha botšepehi ba hao bo lekoa ’me u bontša tumelo, Jehova o tla u thusa. E tla ba Mohlokomeli, Mosireletsi le Motsoalle oa hao e le hore a u thuse ho mamella liteko.—Ex. 3:13-15.

Ka 1898, Zion’s Watch Tower e ile ea bua se latelang ka tlaleho ea mohlolohali eo: “Haeba mosali eo o ne a e-na le tumelo e ileng ea etsa hore a mamele, joale ho ne ho tšoaneleha hore Morena a sebelise Moprofeta hore a mo thuse; haeba a ne a sa ka a bontša tumelo, mohlomong ho ka be ho fumanoe mohlolohali e mong ea neng a tla e bontša. Ho joalo le ka rōna tseleng ena ea bophelo, Morena o re isa libakeng tseo a lekang tumelo ea rōna ho tsona. Ha re bontša tumelo re tla hlohonolofatsoa; ha re sa e bontše ha re na ho hlohonolofatsoa.”

Ha re tobana le liteko, re lokela ho batla tataiso ea Molimo ka Mangolong le lingoliloeng tsa rōna tse thehiloeng Bibeleng. Ka mor’a moo re lokela ho latela tataiso eo Jehova a fanang ka eona, ho sa tsotellehe hore na ho ka ’na ha e-ba thata hakae ho e amohela. Ruri re tla hlohonolofatsoa ha re etsa se boletsoeng maeleng ana a bohlale: “Tšepa Jehova ka pelo ea hao eohle ’me u se ke ua itšetleha ka kutloisiso ea hao. U mo ele hloko litseleng tsohle tsa hao, ’me o tla otlolla litsela tsa hao.”—Liprov. 3:5, 6.

Mohlolohali eo o ne a le mothating oa ho tobana le teko e ’ngoe ea tumelo. Tlaleho ea Bibele e re: “Ka mor’a lintho tsena mora oa mosali eo, mong’a ntlo, a kula, ’me boloetse ba hae ba tota hoo ho neng ho se phefumoloho e setseng ho eena.” Kaha ’mè eo o ne a utloile bohloko a bile a sa utloisise hore na ke hobane’ng ha a hlaheloa ke tlokotsi eo, o ile a re ho Elia: “Taba ea ka le uena ke efe, Uena monna oa Molimo oa ’nete? U tlile ho ’na ho tla nkhopotsa phoso ea ka le ho bolaea mora oa ka.” (1 Mar. 17:17, 18) Mantsoe aa a bohloko a bolela’ng?

Na ebe mosali eo o ile a hopola phoso eo a e entseng e tšoenyang letsoalo la hae? Na ebe o ile a nahana hore lefu la mora oa hae ke tsela eo Molimo a mo khalemelang ka eona le hore o ne a rometse Elia ho tlisa lefu? Bibele ha e re bolelle, empa ho hlakile hore: Mohlolohali eo ha aa ka a qosa Molimo ka hore o khopo.

E tlameha ebe Elia o ile a ferekanngoa ke lefu la mora oa mohlolohali le ke hore ebe mohlolohali eo o nahana hore boteng ba hae e le moprofeta ke bona bo mo tliselitseng masisa-pelo ao. Ka mor’a hore Elia a ise setopo sa moshanyana ka kamoreng e marulelong, o ile a hooa a re: “Jehova Molimo oa ka, na u tla hlahisetsa le mohlolohali enoa eo ke lulang le eena ke le mojaki kotsi ka hore u bolaee mora oa hae?” Moprofeta eo o ne a tšaba hore lebitso la Molimo le tla nyefoloa haeba Molimo a ne a ka lumella hore mosali eo ea mosa le ea amohelang baeti ka mofuthu a tsoele pele ho utloa bohloko. Kahoo Elia o ile a rapela, a re: “Jehova Molimo oa ka, ka kōpo, etsa hore moea oa ngoana enoa o khutlele ka hare ho eena.”—1 Mar. 17:20, 21.

Jehova o ne a mametse. Mohlolohali eo o ne a hlokometse moprofeta ’me a bontšitse tumelo. Kamoo ho bonahalang kateng, Molimo o ile a lumella hore ho kula ho bolaee moshanyana eo, a tseba hore o tla mo tsosa bafung le hore tsoho ea hae, e leng ea pele e tlalehiloeng ka Mangolong, e ne e tla fa meloko e tlang tšepo. Ha Elia a etsa kōpo, Jehova o ile a tsosa ngoana eo. Ak’u inahanele feela hore na mohlolohali eo o ile a thaba hakaakang ha Elia a re: “Bona, mora oa hao oa phela”! Ka mor’a moo, mohlolohali eo o ile a re ho Elia: “Joale, ka sebele, kea tseba hore u monna oa Molimo le hore lentsoe la Jehova le molomong oa hao ke ’nete.”—1 Mar. 17:22-24.

Tlaleho e ho 1 Marena khaolo ea 17 ha e re bolelle ho eketsehileng ka mosali eo. Empa kaha Jesu o ile a bua ka eena hantle, e ka ’na eaba o sebelelitse Jehova ka botšepehi bophelo bohle ba hae. (Luka 4:25, 26) Pale ea hae e re ruta hore Molimo o hlohonolofatsa batho ba tšoarang bahlanka ba hae hantle. (Mat. 25:34-40) E bontša hore Molimo o hlokomela batho ba tšepahalang, esita le maemong a thata. (Mat. 6:25-34) Tlaleho ena e boetse e fana ka bopaki ba hore Jehova o lakatsa ho tsosa bafu le hore o na le matla a ho ba tsosa. (Lik. 24:15) Ka sebele ana ke mabaka a utloahalang a hore re lule re hopola mohlolohali oa Sarepta.