1, 2. Ke boprofeta bofe bo mabapi le matsatsi a ho qetela boo e tlamehang ebe bo ile ba khahla barutuoa ba Jesu, hona hobane’ng?

QETELLONG, Petrose, Jakobo le Johanne hammoho le Andrease, ba ile ba ba bang le Monghali oa bona. Seo Jesu a neng a ile a se bua pejana mabapi le ho timetsoa ha tempele se ne se ba imetse likelellong. (Mar. 13:1-4) Kahoo, ba ile ba mo botsa ba re: “Re bolelle, Lintho tsee li tla etsahala neng, ’me pontšo e tla ba efe ea ho ba teng ha hao le ea qetello ea tsamaiso ea lintho?” (Mat. 24:1-3) Jesu o ile a qala ho ba bolella ka liketsahalo kapa maemo a neng a tla tlisa liphetoho tse khōlō bophelong a be a tšoaee matsatsi a ho qetela a tsamaiso e khopo ea lintho ea Satane. Ho na le ketsahalo eo e tlamehang ebe e ile ea khahla barutuoa ba Jesu. Ka mor’a hore a bue ka lintho tse nyahamisang tse kang lintoa, khaello ea lijo le ho eketseha ha tlōlo ea molao, Jesu o ile a bolela hore ho na le ntho e ’ngoe e molemo e neng e tla tšoaea matsatsi a ho qetela. O ile a re: “Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; joale e ntan’o ba hona bofelo bo tla tla.”—Mat. 24:7-14.

² Barutuoa ba Jesu ba ne ba ile ba thabela ho bolela litaba tse molemo tsa ’Muso ba e-na le Kreste. (Luka 8:1; 9:1, 2) E ka ’na eaba ba ile ba hopola hore o ile a re: “Ka sebele, kotulo e khōlō, empa basebetsi ha ba bakae. Ka hona kōpang Mong’a kotulo hore a romele basebetsi kotulong ea hae.” (Luka 10:2) Empa ba ne ba tla etsa mosebetsi oa boboleli “lefatšeng lohle leo ho ahiloeng ho lona” ’me ba fane ka “bopaki ho lichaba tsohle” joang? Basebetsi ba ne ba tla tsoa hokae? Ekare ka nako eo ka eona ba neng ba lutse le Jesu ba ka be ba ile ba khona ho bona se neng se tla etsahala ka moso! Ho hlakile hore ba ka be ba ile ba makala ha ba bona mantsoe ao hona joale re a balang ho Matheu 24:14 a phethahala.

3. Luka 21:34 e phethahala joang kajeno, ’me re lokela ho itlhahloba ka tsela efe?

³ Re phela nakong eo ka eona boprofeta ba Jesu bo  phethahalang. Batho ba limilione ba sebetsa hammoho ho bolela litaba tse molemo tsa ’Muso lefatšeng lohle. (Esa. 60:22) Leha ho le joalo, Jesu o ile a bolela hore matsatsing ana a ho qetela, ba bang ba ne ba tla thatafalloa hore ba tsepamise likelello tsa bona. Ho ne ho tla ba le lintho tse ba sitisang ’me ba ne ba tla “imeloa.” (Bala Luka 21:34.) Le ’ona mantsoe ao, re bona ha a phethahala. Ho na le lintho tse khelosang bahlanka ba bang ba Molimo. Re ka bona sena liqetong tseo ba li etsang mabapi le mosebetsi, thuto e phahameng, ho bokella lintho tse bonahalang hammoho le nako eo ba e qetang lipapaling le boithabisong. Batho ba bang baa nyahama ka lebaka la khatello le matšoenyeho a letsatsi le letsatsi. Ipotse: ‘’Na ke etsa joang? Na thato ea Molimo ke eona e tlang pele bophelong ba ka?’

4. (a) Pauluse o ile a rapella eng mabapi le Bakreste ba Filipi, hona hobane’ng? (b) Re tla tšohla’ng sehloohong see le se latelang, ’me re tla tšohla seo ka sepheo sefe?

⁴ Bakreste ba neng ba phela lekholong la pele la lilemo ba ile ba lokela ho sebetsa ka thata ho etsa hore tšebeletso ea Molimo e be eona e tlang pele bophelong ba bona. Moapostola Pauluse o ile a bona ho hlokahala hore a rapelle hore Bakreste ba neng ba le Filipi ba ‘nepisise lintho tsa bohlokoa haholo.’ (Bala Bafilipi 1:9-11.) Joaloka moapostola Pauluse, batho ba bangata nakong eo, ba ne ba “bontša sebete haholo hore ba bolele lentsoe la Molimo ba sa tšabe letho.” (Bafil. 1:12-14) Ka tsela e tšoanang, kajeno ba bangata ba rōna ba bolela Lentsoe la Molimo ka sebete. Ho ntse ho le joalo, na ho hlahloba se finyelloang ke mokhatlo oa Jehova hona joale ho ka re thusa hore re tsepamise likelello le ho feta mosebetsing oa bohlokoa oa boboleli? Ka sebele ho ka re thusa! Sehloohong sena, a re ke re tšohleng tokisetso eo Jehova a e entseng ea hore Matheu 24:14 e phethahale. Ke ntho efe e ka sehloohong eo mokhatlo oa Jehova o e etsang, ’me ho tseba seo ho ka re khothatsa ha ba ha khothatsa ba malapa a rōna joang? Sehloohong se latelang re tla tšohla se ka re thusang hore re mamelle re be re tsamaisane le mokhatlo oa Jehova.

5, 6. (a) Ke hobane’ng ha Jehova a ile a fana ka pono ea karolo e leholimong ea mokhatlo oa hae? (b) Ezekiele o ile a bona eng ponong?

⁵ Ho na le lintho tse ngata tseo Jehova a ileng a khetha hore li se ke tsa ngoloa Lentsoeng la hae. Ka mohlala, ha aa ka a fana ka boitsebiso ba hore na boko bo sebetsa joang kapa hore na sepakapaka se sebetsa joang le hoja ho tseba lintho tseo e ne e tla ba ntho e hlollang! Ho e-na le hoo, Jehova o re file boitsebiso boo re bo hlokang e le hore re utloisise merero ea hae re be re phele ka tsela e lumellanang le eona. (2 Tim. 3:16, 17) Ruri ke ntho e thabisang hore ebe Bibele e re fa leseli ka karolo e sa bonahaleng ea mokhatlo oa Jehova! Rea hlolloa ha re bala ka tlhophiso eo Jehova a e entseng leholimong e ngotsoeng ke Esaia, Ezekiele le Daniele hammoho le tlalehong ea Tšenolo e ngotsoeng ke Johanne. (Esa. 6:1-4; Ezek. 1:4-14, 22-24; Dan. 7:9-14; Tšen. 4:1-11) Ho tšoana le ha eka Jehova o butse kharetene ’me o re lumella hore re bone se etsahalang leholimong. Ke hobane’ng ha a re file boitsebiso boo?

⁶ Jehova o ne a sa batle hore le ka mohla re ka lebala hore re karolo ea mokhatlo oa hae o leholimong le lefatšeng. Ho na le lintho tse ngata tse etsahalang ho ntšetsa pele morero oa Jehova tseo re sa li boneng. Ka mohlala, Ezekiele o ile a bona karolo e sa bonahaleng ea mokhatlo oa Jehova e tšoantšetsoang ke koloi e khōlō ea leholimo. Koloi ena e ne e tsamaea kapele ’me e ne e ka tjeka ka ho panya ha leihlo. (Ezek. 1:15-21) Hang ha mabili a eona a ne a phikoloha, koloi eo e ne e tsamaea sebaka se se lelele. Ponong, Ezekiele o ile a khona ho bona le Mopalami oa koloi eo. O ile a re: “Ka bona ho hong ho kang ho phatsima ha motsoako oa khauta le silevera, ho  bonahalang joaloka mollo ka hohle . . . E ne e le ponahalo ea sebōpeho sa khanya ea Jehova.” (Ezek. 1:25-28) E tlameha ebe Ezekiele o ile a hlolloa haholo ha a bona pono eo! O ile a bona Jehova a laola mokhatlo oa hae ka botlalo, a o tataisa ka moea oa hae o halalelang. Ruri pono ea koloi ena e tsamaeang ke pontšo e hlollang ea hore na karolo e sa bonahaleng ea mokhatlo oa Jehova e sebetsa joang!

7. Pono e bontšitsoeng Daniele e re khothatsa joang?

⁷ Daniele le eena o ile a bona pono e re khothatsang. O ile a bona Jehova e leng “Moholo-holo oa Matsatsi” a lutse teroneng e nang le malakabe a mollo. Terone eo e ne e e-na le mabili. (Dan. 7:9) Jehova o ne a batla hore Daniele a bone hore mokhatlo oa Hae ha oa ema nģ’a e le ’ngoe, empa o phethahatsa morero oa Hae. Daniele o ile a boela a bona “e mong ea joaloka mor’a motho,” e leng Jesu, a fuoa matla a bolebeli karolong e lefatšeng ea mokhatlo oa Jehova. Puso ea Kreste e phethahetseng ha e na ho ba ea lilemo tse seng kae feela. Ho e-na le hoo, “ke bobusi bo hlolang ka nako e sa lekanyetsoang bo ke keng ba feta, ’me ’muso oa hae ke o ke keng oa senngoa.” (Dan. 7:13, 14) Pono ena e re susumelletsa hore re tšepe Jehova re be re hlokomele le seo a se finyellang. Mora oa hae e leng Jesu, ea ileng a lekoa a ba a ipaka, o ile a “fuoa bobusi le ho hlompheha le ’muso.” Jehova o tšepa Mora oa hae. Kahoo, le rōna re ka tšepa boeta-pele ba Jesu.

8. Ezekiele le Esaia ba ile ba angoa joang ke lipono tse tsoang ho Jehova, ’me rōna li lokela ho re ama joang?

⁸ Pono ee ea karolo e sa bonahaleng ea mokhatlo oa Jehova e lokela ho re ama joang? Joaloka Ezekiele, ka sebele seo Jehova a se finyellang sea re hlolla. (Ezek. 1:28) Ho thuisa ka mokhatlo oa Jehova ho ka re susumelletsa hore re kene khabong, joaloka  Esaia. Ha a ne a fumana monyetla oa hore a bolelle batho ba bang ka seo Jehova a neng a se etsa, o ile a sebelisa monyetla oo hang-hang. (Bala Esaia 6:5, 8.) Esaia o ne a kholisehile hore ka thuso ea Jehova o ne a ka khona ho hlōla bothata bofe kapa bofe. Ka tsela e tšoanang, ho fumana leseli lena ka karolo e sa bonahaleng ea mokhatlo oa Jehova ho lokela ho etsa hore re hlolloe ’me ho re susumelletse hore re kene khabong. Ruri ho nahana ka mokhatlo oo o sa emang nģ’a e le ’ngoe le o shebaneng feela le ho phetha morero oa Jehova ho lokela ho re susumetsa!

9, 10. Ke hobane’ng ha ho hlokahala hore ho be le karolo e bonahalang ea mokhatlo oa Jehova?

⁹ Jehova o ile a sebelisa Mora oa hae ho theha karolo e lefatšeng ea mokhatlo oa hae e sebelisanang le e leholimong. Ke hobane’ng ha karolo ee e ne e hlokahala e le hore ho phethoe mosebetsi o hlalosoang ho Matheu 24:14? Nahana ka mabaka ana a mararo.

¹⁰ La pele, Jesu o ile a bolela hore mosebetsi ona oa boboleli o ne o tla etsa hore barutuoa ba hae ba ee “karolong e hōle-hōle ea lefatše.” (Lik. 1:8) La bobeli, ho ne ho tla hlokahala hore ho etsoe litokisetso tsa hore batho ba etsang mosebetsi ona ba fuoe lijo tsa moea ba be ba hlokomeloe. (Joh. 21:15-17) La boraro, ho ne ho tla hlokahala hore ho etsoe litokisetso tsa hore batho ba etsang mosebetsi oa ho bolela litaba tse molemo ba bokane hammoho ho rapela Jehova le hore ba rutoe hore na ba lokela ho etsa mosebetsi oo joang. (Baheb. 10:24, 25) Ho ne ho ke ke ha iketsahalla feela tjee hore lipakane tseo li finyelloe. E le hore balateli ba Kreste ba atlehe, ho ne ho tla hlokahala hore mosebetsi oo o hlophisoe hantle.

11. Re bontša joang hore re tšehetsa litokisetso tseo mokhatlo oa Jehova o li etsang?

¹¹ Re bontša joang hore re tšehetsa litokisetso tseo mokhatlo oa Jehova o li etsang? Tsela e ’ngoe ea bohlokoa eo re etsang seo ka eona ke ka hore kamehla re tšepe batho bao Jehova le Jesu ba ba tšepetseng hore ba re etelle pele mosebetsing oa rōna oa boboleli. Bara bana babo rōna ba etellang pele ba ka be ba sebelisa nako ea bona le matla a bona ho leka ho rarolla mathata a teng lefatšeng lena. Empa ha ba etse joalo. A re ke re boneng hore na karolo e lefatšeng ea mokhatlo oa Molimo e ’nile ea shebana le eng.

12, 13. Baholo ba Bakreste ba phetha mosebetsi oa bona joang, hona ke hobane’ng ha seo se u khothatsa?

¹² Baholo ba Bakreste ba nang le boiphihlelo lefatšeng lohle, ba khethiloe hore ba behe mosebetsi oa ho bolela ka ’Muso leihlo ba be ba o potlakise linaheng tseo ba sebeletsang ho tsona. Ha bara bana babo rōna ba etsa liqeto, ba batla tataiso Lentsoeng la Molimo, ’me ba etsa hore e be ‘lebone la leoto la bona le leseli tseleng ea bona,’ ba bile ba rapella tataiso ea Jehova ka tieo.—Pes. 119:105; Mat. 7:7, 8.

¹³ Joaloka barab’abo rōna ba neng ba etelletse pele lekholong la pele la lilemo, baholo ba Bakreste ba behileng mosebetsi oa boboleli leihlo kajeno, ba inehetse “bosebeletsing ba lentsoe.” (Lik. 6:4) Ba thaba haholo ha ba bona kamoo mosebetsi oa ho bolela litaba tse molemo o tsoelang pele kateng libakeng tsa habo bona le lefatšeng lohle. (Lik. 21:19, 20) Ha ba behe melao le melaoana e mengata. Ho e-na le hoo, ba latela Mangolo le tataiso ea moea o halalelang oa Molimo ha ba ntse ba etsa litokisetso tse hlokahalang ho etsa hore mosebetsi oa boboleli o tsoele pele. (Bala Liketso 15:28.) Ha ba etsa joalo, bara bana babo rōna ba nang le boikarabelo ba behela bohle liphuthehong tsa habo bona mohlala o motle.—Baef. 4:11, 12.

14, 15. (a) Ke litlhophiso life tse entsoeng ho re thusa hore re etse mosebetsi oa boboleli lefatšeng lohle? (b) U ikutloa joang ka karolo eo u e phethang ho tšehetsa mosebetsi oa ho bolela ka ’Muso?

 ¹⁴ Batho ba bangata ha ba bone mosebetsi o mongata o lulang o etsoa ho hlophisa lijo tsa moea tse hlahang ka hare ho lingoliloeng tsa rōna, tseo re feptjoang ka tsona libokeng le likopanong. Baithaopi ba likete ba sebetsa ka thata ho fetolela lijo tsena tsa moea ka lipuo tse ka bang 600 e le hore batho ba bangata kamoo ho ka khonehang kateng ba ka ithuta ka “lintho tse hlollang tsa Molimo” ka lipuo tsa habo bona. (Lik. 2:7-11) Bara le barali babo rōna ba bacha ba sebetsa ka thata ho hatisa lingoliloeng mechineng e hatisang ka lebelo le holimo ’me ba bile ba kopanya lingoliloeng tseo ba sebelisa mechine e li kopanyang. Ka mor’a moo ebe lingoliloeng tseo li romeloa liphuthehong ’me tse ling li romeloa likarolong tse hōle haholo tsa lefatše.

¹⁵ Ho na le litlhophiso tse ngata tse etsoang e le hore re ka tsepamisa kelello mosebetsing oa ho bolela litaba tse molemo liphuthehong tsa habo rōna. Ka mohlala, ho na le batho ba likete ba ithaopelang ho thusa mosebetsing oa ho haha Liholo Tsa ’Muso, Liholo Tsa Kopano, ho thusa batho ba anngoeng ke likoluoa tsa tlhaho kapa ba hlokang ho thusoa ka tsa kalafo, ho hlophisa likopano tse khōlō le tse nyenyane, ho ruta likolong tsa puso ea Molimo ha re bolela mesebetsi e seng mekae feela eo re sa hlokomeleng ha e ntse e etsoa. Mosebetsi oo kaofela o etsoa ka sepheo sefe? Ka sepheo sa ho re thusa hore re khone ho bolela litaba tse molemo, hore re tsoele pele ’neteng le hore re thuse batho ba bangata le ho feta hore e be barapeli ba Jehova. Ka sebele karolo e lefatšeng ea mokhatlo oa Jehova e entse hore lintho tsa bohlokoa e be tsona tse tlang pele!

16. Ke ntho efe eo le ka etsang lipatlisiso ka eona le le lelapa kapa ha u etsa thuto ea botho?

¹⁶ Na ka linako tse ling re ipha nako ea hore re nahane ka seo mokhatlo oa Jehova o ’nileng oa se etsa? Batho ba bang ba khethile hore nakong ea borapeli ba bona ba lelapa kapa nakong ea thuto ea bona ea botho ba etse lipatlisiso ka litaba tse kang tseo ’me ba thuise ka tsona. Ho ka ba monate ho ithuta ka pono ea Esaia, ea Ezekiele, ea Daniele le ea Johanne. Buka ea Lipaki tsa Jehova—Baboleli ba ’Muso oa Molimo hammoho le lingoliloeng tse ling kapa li-DVD tse teng ka puo ea heno, li ka u thusa hore u ithute lintho tse thahasellisang ka mokhatlo oa Molimo.

17, 18. (a) Sehlooho see se u thusitse joang? (b) Ke lipotso life tseo re lokelang ho ipotsa tsona?

¹⁷ Ho thuisa ka seo Jehova a se finyellang a sebelisa mokhatlo oa hae ho ka re tsoela molemo. E se eka re ka sebetsa hammoho le mokhatlo ona o tsotehang ’me re ikemisetse ho lula re tsepamisitse likelello linthong tseo e leng tsa bohlokoa haholo. Ho etsa joalo ho tla re thusa hore re be le boikemisetso bo kang boo Pauluse a neng a e-na le bona ha a ne a ngola a re: “Kaha re na le bosebeletsi bona ho ea ka mohau oo re ileng ra o bontšoa, ke ka lebaka leo, re sa teleng.” (2 Bakor. 4:1) O ile a boela a khothatsa basebetsi-’moho le eena a re: “A re se keng ra tela ho etsa se setle, kaha ka nako e loketseng re tla kotula haeba re sa khathale.”—Bagal. 6:9.

¹⁸ Na ho na le moo re lokelang ho etsa liphetoho teng re le batho ka bomong kapa re le malapa e le hore re ka nepisisa lintho tsa bohlokoa haholo bophelong ba rōna ba letsatsi le letsatsi? Na re ka nolofatsa bophelo ba rōna kapa ra fokotsa lintho tse ka re sitisang hore re tsepamise kelello mosebetsing oa bohlokoa haholo oa ho bolela litaba tse molemo? Sehloohong se latelang, re tla tšohla lintho tse hlano tse tla re thusa hore re tsamaisane le mokhatlo oa Jehova.