U Nepile, Ena ke Khatiso e Ithutoang!

BAPALA

U Nepile, Ena ke Khatiso e Ithutoang!

Re ntlafalitse khatiso e ithutoang hore e khahle mahlo haholo le hore e u thuse ha u ithuta Lentsoe la Jehova la ’nete leo e bileng e leng la bohlokoa.—Pes. 1:2; 119:97.

Lilemong tse ’nè tse fetileng re ile ra qala ho hatisa likhatiso tse peli tsa Molula-Qhooa, e ’ngoe e le ea batho bohle ’me e ’ngoe e le ea rōna Lipaki Tsa Jehova hammoho le liithuti tsa rōna tsa Bibele tse tsoelang pele.

Mabapi le khatiso e ithutoang, mohlanka e mong eo e leng khale a sebeletsa Jehova o ile a ngola a re: “Khatiso ea pele ea Molula-Qhooa o ithutoang e ne e babatseha ’me e ile ea nkama maikutlo haholo. Tsela e matla eo linnete tsa bohlokoa tsa Bibele li neng li ngotsoe ka eona e ile ea mphihla pelong. Ke le leboha haholo ka tokisetso ena e ncha e babatsehang.” Mor’a e mong oabo rōna o ile a ngola a re: “Ke labalabela ho qeta nako ke ithuta khatiso ena e ithutoang ke sebelisa le Bibele ea ka. Re tšepa hore le uena ke kamoo u ikutloang kateng.

Joalokaha u tseba, haesale Molula-Qhooa o hatisoa ho tloha ka 1879, ’me mosebetsi ona o moholo o entsoe feela ka thuso ea moea oa Jehova le tlhohonolofatso ea hae. (Zak. 4:6) Lilemong tsena tse 133, ho ’nile ha etsoa liphetoho tse ’maloa sekoahelong sa makasine ena. Selemong sa 2012, sekoahelong sa khatiso ka ’ngoe e ithutoang ho tla ba le setšoantšo se setle sa foto eo motaki oa litšoantšo a e kopilitseng ka boqhetseke se bontšang batho ba etsang mosebetsi oa boboleli, se tla re hopotsa mosebetsi oo Molimo a re fileng oona oa ho paka ka ho phethahetseng ka ’Muso oa Jehova. (Lik. 28:23) Ka hare sekoahelong sa makasine ena, leqepheng la 2, u tla bona foto eo setšoantšo seo se kopilitsoeng ho eona, u be u bone le tlhaloso e khutšoanyane ea se etsahala’ng fotong eo le hore na e nkiloe hokae. Selemo sohle, litšoantšo tsena li tla re hopotsa kaofela hore batho ba Jehova ba bolela litaba tse molemo “lefatšeng lohle leo ho ahiloeng ho lona.”—Mat. 24:14.

Liphetoho tse ling tse entsoeng makasineng ee ke life? Lebokose la tlhahlobo le se le tla ba qalong ea sehlooho ka seng se ithutoang. Le tla totobatsa lintlha tsa sehlooho tseo u lokelang ho li batla ha u bala le ha u ithuta sehlooho ka seng. Leha ho le joalo, bakhanni ba Thuto ea Molula-Qhooa ba tla ’ne ba tsoele pele ho sebelisa lipotso tsena ho etsa tlhahlobo qetellong ea thuto. U tla hlokomela hore sebaka se ka mahlakoreng ka thōko ho mengolo se atolositsoe le hore linomoro tsa maqephe le tsa lirapa li khōloanyane.

Joalokaha ho hlalositsoe makasineng ena, ho na le sehlooho se secha se reng, “Nalane ea Rōna,” se bolelang ka lintlafatso tsa bohlokoa historing ea mehleng ena ea Lipaki Tsa Jehova. Ho ekelletsa moo, ka linako tse ling ho tla hatisoa liphihlelo sehloohong se reng, “Ba Ile ba Ithaopa ka Thabo.” Li tla qaqisa thabo, khotsofalo le nyakallo tseo bara le baralib’abo rōna ba bileng le tsona ka lebaka la ho sebeletsa moo ho hlokahalang baboleli ba ’Muso ba bangata.

E se eka u ka thabela nako eo u tla e qeta u ithuta Lentsoe la Molimo u sebelisa makasine ena.

Bahatisi