Lipotso Tse Tsoang ho Babali

Haeba motho a senyeheloa na ho na le tšepo ea hore lesea leo le ka tsoha?

Ho ka ’na ha e-ba thata hore batho ba e-s’o hlokahalloe ke bana ka tsela ena ba nahane hore na ba etsahalletsoeng ke sena ba ikutloa joang. Batsoali ba bang ba sareloa haholo ka lebaka la ho shoeloa ho joalo. ’Mè e mong o ile a senyeheloa ka makhetlo a mahlano. Empa qetellong o ile a thaba ha a hōlisa bashanyana ba babeli ba phetseng hantle. Leha ho le joalo, o ne a ntse a hopola lekhetlo ka leng leo a ileng a shoeloa ke ngoana ka lona. O ne a lula a ntse a hopola hore na haeba masea ao a hae a ne a ile a phela a ka be a e-na le nako e kae. Na ho na le lebaka la hore Bakreste ba joalo ba be le tšepo ea hore bana bao ba bona ba ileng ba hlokahala ba tla tsoha?

Karabo e bonolo feela ea potso eo ke hore ha re tsebe. Ha ho moo Bibele e buang ka ho toba ka taba ea ho tsosoa ha bana ba hlahileng ba khathetse kapa ka limpa tse ileng tsa senyeha. Leha ho le joalo, Lentsoe la Molimo le na le melao-motheo e amanang le taba ena e ka ’nang ea fana ka matšeliso a itseng.

A re ke re tšohleng lipotso tse peli tse amanang. Ea pele, ho Jehova bophelo ba motho bo qala neng—nakong ea kemolo kapa ha lesea le hlaha? Ea bobeli, Jehova o nka lesea le e-s’o tsoaloe joang—e le motho ea ikhethang kapa e le feela lisele kapa linama le mesifa tse bokellaneng ka popelong ea mosali? Melao-motheo ea Bibele e fana ka likarabo tse hlakileng lipotsong tseo ka bobeli.

Molao oa Moshe o ile oa bontša ka ho hlaka hore bophelo ha bo qale nakong eo lesea le hlahang empa bo qala pejana ho moo haholo. O bontša seo joang? O bontša hore motho o ne a ka bolaoa ka lebaka la ho bolaea lesea le ka pōpelong. Hlokomela molao ona o reng: “U tla fana ka moea bakeng sa moea.” * (Ex. 21:22, 23) Kahoo, lesea le e-s’o tsoaloe le ntseng le le ka pōpelong lea phela ’me ke moea o phelang. Ho utloisisa ’nete ena e sa felloeng ke nako, ho thusitse Bakreste ba limilione ho hana ho ntša limpa kaha ba hlokomela hore ke sebe se seholo ho Molimo.

Ha re re lesea le e-s’o tsoaloe lea phela, ebe Jehova o nka bophelo ba lona e le ba bohlokoa hakae? Molao oo ho builoeng ka oona ka holimo o ne o hloka hore haeba motho e moholo a ne a ka bolaea lesea le e-s’o tsoaloe, a bolaoe. Kahoo, ho hlakile hore Molimo o nka bophelo ba lesea le e-s’o tsoaloe e le ba bohlokoa haholo. Ho feta moo, litemana tse ngata ka Mangolong li bontša hore Jehova o talima bana ba e-s’o tsoaloe e le batho ba ikhethang. Ka mohlala, Morena Davida o ile a bululeloa hore a bue sena ka Jehova: “U ile ua mpoloka ke sirelelitsoe ka mpeng ea ’Mè. . . . Mahlo a hao a ile a mpona ke sa le lesea le sa tsoa emoloa, likarolo tsohle tsa lona tsa ngoloa fatše bukeng ea hao, mabapi le matsatsi ao li ileng tsa bōptjoa ka ’ona.”—Pes. 139:13-16; Jobo 31:14, 15.

Jehova o boetse oa bona hore bana ba e-s’o tsoaloe ba na le litšobotsi tse ba khethollang le hore ba ka ba le menyetla ea lintho tse ngata nakong e tlang. Ha mosali oa Isaka Rebeka e ne e le moimana oa mafahla, Jehova o ile bolela boprofeta bo neng bo bua ka bashanyana bao ba babeli ba neng ba loantšana ka pōpelong ea hae, e leng se bontšang hore o ne a se a ntse a bona mekhoa eo ba nang le eona e neng e tla ama batho ba bangata nakong e tlang.—Gen. 25:22, 23; Bar. 9:10-13.

Taba ea Johanne Mokolobetsi le eona ea hlolla. Tlaleho ea Kosepele e re: “Eare ha Elizabetha a utloa tumeliso ea Maria, lesea le ka pōpelong ea hae la tlōla; Elizabetha a tlala moea o halalelang.” (Luka 1:41) Ha a hlalosa taba ena, ngaka Luka, o ile a sebelisa lentsoe la Segerike le ka bolelang lesea le e-s’o tsoaloe kapa le bolelang lesea ha le qeta ho hlaha. O ile a sebelisa lentsoe le tšoanang ha a bua ka Jesu ha e ne e le lesea a robalitsoe ka sejelong.—Luka 2:12, 16; 18:15.

 Ka kakaretso, na Bibele e re fa lebaka leo ka lona re ka bontšang hore ho na le phapang e khōlō pakeng tsa lesea le ka pōpelong le le sa tsoa hlaha? Ha ho bonahale joalo, ’me seo se lumellana le liphuputso tsa saense ea kajeno. Ka mohlala, bafuputsi ba ithutile hore lesea le ka pōpelong lea utloa ebile le susumetsoa ke lintho tse etsahalang ka ntle ho pōpelo ea ’m’a lona. Kahoo, ha ho makatse ha ’mè oa moimana a e-ba le kamano e haufi hakana le lesea le sa ntseng le hōla ka pōpelong ea hae.

Qetellong ha lesea le hlaha, ho ka bonahala eka le itlhahela ka nako efe kapa efe. Nahana ka mohlala ona: ’Mè e mong o ba le lesea le hlahang pele ho nako, ’me matsatsi a seng makae ka mor’a moo lea shoa. Lesea la ’mè e mong lona lea hōla ho fihlela nako ea lona ea ho hlaha e fihla empa pele le hlaha lea shoa. Ebe ’mè oa pele a ka ba le tšepo ea hore lesea la hae le tla tsosoa hobane feela le ile la hlaha pele ho nako, ha ’mè oa bobeli eena a ke ke a ba le tšepo e joalo?

Ka bokhutšoanyane, ka ho hlaka Bibele e ruta hore bophelo bo qala nakong ea kemolo le hore Jehova o nka lesea le e-s’o tsoaloe e le motho ea ikhethang ebile e le oa bohlokoa. Ka lebaka la ’nete ena ea Mangolo, ba bang ba ka ’na ba nka hore ke ho itoantša ho bolela hore ha ho na tšepo ea hore masea a shoang a e-s’o tsoaloe a tla tsoha. Ka sebele, ba ka ’na ba bolela hore maikutlo a joalo a khahlanong le tumelo ea rōna e thehiloeng Mangolong e sa lumellaneng le ho ntšoa ha mpa, eo ha e le hantle e thehiloeng linneteng tsona tseo.

Nakong e fetileng makasine ena e ’nile ea botsa lipotso tse utloahalang tseo ho bonahalang eka li etsa hore batho ba be le khoao mabapi le hore na masea a shoeleng pele a hlaha a ka tsosoa. Ka mohlala, na Paradeiseng Molimo a ka kenya ka pōpelong ea mosali lesea le neng le e-na le nakoana le emotsoe? Leha ho le joalo, ha Sehlopha se Busang se ntse se rapela ka taba ena se bile se thuisa ka eona, se ile sa fihlela qeto ea hore ho nahana lintho tse joalo ha ho hlile ha ho ame tšepo ea tsoho. Jesu o ile a re: “Lintho tsohle lia khoneha ho Molimo.” (Mar. 10:27) Se etsahetseng ho Jesu se bontša bonnete ba polelo eo; bophelo ba hae bo ile ba tlosoa leholimong ba kenngoa pōpelong ea moroetsana—e leng ntho eo ho hang motho a neng a ke ke a nahana hore e ka etsahala.

Na joale see sohle se bolela hore Bibele e ruta hore bana ba shoang pele ba tsoaloa ba tla tsosoa? Re boela re hatisa taba ea hore Bibele ha e arabe potso eo ka ho toba, kahoo, ha re na lebaka la ho tsitlella hore ho tla fela ho be joalo. Taba ena e ka ’na ea etsa hore batho ba ipotse lipotso-potso tse sa feleng. Ka sebele, ho bonahala ho le molemo hore re se ke ra ba le likhopolo-taba mabapi le taba ena. Seo re se tsebang ke sena: Taba ena e matsohong a Jehova Molimo, ea tletseng mosa o lerato le ea mohau. (Pes. 86:15) Ha ho pelaelo hore o batla ho felisa lefu ka ho tsosa batho. (Jobo 14:14, 15) Re ka kholiseha hore kamehla o etsa se nepahetseng. O tla folisa maqeba a mangata ao bophelo ba tsamaiso ena e khopo ea lintho bo re baketseng ’ona ka hore ka lerato a tataise Mora oa hae hore ‘a qhaqhe mesebetsi ea Diabolose.’—1 Joh. 3:8.

[Mongolo o botlaaseng ba leqephe]

[Setšoantšo se leqepheng la 13]

Jehova o tla folisa maqeba ’ohle a bakiloeng ke lintho tse bohloko tse ileng tsa hlahela batho