Jehova, Molimo oa ’Nete
Jehova, Molimo oa ’Nete
“U ntopolotse, Jehova Molimo oa ’nete.”—PESALEME EA 31:5.
1. Maemo a ne a le joang leholimong le lefatšeng ha ho ne ho se na leshano?
HO KILE ha e-ba le nako eo ka eona ho neng ho se na leshano. Libōpuoa tse phethahetseng tsa moea li ne li phela maholimong a sa bonahaleng, li sebeletsa ’Mōpi oa tsona, “Molimo oa ’nete.” (Pesaleme ea 31:5) Ho ne ho se na leshano, ho se na thetso. Jehova o ne a tsebisa bara ba hae ba moea seo e leng ’nete. O ne a etsa seo hobane a ba rata a bile a thahasella ka ho teba boiketlo ba bona. Boemo bo ne bo tšoana lefatšeng. Jehova o ile a bōpa monna le mosali oa pele, ’me o ne a lula a buisana le bona ka tsela e hlakileng, e tobileng le e nang le ’nete a sebelisa mocha oo a o khethileng. Seo e tlameha e ne e le se babatsehang hakaakang!
2. Ke mang ea ileng a qapa leshano, hona hobane’ng?
2 Empa hamorao mora e mong oa Molimo oa moea ka tello o ile a iketsa molimo, ea hanyetsang Jehova. Sebōpuoa sena sa moea, se ileng sa tsejoa e le Satane Diabolose, se ne se batla hore ba bang ba se rapele. E le hore se finyelle pakane ea sona, se ile sa qapa leshano e le hore se khone ho laola ba bang. Ka ho etsa joalo, se ile sa fetoha ea ‘leshano le ntate oa leshano.’—Johanne 8:44.
3. Adama le Eva ba ile ba etsa joang ha ba utloa mashano a Satane, hona ka phello efe?
3 A sebelisa noha, Satane o ile a bolella mosali oa pele, e leng Eva, hore haeba a ka hlokomoloha taelo ea Molimo ’me a ja tholoana e hanetsoeng, ha a na ho shoa. Seo e ne e le leshano. O ile a tsoela pele ho mo bolella hore ha a ka e ja o ne a tla tšoana le Molimo, a tsebe se setle le se sebe. Seo le sona e ne e le leshano. Le hoja Eva a ne a e-s’o ka a thetsoa pele, e tlameha ebe o ile a hlokomela hore seo a neng a utloa noha e se bua se ne se sa lumellane le seo Molimo a se boleletseng monna oa hae, Adama. Leha ho le joalo, o ile a khetha ho kholoa Satane, eseng Jehova. A thetsitsoe ka ho feletseng, a nka tholoana ’me a ja. Hamorao, Adama le eena a ja tholoana eo. (Genese 3:1-6) Joaloka Eva, Adama le eena, o ne a e-s’o ka a utloa leshano, empa eena o ne a sa thetsoa. (1 Timothea 2:14) O ile a bontša ka liketso hore o lahla Moetsi oa hae. Liphello tsa seo e ile ea e-ba tlokotsi molokong oa batho. Ka lebaka la ho se mamele ha Adama, sebe le lefu—hammoho le tšenyeho le masisa-pelo a ke keng a lekanngoa—li ile tsa namela baneng bohle ba hae.—Baroma 5:12.
4. (a) Ke mashano afe a ileng a buuoa Edene? (b) Re lokela ho etsa’ng e le hore re se ke ra khelosoa ke Satane?
4 Leshano le ile la boela la nama. Re lokela ho hlokomela hore mashano ao a ileng a buuoa serapeng sa Edene a ne a hlasela ho ba le ’nete ha Jehova. Satane o ile a bolela hore ka bolotsana Molimo o ne a hanela banyalani ba pele ba batho ho hong ho molemo. Ha e le hantle, ho ne ho se joalo. Adama le Eva ha baa ka ba khōla molemo oa letho ka ho se mamele ha bona. Ba ile ba shoa, feela joalokaha Jehova a ne a ba boleletse. Leha ho le joalo, Satane o ile a tsoela pele ho etselletsa Jehova, ho isa bohōleng boo lilemo tse makholo hamorao moapostola Johanne a ileng a bululeloa ho ngola hore Satane ‘o khelosa lefatše lohle leo ho ahiloeng ho lona.’ (Tšenolo 12:9) E le hore re qobe ho khelosoa ke Satane Diabolose, re lokela ho kholiseha ka ho feletseng hore Jehova o na le ’nete le hore Lentsoe la hae ke ’nete. U ka hlaolela ho tšepa Jehova ’me ua matlafatsa tšepo eo joang le ho itšireletsa thetsong le mashanong a hlohlelletsoang ke Mohanyetsi oa hae?
Jehova o Tseba ’Nete
5, 6. (a) Ke eng seo Jehova a se tsebang? (b) Seo batho ba se tsebang se joang ha se bapisoa le seo Jehova a se tsebang?
5 Nako le nako Bibele e tsebahatsa Jehova e le ea “bōpileng lintho tsohle.” (Baefese 3:9) Ke eena “Ea entseng leholimo le lefatše le leoatle le lintho tsohle tse ho tsona.” (Liketso 4:24) Kaha Jehova ke ’Mōpi, o tseba ’nete ka ntho e ’ngoe le e ’ngoe. Ka mohlala: Nahana ka motho ea etsang moralo oa ntlo ea hae le mosebetsi oohle oa ho ikahela eona. O tla tseba ntlo eo ka ntle le ka hare ’me o tla e utloisisa ho feta moshebelli leha e le ofe. Batho ba tseba lintho tseo ba li ralang le ho li etsa. Ka ho tšoanang, ’Mōpi o tseba tsohle ka lintho tseo a li bōpileng.
6 Moprofeta Esaia o ile a hlalosa ka bokheleke ho pharalla ha tsebo ea Jehova. Rea bala: “Ke mang ea lekantseng metsi ka seatla, a lekanya boholo ba maholimo ka boahlamo ba seatla ’me a akarelletsa lerōle la lefatše tekanyong eo, kapa a lekanya lithaba ka kofuto e lekanyang, le maralla ka sekala? Ke mang ea lekantseng boholo ba moea oa Jehova, ’me ke mang eo joaloka moeletsi oa hae a ka mo tsebisang letho? O rerisane hammoho le mang e le hore motho a etse hore a utloisise, kapa ke mang ea mo rutang tsela ea toka, kapa ea mo rutang tsebo, kapa ea mo tsebisang tsela ea kutloisiso ea sebele?” (Esaia 40:12-14) Ha e le hantle, Jehova ke “Molimo oa tsebo” ’me o ‘phethahetse tsebong.’ (1 Samuele 2:3; Jobo 36:4; 37:16) Ha re bapisoa le eena re tseba ho fokolang hakaakang! Ho sa tsotellehe tsebo e ngata eo batho ba e khobokantseng, seo re se utloisisang ka pōpo e bonahalang e mpa e le “linyane feela tsa litsela tsa [Molimo].” Se tšoana le “mohoeshetso” ha se bapisoa le ‘sealuma se matla.’—Jobo 26:14.
7. Davida o ile a hlokomela eng ka tsebo eo Jehova a nang le eona, kahoo re lokela ho amohela eng?
7 Kaha Jehova ke eena ea re bōpileng, hoa utloahala hore o re tseba ka hohle-hohle. Morena Davida o ile a hlokomela sena. O ile a ngola a re: “Jehova, u ntlhahlobisisitse ka hohle, ’me ua ntseba. U tseba ho lula ha ka le ho ema ha ka. U etse hloko monahano oa ka u le hōle. U lekantse leeto la ka le ho robala ha ka ke thakhaletse, u tloaelane le litsela tsohle tsa ka. Etsoe ha ho lentsoe lelemeng la ka, empa, bona! Jehova, u se u ntse u le tseba kaofela.” (Pesaleme ea 139:1-4) Ke ’nete hore Davida o ile a hlokomela hore batho ba na le bolokolohi ba ho ikhethela—Molimo o re file matla a ho ikhethela ho mo mamela kapa ho se mo mamele. (Deuteronoma 30:19, 20; Joshua 24:15) Leha ho le joalo, Jehova o re tseba ho feta kamoo re itsebang kateng. O re batlela se molemo ka ho fetisisa, ’me o boemong ba ho tataisa litsela tsa rōna. (Jeremia 10:23) Ha e le hantle, ha ho na tichere, setsebi kapa moeletsi ea hlomeletsoeng hamolemo ho re ruta ’nete le ho re hlalefisa le ho re thabisa ho mo feta.
Jehova o na le ’Nete
8. Re tseba joang hore Jehova o na le ’nete?
8 Ho tseba ’nete ho fapane hōle le ho bua ’nete kamehla, ho ba le ’nete. Ka mohlala, Diabolose o ile a khetha ho se ‘eme a tiile ’neteng.’ (Johanne 8:44) Ka lehlakoreng le leng, Jehova o ‘tletse ’nete.’ (Exoda 34:6) Mangolo a lula a paka kamoo Jehova a nang le ’nete kateng. Moapostola Pauluse o ile a re ‘ho ke ke ha khoneha hore Molimo a bue leshano,’ ’me a re Molimo a ‘ke ke a bua leshano.’ (Baheberu 6:18; Tite 1:2) Ho ba le ’nete ke karolo ea bohlokoa ea botho ba Molimo. Re ka itšetleha ka Jehova le ho mo tšepa kaha o na le ’nete; ha ho mohla a thetsang batho ba hae ba tšepahalang.
9. Lebitso la Jehova le amahanngoa le ’nete joang?
9 Lebitso la Jehova ka bolona le paka hore o na le ’nete. Lebitso la Molimo le bolela hore “O Etsa Hore ho be.” Sena se khetholla Jehova e le ea tsoelang pele ho ba Mophethahatsi oa sohle seo a se tšepisang. Ha ho e mong ea boemong boo. Kaha Jehova ke Ea Phahameng ka ho Fetisisa, ha ho letho le ka emang pele ho phethahala ha merero ea hae. Hase feela hore Jehova o na le ’nete empa ke eena feela ea nang le matla le bohlale ba ho phethahatsa tsohle tseo a li buang.
10. (a) Joshua o ile a bona joang hore Jehova o na le ’nete? (b) Ke litšepiso life tsa Jehova tseo u boneng ha li phethahala?
10 Joshua ke e mong oa ba bangata ba ileng ba bona liketsahalo tse hlollang tse pakang hore Jehova o na le ’nete. Joshua o ne a le Egepeta ha Jehova a tlisetsa sechaba seo likotlo tse leshome, a bolela e ’ngoe le e ’ngoe ea tsona esale pele. Har’a tse ling, Joshua o ile a bona ho phethahala ha tšepiso ea Jehova ea ho lopolla Baiseraele Egepeta le ho ba isa Naheng e Tšepisitsoeng, ’me a kokobetsa mabotho a matla a Bakanana a neng a ba hanyetsa. Ho elella qetellong ea bophelo ba hae, Joshua o ile a re ho banna ba hōlileng ba sechaba sa Iseraele: “Le tseba hantle ka lipelo tsa lōna tsohle le ka meea ea lōna eohle hore ha ho lentsoe leha le le leng mantsoeng ’ohle a molemo ao Jehova Molimo oa lōna a le boleletseng ’ona le hlōlehileng ho phethahala. A phethahetse kaofela bakeng sa lōna. Ha ho lentsoe leha le le leng la ’ona le hlōlehileng ho phethahala.” (Joshua 23:14) Le hoja u sa bona mehlolo eo Joshua a ileng a e bona, na u bone kamoo litšepiso tsa Molimo e leng ’nete kateng bophelong ba hao?
Jehova o Senola ’Nete
11. Ke’ng e bontšang hore Jehova o batla ho tsebisa moloko oa batho ’nete?
11 Ak’u nahane ka motsoali ea nang le tsebo e pharaletseng empa a bua seoelo le bana ba hae. Na ha u thabe hore ebe Jehova ha a joalo? Ka lerato Jehova o buisana le moloko oa batho, ’me o etsa joalo ka bolokolohi. Mangolo a re ke “Morupeli . . . e Moholo.” (Esaia 30:20) Ka mosa oa hae o lerato, o bile o buisana le ba sa ikemisetsang ho mo mamela. Ka mohlala, Ezekiele o ile a fuoa kabelo ea ho pakela batho bao Jehova a neng a tseba hore ha ba na ho amohela molaetsa. Jehova o ile a re: “Mor’a motho, tsamaea, kena har’a ba ntlo ea Iseraele, ’me u ba bolelle mantsoe a ka.” A ntan’o lemosa: “Ba ke ke ba batla ho u mamela, etsoe ha ba batle ho ’mamela; hobane bohle ba ntlo ea Iseraele ba lihlooho li thata ’me ba lipelo li thata.” Eo e ne e le kabelo e thata, empa Ezekiele o ile a e phethahatsa ka botšepehi, ’me ka ho etsa joalo a bonahatsa qenehelo ea Jehova. Haeba u iphumana u paka kabelong e thata ’me u itšetlehile ka Molimo, u ka kholiseha hore o tla u matlafatsa joalokaha a ile a matlafatsa moprofeta oa hae Ezekiele.—Ezekiele 3:4, 7-9.
12, 13. Molimo o buisane le batho ka litsela life?
12 Jehova o lakatsa hore “batho ba mefuta eohle ba pholohe ’me ba fihle tsebong e nepahetseng ea ’nete.” (1 Timothea 2:4) O buile ka baprofeta, ka mangeloi, esita le ka Mora oa hae ea ratoang, Jesu Kreste. (Baheberu 1:1, 2; 2:2) Jesu o ile a re ho Pilato: “Ke tsoaletsoe sena, ’me ke tletse sena lefatšeng, hore ke pakele ’nete. E mong le e mong ea leng ka lehlakoreng la ’nete o mamela lentsoe la ka.” Pilato o ne a e-na le monyetla o babatsehang oa ho ithuta ’nete e mabapi le tokisetso ea Jehova ea poloko a ikutloela ka ho toba ho Mora oa Molimo. Empa Pilato o ne a se ka lehlakoreng la ’nete, ’me ha aa ka a batla ho ithuta ho Jesu. Ho e-na le hoo, Pilato o ile a re ka ho nyatsa: “’Nete ke eng?” (Johanne 18:37, 38) O ile a itšoetsa hakaakang! Leha ho le joalo, ba bangata ba ile ba mamela ’nete eo Jesu a neng a e phatlalatsa. O ile a re ho barutuoa ba hae: “Ho thaba mahlo a lōna hobane aa bona, le litsebe tsa lōna hobane lia utloa.”—Matheu 13:16.
13 Jehova o sebelisitse Bibele ho boloka ’nete ’me o entse hore batho ba e fumane libakeng tsohle. Bibele e senola lintho kamoo li hlileng li leng kateng. E hlalosa litšobotsi tsa Molimo, merero ea hae le litaelo tsa hae le ho hlalosa boemo ba sebele ba moloko oa batho. Jesu o ile a re thapelong ho Jehova: “Lentsoe la hao ke ’nete.” (Johanne 17:17) Ka lebaka lena, Bibele ke buka e ikhethang. Ke eona feela e ngotsoeng ka pululelo ea Molimo ea tsebang tsohle. (2 Timothea 3:16) Ke mpho ea bohlokoa ho batho, eo bahlanka ba Molimo ba e nkang e le letlotlo. Re lokela ho e bala letsatsi le letsatsi.
Tšoarella ka Tieo ’Neteng
14. Lintho tse ling tseo Jehova a reng o tla li etsa ke life, hona ke hobane’ng ha re lokela ho mo lumela?
14 Re lokela ho nka ka ho teba seo Jehova a re bolellang sona ka Lentsoeng la hae. O seo a reng o sona, ’me o tla etsa seo a reng o tla se etsa. Re na le mabaka a utloahalang a ho tšepa Molimo. Re lokela ho lumela ha Jehova a re o tla tlisa “phetetso holim’a ba sa tsebeng Molimo le ba sa mameleng litaba tse molemo tse mabapi le Morena oa rōna Jesu.” (2 Bathesalonika 1:8) Re boetse re lokela ho lumela ha Jehova a re o rata ba phehellang ho loka, ha a re o tla fa ba bontšang tumelo bophelo bo sa feleng le ha a re o tla felisa bohloko, ho bokolla, esita le lefu. Jehova o ile a tiisa ho tšepahala ha tšepiso ena ea ho qetela ka ho fa moapostola Johanne taelo e reng: “Ngola, hobane mantsoe ana aa tšepahala ’me ke a ’nete.”—Tšenolo 21:4, 5; Liproverbia 15:9; Johanne 3:36.
15. A mang a mashano ao Satane a a hlohlelletsang ke afe?
15 Satane o fapane ka ho feletseng le Jehova. Ho e-na le ho beha batho leseling, oa ba thetsa. E le hore a finyelle pakane ea hae ea ho furallisa batho borapeli bo hloekileng, Satane o hlohlelletsa letoto la mashano. Ka mohlala, Satane o batla hore re lumele hore Molimo ha a amehe ebile ha a tsotelle ha re hlaheloa ke mahlomola lefatšeng. Empa Bibele e bontša hore Jehova o tsotella libōpuoa tsa hae ka ho teba le hore o utloisoa bohloko ke bobe le mahlomola. (Liketso 17:24-30) Satane o boetse o batla hore batho ba lumele hore ho hahamalla lintho tsa moea ke tšenyo ea nako. Ka lehlakoreng le leng, Mangolo a re tiisetsa hore “Molimo hase ea sa lokang hoo a ka lebalang mosebetsi oa lōna le lerato leo le ileng la le bontša bakeng sa lebitso la hae.” Ho feta moo, a bolela ka ho hlaka hore “e ba moputsi oa ba mo batlang ka tieo.”—Baheberu 6:10; 11:6.
16. Ke hobane’ng ha Bakreste ba lokela ho lula ba falimehile ’me ba itšoareletse ka tieo ’neteng?
16 Moapostola Pauluse o ile a ngola sena ka Satane: “Molimo oa tsamaiso ena ea lintho [o foufalitse] likelello tsa ba sa lumelang, e le hore khanya ea litaba tse molemo tse khanyang tse mabapi le Kreste, eo e leng setšoantšo sa Molimo, e se ke ea khanya.” (2 Bakorinthe 4:4) Joaloka Eva, ba bang Satane Diabolose o ba thetsitse ka ho feletseng. Ba bang ba hata mohlaleng oa Adama, ea sa kang a thetsoa empa a ikhethela ka boomo ho se mamele. (Juda 5, 11) Kahoo, ho hlokahala hore Bakreste ba lule ba falimehile ’me ba itšoarelle ka tieo ’neteng.
Jehova o Batla ‘Tumelo e se Nang Boikaketsi’
17. Re lokela ho etsa eng e le hore Jehova a re hauhele?
17 Kaha Jehova o na le ’nete litseleng tsohle tsa hae, o lebeletse hore ba mo rapelang le bona ba be le ’nete. Mopesaleme o ile a ngola: “Jehova, ke mang eo e tla ba moeti tenteng ea hao? Ke mang ea tla lula thabeng ea hao e halalelang? Ke ea tsamaeang ka mokhoa o se nang molato ’me a etsa ho loka ebile a bua ’nete ka pelong ea hae.” (Pesaleme ea 15:1, 2) Ha ho pelaelo hore ha ho buuoa ka thaba ea Jehova e halalelang, Bajuda ba neng ba bina mantsoe ao ba ile ba hopola Thaba ea Sione, e leng moo Morena Davida a ileng a tlisa areka ea selekane teng tenteng eo a neng a e hlomme moo. (2 Samuele 6:12, 17) Thaba le tente li hopotsa motho sebaka seo Jehova a lulang ho sona ka tsela ea tšoantšetso. Ke moo batho ba neng ba ka khona ho atamela Molimo teng ho kōpa mohau oa hae ka tieo.
18. (a) Ho hlokahala eng hore motho e be motsoalle oa Molimo? (b) Ho tla tšohloa eng sehloohong se latelang?
18 Motho leha e le ofe ea batlang ho ba motsoalle oa Jehova o lokela ho bua ’nete “ka pelong ea hae,” eseng ka molomo feela. Metsoalle ea Molimo ea sebele e lokela ho ba le pelo e tšepahalang ’me e fane ka bopaki ba ‘tumelo e se nang boikaketsi,’ kaha ho etsa se nang le ’nete ho tsoa pelong. (1 Timothea 1:5; Matheu 12:34, 35) Motsoalle oa Molimo ha a na mano kapa thetso, kaha “Jehova o hloile motho . . . ea thetsang.” (Pesaleme ea 5:6) Lipaki Tsa Jehova lefatšeng ho pota li ikitlaelletsa ho ba le ’nete e le ha li etsisa Molimo oa tsona. Sehlooho se latelang se tla tšohla taba ena.
U ka Araba Joang?
• Ke hobane’ng ha Jehova a tseba ’nete ka ntho e ’ngoe le e ’ngoe?
• Ke eng e bontšang hore Jehova o na le ’nete?
• Jehova o senotse ’nete joang?
• Ke’ng se hlokahalang ho rōna mabapi le ’nete?
[Lipotso Tsa Sehlooho se Ithutoang]
[Litšoantšo tse leqepheng la 10]
Molimo oa ’nete o tseba ntho e ’ngoe le e ’ngoe ka lintho tseo a li bōpileng
[Litšoantšo tse leqepheng la 13]
Litšepiso tsa Jehova li tla phethahala