HA MOTHO e mong a bososela le uena, u ee u etse’ng? Hangata le uena oa bososela. Ebe u ikutloa u thabile. Ka sebele ho ba monate ha batho ba bang ba bososela le rona, ho sa tsotellehe hore na ke metsoalle kapa ke batho bao re sa ba tsebeng. Mosali e mong ea bitsoang Magdalena o re: “Monna oa ka Georg o ne a lula a bososela. Ha re ne re shebana, ke ne ke ikutloa ke phutholohile hape ke sireletsehile.”

Ha motho a bososela o bontša hore o thabile le hore o khotsofetse. Makasine ea Observer ea Association for Psychological Science e re: “Ho bonahala eka ho bososela ho bopelletsoe ka hare ho rona. Le bana ba qetang ho hlaha ba khona ho bona hore na motho o ikutloa joang ka ho mo sheba sefahlehong feela”. E tsoela pele ka ho re: “Ha re bona batho ba bang ba bososela re susumelletseha hore le rona re bososele.”

Bafuputsi ba Harvard University e United States ba ile ba etsa lipatlisiso ho bona hore na ho etsahalang ka bakuli ba seng ba holile ha bahlokomeli ba bona ba bososela le ha ba sa bososele. Bafuputsi ba bontšitse hore ha bahlokomeli ba ne ba bososela, bakuli ba ne ba khotsofala hape ba ikutloa ba le betere. Empa ho ne ho etsahala  se fapaneng haeba ba ne ba sa bososele.

Ho bososela ho na le melemo e meng. Liphuputso li bontša hore ho bososela ho ka u thusa hore u itšepe haholoanyane, u thabe ’me u se ke oa tšoenyeha haholo. Ho fapana le hoo haeba u sa bososele ho ka etsahala hore u se ke oa thaba.

Magdalena eo ho builoeng ka eena pejana e ne e le Paki ea Jehova nakong ea Ntoa ea II ea Lefatše. O ile a isoa kampong ea mahloriso ea Ravensbrück e Germany le ba lelapa labo hobane ba sa lumellane le lithuto tsa Manazi. Magdalena o ile a re: “Ka linako tse ling balebeli ba ne ba re thibela ho bua le batšoaruoa ba bang. Empa ba ne ba sa khone ho re thibela ho bososela. Ho bona ha ’Mè le ausi oa ka ba bososela, ho ile ha etsa hore ke khothale ’me ha nthusa hore ke mamelle.”

Ho ka etsahala hore ebe u na le mathata ’me seo se etsa hore u se ke oa thaba. Hopola hore hangata maikutlo a bakoa ke lintho tseo u li nahanang. (Liproverbia 15:15; Bafilipi 4:8, 9) Kahoo, ke hobane’ng ha u sa leke ho nahana ka lintho tse tla etsa hore u thabe? * Ho bala Bibele le ho rapela ho thusitse batho ba bangata ho nahana ka lintho tse tla etsa hore ba thabe. (Matheu 5:3; Bafilipi 4:6, 7) Ha e le hantle, mantsoe ana “ho thaba” a hlaha ka makhetlo a makholo ka Bibeleng! Ikemisetse ho bala leqephe le le leng la Bibele kapa a mabeli letsatsi ka leng. Ho tseba mang? Mohlomong le uena u ka iphumana u bososela kamehla.

U se ke oa emela hore ba bang ba bososele le uena pele. Ho e-na le hoo, bososela pele ’me u etse hore ba bang le bona ba thabe. Ruri ho bososela ke mpho e tsoang ho Molimo eo re ka e arolelanang le ba bang.