Ha re ntse re itokisetsa ho ithuta, re ka ’na ra ipotsa, ‘Ke eng seo ke lebeletseng ho ithuta sona?’ Empa re lokela ho hopola hore le hoja ho e-na le lintho tseo re lebeletseng ho ithuta tsona, seo ha se bolele hore ha ho na lintho tse ncha tseo Jehova a batlang ho re ruta tsona. Ke eng e tla re thusa ho mamela seo Jehova a batlang hore re ithute sona?

Rapella bohlale. Kopa Jehova hore a u thuse ho utloisisa lintho tseo a batlang hore u ithute tsona hona joale. (Jak. 1:5) Ikemisetse ho ithuta lintho tse ncha.—Liprov. 3:​5, 6.

Lumella matla a lentsoe la Molimo hore a sebetse bophelong ba hao. “Lentsoe la Molimo lea phela.” (Baheb. 4:12) Ka hona, nako le nako ha re bala Bibele, re ka ithuta lintho tse itseng tse ncha le ho fumana lintlha tse fapaneng tse ka re thusang bophelong. Leha ho le joalo, seo se tla etsahala feela ha re lumella lentsoe la Molimo hore le re rute.

Ananela lintho tsohle tseo Jehova a li sebelisang ho re ruta. Lintho tseo a re fang tsona ho matlafatsa tumelo ea rona li tšoana le “mokete oa lijo tsa maemo.” (Esa. 25:6) U se ke oa qoba ho bala lihlooho tseo u nahanang hore u ke ke oa thabela ho ithuta tsona. Ha u etsa joalo u tla be u lumella Molimo hore a u thuse u be motho ea molemo ’me u tla thabela ho ithuta.