1. Ke boemo bofe bo boima boo Joase, Uzia le Josiase ba ileng ba e-ba ho bona?

 U NE u ka ikutloa joang haeba u ne u ka ba morena oa batho ba Molimo u sa le tlase haholo lilemong? U ne u ka sebelisa matla a hao le bolaoli joang? Bibele e re bolella ka bacha ba ’maloa bao e ileng ea e-ba marena Juda. Ka mohlala, Joase e ile ea e-ba morena ha a le lilemo li supileng, Uzia li le 16, ha Josiase eena li ne li le robeli. Ho ka etsahala hore ebe ho ba marena ba sa le banyenyane joalo ho ne ho le boima ho bona. Ho sa tsotellehe seo, Jehova le batho ba bang ba ile ba ba thusa ho etsa lintho ka tsela e nepahetseng.

2. Ke hobane’ng ha ho le bohlokoa hore re ithute mehlaleng ea Joase, Uzia le Josiase?

² Le hoja re se marena kapa mafumahali, re ka ithuta ho hongata mohlaleng oa Joase, oa Uzia le oa Josiase. Ba ile ba etsa liqeto tse nepahetseng le tse fosahetseng. Ha re ntse re ithuta mehlaleng ea bona, re tla bona hore na ke hobane’ng ha re lokela ho ba bohlale ha re khetha metsoalle, ho lula re ikokobelitse le ho lula re ikemiselitse ho sebeletsa Jehova.

3. Moprista ea Phahameng Jehojada o ile a thusa Morena Joase ho etsa liqeto tse bohlale joang?

³ Etsa liqeto tse bohlale joaloka Joase. Morena Joase o ile a etsa liqeto tse bohlale ha a sa le monyenyane. Kaha o ne a se na ntate, o ile a latela tataiso ea monna ea tšepahalang e leng Moprista ea Phahameng Jehojada. Moprista eo o ile a ruta Joase joalokaha eka ke mora oa hae. Ka lebaka leo, Joase o ile a etsa qeto e bohlale ka ho sebeletsa Jehova le ho thusa sechaba sohle hore le sona se mo sebeletse. O ile a ba a qala mosebetsi oa ho lokisa tempele ea Jehova.—2 Likron. 24:​1, 2, 4, 13, 14.

4. Ho mamela le ho rata litaelo tsa Jehova ho re tsoela molemo joang? (Liproverbia 2:​1, 10-12)

 ⁴ Haeba batsoali ba hao kapa motho e mong a u ruta ho rata Jehova le ho mamela melao le melao-motheo ea hae, tseba hore eo ke mpho ea bohlokoa. (Bala Liproverbia 2:​1, 10-12.) Batsoali ba ka sebelisa litsela tse fapaneng ho ruta bana ba bona. Hlokomela kamoo ntate oa Morali oa bo rona Katya a ileng a mo thusa ho etsa liqeto tse nepahetseng. Letsatsi le leng le le leng ha a ne a mo isa sekolong, ba ne ba buisana ka temana ea letsatsi. Morali oa bo rona Katya o re: “Lipuisano tseo li ne li nthusa ho etsa lintho tse nepahetseng ha ke ne ke kopana le liteko letsatsi ka leng.” Ho thoe’ng teng haeba batsoali ba hao ba etsa melao ba ipapisitse le seo Bibele e se rutang empa u utloa eka melao eo ha e u fe bolokolohi boo u bo batlang? U ka thusoa ke’ng hore u ba mamele? Morali oa bo rona Anastasia o hopola hore batsoali ba hae ba ne ba ipha nako ea ho mo hlalosetsa hore na ke hobane’ng ha ba entse melao e itseng. O re: “Seo ba neng ba se etsa se ile sa nthusa ho utloisisa hore ba ne ba sa etse melao feela ho ntaola empa ho ntšireletsa hobane ba nthata.”

5. Liketso tsa hao li ka ama Jehova le batsoali ba hao joang? (Liproverbia 22:6; 23:​15, 24, 25)

⁵ Batsoali ba hao ba tla thaba ha u mamela likeletso tsa bona tse thehiloeng Bibeleng. Habohlokoa le ho feta ke hore u tla thabisa Molimo ’me kamano ea hao le eena e tla ba matla le ho feta. (Bala Liproverbia 22:6; 23:​15, 24, 25.) Ao ke mabaka a utloahalang a ho etsisa mohlala oa Joase ha a sa le monyenyane.

6. Ka mor’a hore Jehojada a shoe, Joase o ile a qala ho mamela likeletso tsa bo-mang, hona litla-marao e bile life? (2 Likronike 24:​17, 18)

⁶ Ithute liqetong tse fosahetseng tseo Joase a ileng a li etsa. Ka mor’a hore Jehojada a shoe, metsoalle ea Joase e ile ea mo susumeletsa ho etsa lintho tse fosahetseng. (Bala 2 Likronike 24:​17, 18.) O ile a mamela likhosana tsa Juda tse neng li sa sebeletse Jehova. U ka ’na oa lumela hore Joase o ne a lokela hore ebe o ile a qoba likhosana tseo hobane li ne li etsa lintho tse fosahetseng. (Liprov. 1:10) Ho e-na le hoo, o ile a mamela likeletso tsa tsona tse booatla. Ho hobe le ho feta ke hore ha motsoala oa hae Zakaria a leka ho mo eletsa, Joase o ile a laela hore a bolaoe. (2 Likron. 24:​20, 21; Mat. 23:35) Eo e bile ketso e mpe le e booatla hakaakang! Joase o ile a qala a etsa lintho hantle empa ka masoabi o ile a fetoha mokoenehi le ’molai. Qetellong bahlanka ba hae ba ile ba mo bolaea. (2 Likron. 24:​22-25) Lintho li ka be li ile tsa mo tsamaela hantle hoja a ile a tsoela pele a mamela Jehova le batho ba mo ratang. U ka ithuta’ng mohlaleng oo?

7. U lokela ho khetha metsoalle e joang? (Sheba setšoantšo.)

 ⁷ Ntho e ’ngoe eo re ithutang eona liqetong tse fosahetseng tseo Joase a ileng a li etsa ke hore re lokela ho khetha metsoalle e ratang Jehova ebile e ikemiselitse ho mo thabisa. Metsoalle e joalo e tla re thusa ho etsa lintho tse nepahetseng. Re ka ba metsoalle le batho ba baholo kapa ba banyenyane ho rona. Hopola hore Joase o ne a le monyenyane haholo ho motsoalle oa hae Jehojada. Ha u khetha metsoalle ipotse lipotso tsena: ‘Na e nthusa ho ba le kamano e matla le Jehova? Na e nthusa ho mamela melao le melao-motheo ea Molimo? Na e bua ka Jehova le ka lintho tsa bohlokoa tseo a re rutang tsona? Na e mamela melao le melao-motheo ea Molimo? Na e mpolella lintho tseo nka thabelang ho li utloa feela kapa na e ba le sebete sa ho nkeletsa ha ke kheloha?’ (Liprov. 27:​5, 6, 17) Ho hlakile hore haeba metsoalle ea hao e sa rate Jehova, ha u e hloke. Empa haeba metsoalle ea hao e rata Jehova, u se ke oa e tlohela hobane e tla ba le tšusumetso e ntle ho uena.—Liprov. 13:20.

8. Haeba re sebelisa mecha ea puisano, ke lipotso life tseo re lokelang ho ipotsa tsona?

⁸ Mecha ea puisano e re thusa ho lula re buisana le ba malapa a rona kapa metsoalle. Leha ho le joalo, batho ba bangata ba sebelisa mecha ena ho khahlisa batho ba bang ka ho beha litšoantšo le livideo tsa lintho tseo ba li rekileng kapa tseo ba li finyeletseng. Haeba u sebelisa mecha ea puisano, ipotse: ‘Na morero oa ka ke ho khahlisa batho ba bang? Na ke beha lintho tse tla haha batho ba bang kapa tse tla etsa hore ba nthorise? Na ke lumella lintho tseo batho ba bang ba li behang ho ba le tšusumetso e mpe tseleng eo ke nahanang ka eona, eo ke buang ka eona kapa eo ke etsang lintho ka eona?’ Mor’abo rona Nathan Knorr eo e neng e le setho sa Sehlopha se Busang o ile a fana ka keletso ena: “U se ke oa leka ho thabisa batho hobane u ke ke oa atleha. Thabisa Jehova ’me u tla thabisa le bohle ba mo ratang.”

9. Jehova o ile a thusa Morena Uzia ho etsa’ng? (2 Likronike 26:​1-5)

⁹ Etsa liqeto tse nepahetseng joaloka Uzia. Morena Uzia o ne a ikokobelitse ha a sa le mocha. O ile a ithuta “ho hlompha Molimo oa ’nete.” O phetse lilemo tse 68 ’me boholo ba nako eo a e phetseng, Jehova o ile a mo hlohonolofatsa. (Bala 2 Likronike 26:​1-5.) Morena Uzia o ile a hlola lichaba tse ngata tseo e neng e le lira tsa sechaba sa hae a ba a etsa hore lebotho la Jerusalema le be matla. (2 Likron. 26:​6-15) Re kholisehile hore Morena Uzia o ne a thabile ka lebaka la lintho tseo Molimo a ileng a mo thusa ho li etsa.—Moek. 3:​12, 13.

10. Ke’ng e ileng ea etsahalla Morena Uzia?

¹⁰ Ithute liqetong tse fosahetseng tseo Uzia a ileng a li etsa. Morena Uzia o ne a tloaetse ho laela ’me ho ka etsahala hore ebe sena se ile sa etsa hore a nahane hore a ka etsa eng kapa eng eo a e batlang. Ka letsatsi le leng, Morena Uzia o ile a ea tempeleng ea Jehova ’me ka boikhohomoso a leka ho chesa libano aletareng e leng seo marena a neng a sa lokela ho se etsa. (2 Likron. 26:​16-18) Moprista ea Phahameng Azaria o ile a leka ho mo khalemela empa sena se ile sa halefisa Uzia haholo. Ka masoabi, Uzia o ile a hloleha ho lula a tšepahala ’me Jehova o ile a mo otla ka lepera. (2 Likron. 26:​19-21) Lintho li ka be li mo tsamaetse hantle hoja o ile a tsoela pele a ikokobelitse.

11. Re ka bontša joang hore re ikokobelitse? (Sheba setšoantšo.)

¹¹ Ha Morena Uzia a se a le matla, o ile a khaotsa ho bontša hore o ananela lintho tsohle tse molemo tseo Jehova a neng a mo etselitse tsona. Re ithuta’ng? Kamehla re lokela ho hopola hore ke Jehova ea re fang lintho tsohle tse molemo  tseo re li thabelang bophelong le tšebeletsong ea hae. Ho e-na le ho ithorisa ka lintho tseo re li entseng, re lokela ho lula re leboha Jehova ka lintho tsohle tseo a re thusang ho li etsa. b (1 Bakor. 4:7) Kaha ha rea phethahala, re lokela ho ikokobetsa ’me re amohele khalemelo. Mor’abo rona ea lilemo li ka bang 60 o ile a re: “Ke ithutile hore ha kea lokela ho nyahama kapa ho koata ha batho ba bang ba hlokomela liphoso tsa ka. Ha ke khalemelloa liphoso tse nyenyane tseo ke li entseng, ke leka kahohle ho ntlafatsa le ho tsoela pele ke sebeletsa Jehova ka pelo eohle.” Ke ’nete hore ha re mamela Jehova ebile re lula re ikokobelitse, lintho li tla re tsamaela hantle bophelong.—Liprov. 22:4.

12. Ke joang Josiase a ileng a sebeletsa Jehova ha a sa le mocha? (2 Likronike 34:​1-3)

¹² Etsa liqeto tse nepahetseng joaloka Josiase. Ha Josiase e sa le moshanyana, o ile a qala ho sebeletsa Jehova. O ne a batla ho ithuta ka Jehova le ho etsa thato ea hae. Leha ho le joalo, ho ne ho se bonolo. O ile a tlameha ho emela borapeli bo hloekileng nakong eo borapeli ba bohata bo neng bo atile. O ile a fela a etsa joalo. Pele Josiase a ka ba lilemo li 20, o ile a qala ho felisa borapeli ba bohata naheng eohle.—Bala 2 Likronike 34:​1-3.

13. Ho inehela ho Jehova ho tla ama bophelo ba hao joang?

¹³ U ka etsisa Josiase ka ho sebeletsa Jehova le ho ithuta ho ananela makhabane a hae le haeba u le monyenyane haholo. Ha u etsa joalo, u tla batla ho inehela ho Jehova. Boinehelo boo bo tla ama bophelo ba hao joang letsatsi le letsatsi? Luke ea kolobelitsoeng ha a le lilemo li 14 o re: “Ho tloha hona joale ho ea pele, ke tla etsa hore ho sebeletsa Jehova le ho mo thabisa e be eona ntho e tlang pele bophelong ba ka.” (Mar. 12:30) E tla ba tlhohonolofatso e kaakang haeba le uena u ikemiselitse ho etsa ntho e tšoanang!

14. Fana ka mehlala ea kamoo bacha ba bang ba etsisang Morena Josiase.

¹⁴ Ke liteko life tseo uena mocha ea sebeletsang Jehova u ka tobanang le tsona? Johan ea ileng a kolobetsoa ha a le lilemo li 12 o re bana bao a kenang sekolo le bona ba ile ba leka ho mo susumeletsa ho tsuba (vaping). E le hore  a khone ho hlola tšusumetso eo, Johan o ne a lula a ikhopotsa hore ho tsuba ho ka ama bophelo ba hae hampe ha ba ha senya setsoalle sa hae le Jehova. Rachel ea ileng a kolobetsoa ha a le lilemo li 14 o hlalosa hore na ke’ng e mo thusang ho hlola liteko tseo a tobanang le tsona sekolong. O re: “Ke leka ho sheba lintho tse nkhopotsang seo ke ithutileng sona Bibeleng. Ka mohlala, seo re ithutang sona tlelaseng ea histori se ka nkhopotsa tlaleho e itseng ea Bibele kapa boprofeta. Kapa ka linako tse ling ha ke buisana le bana bao ke kenang sekolo le bona, ke hopola lengolo la bohlokoa leo nka buisanang le bona ka lona.” Ke ’nete hore liteko tseo u tobanang le tsona li ka fapana le tseo Morena Josiase a ileng a ba le tsona empa le uena u ka etsa lintho ka bohlale oa ba oa lula u tšepahalla Jehova. Ho sebetsana le liteko u sa le mocha ho tla u thusa ho sebetsana le liteko tseo u tla tobana le tsona ha u se u le moholo.

15. Ke’ng e ileng ea thusa Morena Josiase ho sebeletsa Jehova ka botšepehi? (2 Likronike 34:​14, 18-21)

¹⁵ Ha Morena Josiase a le lilemo li 26, o ile a qala ho nchafatsa tempele. Ha ho ntse ho etsoa mosebetsi oo, ho ile ha fumanoa “buka ea Molao oa Jehova oo a neng a fane ka oona a sebelisa Moshe.” Ha morena a utloa mantsoe ao, o ile a laela hore ho etsoe lintho tse neng li ngotsoe bukeng eo. (Bala 2 Likronike 34:​14, 18-21.) Na u batla ho bala Bibele kamehla? Haeba u se u qalile, na hoa u natefela? Na u tšoaea litemana tsa Bibele tse ka u thusang? Luke eo re buileng ka eena pejana, o ngola fatše lintlha tseo a li thabetseng ha a ntse a ithuta. Ho etsisa mohlala o tšoanang ho ka u thusa ho hopola litemana tsa Bibele kapa lintlha tseo u li thabetseng ha u ntse u ithuta. Ha u rata Bibele haholo ebile u e utloisisa, seo se tla etsa hore u batle ho sebeletsa Jehova le ho feta. Joalokaha buka ea Molao e ile ea thusa Morena Josiase ho etsa se nepahetseng, le uena ho ithuta Lentsoe la Molimo ho tla u tsoela molemo.

16. Ke hobane’ng ha Josiase a ile a etsa phoso e ileng ea etsa hore a bolaoe, hona re ka ithuta eng phosong eo?

¹⁶ Ithute qetong e fosahetseng eo Josiase a  ileng a e etsa. Ha Josiase a le lilemo li ka bang 39, o ile a etsa phoso e ileng ea etsa hore a bolaoe. O ile a itšepa ho e-na le ho kopa tataiso ho Jehova. (2 Likron. 35:​20-25) Re ithuta’ng? Ho sa tsotellehe hore na re baholo hakae kapa hore na re na le nako e kae re ithuta Bibele, re lokela ho tsoela pele re batla tataiso ea Jehova. Sena se akareletsa hore kamehla re rapelle tataiso ea hae, re ithute Lentsoe la hae le ho mamela likeletso tsa Bakreste ba nang le boiphihlelo. Sena se ka etsa hore re thabe bophelong re be re qobe ho etsa liphoso tse kholo.—Jak. 1:25.

17. Re ka ithuta’ng mehlaleng ea marena a mararo a Juda?

¹⁷ Ho na le lintho tse ngata tse thabisang tseo u ka li etsang ha u ntse u le mocha. Mehlala ea Joase, Uzia le Josiase ea bontša hore bacha ba ka etsa liqeto tse bohlale ’me ba thabisa Jehova. Ke ’nete hore marena ao a ile a etsa liphoso tse ileng tsa etsa hore a hlaheloe ke lintho tse bohloko. Leha ho le joalo, haeba re etsisa lintho tse ntle tseo a ileng a li etsa le ho qoba ho etsa liphoso tse tšoanang le tseo a ileng a li etsa, re ka kholiseha hore lintho li tla re tsamaela hantle bophelong.

18. Ke mehlala ea bo-mang e hlahang ka Mangolong e bontšang hore u ka thaba bophelong? (Sheba setšoantšo.)

¹⁸ Mangolo a na le mehlala ea bacha ba bang ba ileng ba atamela ho Jehova’me a ba amohela eaba lintho li ba tsamaela hantle bophelong. Davida ke e mong oa bona. Ha a sa le mocha, o ile a khetha ho ba motsoalle oa Molimo ’me hamorao ea e-ba morena ea tšepahalang. Ke ’nete hore ka linako tse ling o ile a etsa liphoso. Leha ho le joalo, Molimo o ile a mo nka a tšepahala. (1 Mar. 3:6; 9:​4, 5; 14:8) Ho ithuta ka Davida ho ka re susumeletsa ho sebeletsa Jehova ka botšepehi. Hape u ka ithuta haholoanyane ka Mareka kapa Timothea. Ba ile ba sebeletsa Jehova ka botšepehi ho tloha ha ba sa le banyenyane. Ba ile ba thabisa Molimo ka ho etsa qeto ea ho mo sebeletsa ’me le bona ba thaba bophelong.

19. U batla hore bophelo ba hao bo be joang?

¹⁹ Tsela eo u phelang ka eona hona joale e tla ama tsela eo bophelo ba hao bo tla ba ka eona nakong e tlang. Ho tšepa Jehova ho e-na le ho itšepa ho tla u thusa hore u etse liqeto tse bohlale. (Liprov. 20:24) U tla phela bophelo bo monate le bo molemo. Hopola hore Jehova o ananela seo u mo etsetsang sona. Na ho na le tsela e molemo ho feta ho sebelisa bophelo ba rona ho sebeletsa Ntate oa rona ea leholimong, Jehova?