Pono ea Bibele

Sepheo sa Motsoali ke Sefe?

LINTHONG tse thathamisitsoeng ka tlaase moo, u ka rata hore ngoana oa hao e be motho oa mofuta ofe ha a se a hōlile?

A. A tšoane le uena hantle.

B. E be lerabele leo morero oa lona e leng ho ba ea fapaneng le uena.

C. E be motho ea nang le boikarabelo, ea etsang liqeto tse bohlale ha a se a hōlile.

Batsoali ba bang ba khethang C ba ka ’na ba etsa lintho ka tsela e bontšang hore ba rata ho khetha A. Ba leka ho qobella bana ba bona ba lilemong tsa bocha hore ba phele ka tsela eo bona joaloka batsoali ba e batlang, mohlomong ka ho ba bolella hore na ba khethe mosebetsi ofe. Phello e ka ba efe? E ka ba hore hang feela ha a fumana tokoloho e itseng a iketsetse se fapaneng. Se makatsang ke hore batsoali ba bangata ba labalabelang ho khetha A ba qetella ba e-na le bana ba hlalosoang khethong ea B.

Lebaka Leo ho Leka ho Laola Bana ka ho Feletseng ho sa Atleheng

U batla hore ngoana oa hao ea lilemong tsa bocha e be motho ea nang le boikarabelo le ea etsang liqeto tse bohlale ha a se a hōlile. Leha ho le joalo, u ka finyella sepheo seo joang? Kholiseha ka sena: Ho laola mocha ka ho feletseng hase tharollo. Nahana ka mabaka a mabeli.

1. Tsela ea ho mo laola ka ho feletseng ha e lumellane le Mangolo. Jehova Molimo o bōpile batho ba e-na le bolokolohi ba ho ikhethela. O lumella batho hore ba khethe tsela eo ba tla e nka bophelong, ebang ke e ntle kapa ke e mpe. Ka mohlala, ha Kaine a ne a koetletse moen’ae Abele lehloeo le neng le ka etsa hore a mo bolaee, Jehova o ile a re ho eena: “Haeba u fetoha hore u etse se molemo, na ho phahamisoa ho ke ke ha e-ba teng? Empa haeba u sa fetohe hore u etse se molemo, sebe se laletse monyako, ebile sea u lakatsa, na u tla se laola?”—Genese 4:7.

Hlokomela hore le hoja Jehova a ile a fa Kaine temoso e hlakileng ha aa ka a mo qobella hore a e mamele. Kaine o ne a tlameha ho khetha hore na o tla laola bohale ba hae kapa che. Ke eng seo re ithutang sona tabeng ee? Haeba Jehova a sa leke ho laola libōpuoa tsa hae ka ho feletseng e le hore li mo mamele, le uena ha ua lokela ho leka ho etsa joalo ka bana ba hao. *

2. Hangata ho mo laola ka ho feletseng ha ho tlise katleho. Nahana u kopana le morekisi ea leqoophe. Ha a ntse a u phehella haholoanyane hore u reke, le uena u hana ka tieo le ho feta. Le haeba u hloka ntho eo a e rekisang, e ka ’na eaba u tenoa ke mokhoa oo a rekisang ka oona. U batla ho tloha ho eena.

Ho ka etsahala se tšoanang haeba u leka ho qobella ngoana oa hao hore a phele ka melao eo u phelang ka eona, a lumele seo u se lumelang le hore a finyelle lintho tseo u li batlang. Na o tla “reka”? Ha ho bonahale joalo! Ha e le hantle, u ka finyella se fapaneng haeba u etsa joalo ’me ngoana oa hao a ka hloea melao ea hao. Hangata, ha batsoali ba leka ho laola bana ba bona ka ho feletseng, baa hlōleha. Joale ke’ng seo u ka se etsang?

Ho e-na le hore u laole bophelo ba mocha ka ho feletseng ka ho mo qobella hore a phele ka melao eo u e batlang, joalokaha u ile ua etsa ha a ne a le monyenyane, mo thuse ho bona kamoo e leng bohlale kateng hore a etse se nepahetseng. Ka mohlala, haeba u Mokreste, mo bontše kamoo ho phela ka melao-motheo ea Molimo ho ka mo tlisetsang khotsofalo e khōlō bophelong ba hae.—Esaia 48:17, 18.

 Beha mohlala ha u ntse u etsa seo. E-ba seo u batlang hore ngoana oa hao a be sona. (1 Bakorinthe 11:1) Hlakisa melao eo u khethang ho phela ka eona. (Liproverbia 4:11) Haeba mocha a hlaolela ho rata Molimo le melao ea hae, o tla etsa liqeto tse bohlale, esita leha u le sieo.—Pesaleme ea 119:97; Bafilipi 2:12.

Mo fe Tsebo ea Bohlokoa

Joalokaha ho bontšitsoe leqepheng la bobeli la makasine ena, letsatsi le ea tla, ebile mohlomong u bona eka le tla ka potlako, leo ka lona ha ngoana oa hao a se a hōlile “a tla siea ntat’ae le ’m’ae.” (Genese 2:24) Joaloka motsoali u batla ho etsa bonnete ba hore o na le tsebo e hlokahalang e le hore a khone ho ikemela ha a se a hōlile. Nahana ka mesebetsi eo u ka mo thusang hore a e tsebe hona joale, ha a ntse a lula lapeng.

Ho Tseba Mesebetsi ea Lapeng. Na ngoana oa hao o tseba ho pheha? ho hlatsoa le ho aena liaparo tsa hae? ho boloka kamore ea hae e hloekile ebile e hlophisehile? ho hlokomela thepa le ho lokisa lintho tse nyenyane koloing? Ho tseba mesebetsi e joalo ho tla etsa hore ka le leng mora kapa morali oa hao a khone ho tsamaisa lelapa. Moapostola Pauluse o ile a re: “Maemong afe kapa afe ao ke leng ho ’ona, ke ithutile ho khotsofala.”—Bafilipi 4:11.

Ho Tseba ho Phelisana le ba Bang. (Jakobo 3:17) Ngoana oa hao o phelisana le ba bang joang? Na o khona ho rarolla liphapang ka khotso? Na u mo koetliselitse hore a tšoare batho ba bang ka tlhompho le ho rarolla likhohlano ka khotso? (Baefese 4:29, 31, 32) Bibele e re: “Hlomphang batho ba mefuta eohle.”—1 Petrose 2:17.

Ho Sebelisa Chelete. (Luka 14:28) Na u ka thusa ngoana oa hao ho ithutela mosebetsi o itseng, ho sebelisa chelete le ho qoba sekoloto? Na u se u mo koetliselitse ho boloka chelete e le hore a reke lintho tseo a li hlokang, a qobe ho reka lintho tseo a neng a sa ikemisetsa ho li reka le ho khotsofalla lintho tse hlokahalang? (Liproverbia 22:7) Pauluse o ile a ngola, a re: “Ha re e-na le lintho tsa ho iphelisa le liaparo le tšireletso, re tla li khotsofalla.”—1 Timothea 6:8.

Bacha ba ithutang ho phela ka melao e lokileng le ba ithutileng mesebetsi ea bohlokoa, ruri ba se ba loketse ho ba batho ba baholo. Batsoali ba bona ba finyeletse sepheo sa bona!—Liproverbia 23:24.

[Mongolo o botlaaseng ba leqephe]

NA U KILE UA IPOTSA?

● Joaloka motsoali, sepheo sa hao ke sefe?—Baheberu 5:14.

● Boikarabelo ba ngoana oa hao e tla ba bofe ha a se a hōlile?—Joshua 24:15.

[Litšoantšo tse leqepheng la 25]

U ka rata hore ngoana oa hao e be motho oa mofuta ofe?

A tšoane le uena . . . 

E be lerabele . . . 

E be motho e moholo ea nang le boikarabelo