Tumelo ea Lelapa e Tsietsing

INDIA, ngoanana ea lilemo li robong ea ratehang oa Wisconsin, U.S.A., o se a tloaelane le ho kula. Ha e le hantle, o se a builoe ka makhetlo a mararo, le ho sebetsoa ke lingaka ka makhetlo a se nang palo linthong tse seng khōlō hakaalo. ’Mè oa hae, Lori, o re: “Ka lilemo tse tšeletseng, bophelo ba India bo ne bo likoloha likamoreng tsa maemo a tšohanyetso, ho robala sepetlele le ho ea ngakeng.”

Tsohle li qalile ha India a ne a le likhoeli li 18. O ile a qala ka ho ba le matšoao a sa tloaelehang, ho akarelletsa letšollo le sa feleng, feberu e phahameng, ho ruruha mpa le ho fokola ’meleng ka tsela e sa tloaelehang. O ne a boetse a e-ba le mahlaba ka mpeng. Bosiu bo bong le bo bong ka lilemo tse peli, India e monyenyane o ne a tsoha khafetsa a lla, a lumaela ’me ka linako tse ling a bile a bokolla ke bohloko.

Ha lingaka li leka ho fumana hore na phoso e hokae, India o ile a tsoela pele ho utloa bohloko ka tsela e tšabehang. Lori o re: “Ha e le hantle, lesea la rōna le ne le e-shoa ke tlala.” Mark, ntate oa India, oa phaella: “Ka nako e fetang selemo, re ile ra shebella ha ngoananyana oa rōna a ntse a fella likobong ’me re ne re sa tsebe hore na re mo thusa joang. Ke hopola ke ikutloa ke se na thuso ka ho feletseng bosiung bo bong ha ’na le Lori re bua ka lepato la India, leo ka nako eo re neng re nahana hore re ke ke ra le qoba.”

Qetellong, ho ile ha fumanoa hore India o na le liso ka maleng—e leng lefu le hlaselang lera la mala a maholo. O ne a boetse a e-na le sclerosing cholangitis, e amang lelana la nyooko sebeteng. Mafu ana a ne a phekoleha. Leha ho le joalo, ho ne ho tla hlokahala hore a buuoe, ’me bakeng sa liso tsa ka maleng, ho ne ho tla hlokahala ho phekoloa ka lipilisi. Maemo ao ka bobeli a ne a tla hloka hore a behoe leihlo le ho hlokomeloa ha a ntse a hlaphoheloa.

Hona joale e se e le lilemo tse fetang tse supileng ho tloha ha India a qala ho kula. Ka lebaka la tlhokomelo ea lingaka tse hlokolosi, o ntse a hlaphoheloa butle-butle. Joaloka Lipaki Tsa Jehova, Mark le Lori ba na le maikutlo a hore tumelo ea bona Lentsoeng la Molimo—haholo-holo  seo le se buang ka ho kula, lefu le tšepo ea tsoho ea nako e tlang—e ba thusitse ho mamella. E thusitse le India. Lori o re: “Kamehla India o ne a bua a sa tšabe ka tšepo ea tsoho joalokaha e hlalosoa ka Bibeleng. Ke ntho ea sebele ho eena.”

Ka lekhetlo le leng ha India a ntse a le ka kamoreng e ’ngoe ea ho bapala sepetlele, o ile a kopana le ngoananyana e mong eo ngoan’abo oa ngoanana e monyenyane ea neng a e-na le kankere ea mali. Lori o pheta se ileng sa latela: “Ngoanana eo o ile a bolella India hore o tšohile hore ngoan’abo a ka ’na a shoa. Eaba India o mo bolella hore na lefu ke eng ho ea ka Bibele le hore eena o ne a sa tšabe ho shoa. Letsatsing le hlahlamang ’mè oa ngoanana eo o ile a tla ho ’na ka lipotso. O ne a hloletsoe ke hore India o ne a ka bua ka bolokolohi joalo le hona a sa tšabe ka lintho tse joalo.”

Mark le Lori ba fumane hore lithapelo tsa balumeli-’moho le bona e bile tšehetso e khōlō haholo. Mark o re: “Nakong e fetileng, ha ke ne ke bolella batho hore ke tla ba rapella kapa ha ke rapela le bona, kamehla ke ne ke lakatsa eka nka ba etsetsa ho fetang moo. Hona joale kea hlokomela hore na lithapelo tseo ke tsa bohlokoa hakae ho ba bang. Thapelo e ne e le ntho ea bohlokoahali eo re neng re ka e etsetsoa linakong tsa rōna tse thata. Re na le lerato le lekaakang la bara ba motho!”

Mark o boetse o na le maikutlo a hore bokuli ba India bo ba thusitse hore ba hlahlobe lintho tse tlang pele bophelong ba bona. O re: “Ha ho pelaelo hore pono ea rōna ka lintho tse bonahalang e fetohile. Li bonahala li se na thuso hakaakang ha ngoana oa hao a kula! Lintho tsa bohlokoa bophelong e ne e le—’me e sa ntse e le—kamano ea rōna le Jehova Molimo le lerato la rōna la bara ba motho.”

Mark le Lori hammoho le India le banab’abo ba lebeletse nako e boletsoeng esale pele ke moprofeta Esaia, ha ho se ho se “moahi ea tla re: ‘Kea kula.’”—Esaia 33:24; Tšenolo 21:4.

[Setšoantšo se leqepheng la 30]

India Erickson

[Setšoantšo se leqepheng la 31]

Sepetlele sa Bana sa San Diego

[Setšoantšo se leqepheng la 31]

India le lelapa labo