Lilemong tse 30 tse fetileng, batho ba bangata ba ne ba utloa eka lintho li tsitsitse le hore ho na le khotso pakeng tsa linaha tse fapaneng empa hona joale ha ba sa kholisehile ka seo ka lebaka la liketsahalo tsa morao tjena.

•   Ka la 6 January, 2024, Reuters e ile ea tlaleha tjena: “Batho ba bangata ba tšoenyehile hore ntoa ea Gaza e tla ama linaha tse ling tse haufi kaha Iseraele e se e ntse e nkhisetsana mahafi le Hezbollah lelibohong la Lebanone.”

•   Ka la 7 January 2024, The New York Times e ile ea tlaleha tjena: “Lihlopha tse laoloang ke Iran li se li ntse li hlasela libaka tse ling ebile Iran e boetse e qaleletse ho etsa libetsa tsa ntoa tsa nuclear. Linaha tse ka Bophirimela li kotsing hobane Iran e se e ikopantse le Russia le China.”

•   Ka la 11 January 2024, UN News e ile ea tlaleha tjena: “Litlhaselo tsa Russia li ntse li tsoela pele ho baka tšenyo e tšabehang Ukraine.”

•   Ka la 9 January 2024, The Japan Times e ile ea tlaleha tjena: “Ho hola moruong hoa China le ho eketseha ha sesole sa teng, ho ikhantša ha baahi ba Taiwan ka naha ea bona le ho hloka khotso ho pakeng tsa Beijing le Washington ho ka ’na ha baka ntoa.”

 Na Bibele e bua ka ho hloka botsitso hoo re ho bonang lefatšeng ka bophara? Na ho hloka botsitso hoo ho tla baka ntoa ea lefatše?

 Bibele ha e ea bua ka ho toba ka lintoa tseo re li bonang. Leha ho le joalo, e ile ea bua ka lintoa tse sa laoleheng tse tla ‘tlosa khotso lefatšeng.’—Tšenolo 6:4.

 Buka ea Daniele e ile ea bolela esale pele hore “mehleng ea bofelo” mebuso ea lefatše e tla “sututsana” e tseka matla. Linaha tsena li tla sebelisa chelete e ngata li be li bontše hore li na le sesole se matla tsekisanong ena.—Daniele 11:40, 42, 43.

 Bibele e bontša hore boemo ba lefatše bo tla mpefala pele bo ntlafala. Jesu o ile a bolela esale pele hore “ho tla ba le mahlomola a maholo. A kang ’ona ha a e-s’o be teng ho tloha ha lefatše le thehoa.” (Matheu 24:21) ‘Mahlomola ao a maholo’ a tla lelekella ntoa e bitsoang Armagedone, e hlalosoang e le “ntoa ea letsatsi le leholo la Molimo ea Matla ’Ohle.”—Tšenolo 16:14, 16.

 Armagedone ha e na felisa moloko oa batho empa e tla o pholosa. A sebelisa ntoa ena, Molimo o tla felisa mebuso ea batho e bakileng lintoa tse ngata. Ho ithuta ho eketsehileng ka hore na ka mor’a Armagedone ho tla ba le khotso e sa feleng joang, bala lihlooho tse latelang:

•   “Ntoa ea Armagedone Ke’ng?”

•   “Lula U Lebeletse Armagedone ka Tjantjello!”