Nahana ka sena: Ha Julia a icheba ka seiponeng, o ipona a le motenya. O batla ho fokotsa boima ba ’mele, le hoja batsoali le metsoalle ea hae ba mo bolella hore ha a motenya.

Morao tjena, Julia o se a nahana ho nka mehato e feteletseng hore a fokotse ’mele. O batla ho itima lijo ka matsatsi a seng makae . . .

Haeba e ne e le uena, u ne u tla etsa’ng?

Ha ho phoso ho khathatseha ka tsela eo u shebahalang ka eona. Ha e le hantle, Bibele e bua ka banna le basali ba neng ba le batle, ba akarelletsang Sara, Ragele, Abigaile, Josefa le Davida. E boetse e re mosali e mong ea neng a bitsoa Abishage “o ne a le motle ka ho fetisisa.”—1 Marena 1:4.

Leha ho le joalo, bacha ba bangata ba khathatseha ho tlōla ka tsela eo ba shebahalang ka eona. Sena se ka ba bakela mathata. Nahana ka sena:

• Phuputsong e ’ngoe, banana ba ka etsang liphesente tse 58 ba ne ba nahana hore ba batenya, athe ba batenya, ke ba etsang liphesente tse 17 feela.

• Phuputsong e ’ngoe teng, basali ba etsang liphesente tse 45 ba neng ba le basesaane haholo, ba ne ba nahana hore ba nonne!

• Bacha ba bangata ba neng ba leka ho fokotsa ’mele ba ile ba qetella ba tšoeroe ke anorexia, e leng boloetse bo kotsi bo bakoang ke ho itima lijo.

 Haeba u na le matšoao a anorexia kapa bothata le ha e le bofe ba ho se je hantle, kōpa thuso. U ka bua le motsoali kapa motho e mong e moholo eo u mo tšepang. Bibele e re: “Motsoalle oa ’nete o lerato ka linako tsohle, ’me ke mor’abo motho ea tsoaletsoeng ha ho e-na le mahlomola.”—Liproverbia 17:17.

Ha e le hantle, botho ba motho ke bona bo etsang hore a ratehe. Ka mohlala, nahana ka mora oa Morena Davida, Absalome. Bibele e re ka eena:

“Ho ne ho se monna e motle hakaalo . . . hoo a rorisoang haholo hakaalo. O ne a se na sekoli.”—2 Samuele 14:25.

Empa mohlankana enoa o ne a ikhohomosa, a rata maemo a bile a le bolotsana! Kahoo, Bibele ha e bue hantle ka Absalome, ho e-na le hoo, e re o ne a sa tšepahale a bile a tletse lehloeo.

Ke kahoo Bibele e re eletsang tjena:

“Le ikapese botho bo bocha.”—Bakolose 3:10.

‘Le se ke la lumella mokhabo oa lōna hore e be oa ka ntle, empa e ke e be motho ea ka sephiring oa pelo.’—1 Petrose 3:3, 4.

Le hoja ho se letho le phoso ka ho batla ho shebahala hantle, ntho ea bohlokoa ka ho fetisisa ke botho ba hao. Ha u e-na le botho bo botle, batho ba tla u rata, ho feta feela ha u e-na le ’mele o motle! Ngoanana e mong ea bitsoang Phylicia o ile a re: “Le hoja botle bo ka hapa mahlo a batho, botho ba hao bo botle ke bona boo batho ba tla lula ba bo hopola.”

Na ha u rate tsela eo u shebahalang ka eona?

Na u kile ua nahana ho etsa opereishene hore u lokise karolo e itseng ’meleng oa hao kapa ho itima lijo ka ho feteletseng e le hore u ntlafatse tsela eo u shebahalang ka eona?

Ke’ng eo u neng u ka e chencha ’meleng ua hao haeba u ne u ka khona? (E tšoaee.)

• BOLELELE

• BOIMA BA ’MELE

• MORIRI

• SEBŌPEHO SA ’MELE

• SEFAHLEHO

• ’MALA OA LETLALO

Haeba u arabile lipotso tse peli tse ka holimo ka e, kapa u tšoaile lintho tse tharo kapa ho feta tseo u ka ratang ho li chencha, nahana ka sena: E ka ’na eaba batho ba bang ha ba bone u le mobe joalokaha u nahana. Ho bonolo hore motho a fetelletse lintho kapa a khathatsehe ho tlōla ka tsela eo a shebahalang ka eona.—1 Samuele 16:7.