Baasiria ba ne ba hapile ’muso oa Iseraele oa maloko a leshome. Joale Morena Sankeribe oa Asiria, o ne a batla ho hapa le ’muso oa Juda oa maloko a mabeli. O ne a se a hapile metse e meng ea Juda ’me joale a batla ho hapa Jerusalema. Empa Sankeribe o ne a sa tsebe hore Jehova o sirelelitse Jerusalema.

Morena Ezekiase oa Juda o ile a fa Sankeribe chelete e ngata e le hore a se ke a hlasela Jerusalema. Sankeribe o ile a nka chelete eo, empa a ’na a romela lebotho la hae le matla ho hlasela Jerusalema. Baahi ba Jerusalema ba ile ba tšoha, kaha Baasiria ba ne ba ntse ba atamela. Eaba Ezekiase o re: ‘Le se ke la tšoha. Baasiria ba matla, empa Jehova o tla re fa matla a fetang a bona.’

Eaba Sankeribe o roma Rabshake hore a e’o soma Baiseraele. Kahoo, Rabshake a ema ka ntle ho motse ’me a hoeletsa a re: ‘Jehova a ke ke a le thusa. Le se ke la lumella Ezekiase hore a le qhekelle. Ha ho na molimo ea ka le sireletsang matsohong a rona.’

Kahoo, Ezekiase a botsa Jehova hore na a etse’ng. Jehova a re: ‘U se ke oa tšosoa ke seo Rabshake a se buang. Sankeribe a ke ke a hapa Jerusalema.’ Ka mor’a moo, Ezekiase a fumana mangolo a tsoang ho Sankeribe. Mangolo ao a ne a re: ‘Inehele. Jehova a ke ke a u pholosa.’ Ka hona, Ezekiase a rapela, a re: ‘Jehova re kopa u re sireletse, e le hore batho bohle ba tle ba tsebe hore ke uena feela Molimo oa ’nete.’ Jehova a re ho eena: ‘Morena oa Asiria ha a na ho kena Jerusalema. Ke tla sireletsa motse oo oa ka.’

Sankeribe o ne a nahana hore o haufi le ho hapa Jerusalema. Empa bosiu bo bong, Jehova a romela lengeloi moo masole a robetseng teng ka ntle ho motse. Lengeloi leo la bolaea masole a 185 000! Morena Sankeribe a lahleheloa ke masole a  hae a matla. Kaha o ne a hlotsoe, a tlameha ho khutlela hae. Ka tsela eo, Jehova a sireletsa Ezekiase le motse oa Jerusalema, feela joalokaha a ne a tšepisitse. Haeba u ne u le Jerusalema ka nako eo, na u ne u tla tšepa Jehova?