Ka mora hore Baiseraele ba lopolloe ho Faro le mabotho a hae, ba ne ba e-na le mabaka a mangata a ho leboha Jehova. Le rōna re ka leboha Jehova. Ke ’nete hore ka linako tse ling ha re thulana le mathata rea nyahama. Leha ho le joalo, re ka tiea mangole ha re nahana ka tsela eo Jehova a re hlohonolofalitseng ka eona.

 E ’ngoe ea litlhohonolofatso tseo re li nkang e le tsa bohlokoahali, ke tšepo ea rōna e tiileng ea hore Jehova o tla re lokolla nthong e ’ngoe le e ’ngoe e re utloisang bohloko le e re sithabetsang. Ho sa tsotellehe se etsahalang, rea tseba hore Jehova a ke ke a re lahla. Molisa enoa oa rōna ea lerato o re thusa ka litsela tsohle e le hore re mo sebeletse ka botšepehi. Kamehla o lula e le “setšabelo le matla a rōna, thuso e fumanoang hang-hang nakong ea mahlomola.” (Pes. 46:1) Ho lula re nahana ka litlhohonolofatso tsa Jehova ho tla re thusa ho sebetsana le mathata a boima haholo. Selemong sena se tla thoasa, e se eka bohle re ka nahana ka litlhohonolofatso tsa rōna e le hore re ka susumelletseha ho ‘leboha Jehova, kaha o molemo; etsoe mosa oa hae o lerato o teng ho isa nakong e sa lekanyetsoang.’—Pes. 106:1.