Le hoja Inthanete e sa fumanehe libakeng tsohle tsa Cuba, hona joale ho bonolo ho e fumana mabenkeleng a k’hamphani ea lithelefono. Leha ho le joalo, ho turu ho kena Inthaneteng. Ka lebaka leo, molemong oa barab’abo rōna ba moo, lekala le lokiselitse hore phutheho ka ’ngoe e khethe mohoeletsi a le mong ea ka kopitsang lingoliloeng, likhatiso le livideo Websaeteng e le hore a li bontše Lipaki tse ling phuthehong. Ka sebele sena se ruisa liphutheho molemo.

Teona ea lilemo li leshome, le ngoan’abo oa ngoanana ea lilemo li robeli ea bitsoang Tamuna, ba lula Rephabliking ea Georgia. Banana bana ba ne ba batla ho rekeloa selefouno. Nkhono oa bona o ile a ba tšepisa hore cheleteng ea hae ea penshene, o tla ba fa e itseng khoeli le khoeli e le hore ba ka e reka. Ka bomalimabe nkhono oa bona o ile a hlokahala ka tšohanyetso. Leha ho le joalo, ba lelapa ba ile ba fa banana bana chelete ea hae ea penshene ea ho qetela e le hore ba reke selefouno. Ka mor’a hore banana bana ba nahanisise ka taba ena, ba ile ba ngolla phutheho ea habo bona ba re: “Rea tseba hore ka mor’a libeke tse peli, phutheho ea rōna e tla be e haha Holo ea ’Muso motseng oa T’erjola. Kaha nkhono oa rōna o ne a batla ho tšehetsa mosebetsi ona, re entse qeto ea hore re se ke ra hlola re reka selefouno empa re fe phutheho chelete ena ea penshene ea ho qetela ea Nkhono. Re kōpa hore le re hahele Holo ea ’Muso e ntle!”

Ka la 17 January, 2014, Geoffrey Jackson oa Sehlopha se Busang o ile a lokolla Phetolelo ea Lefatše le Lecha ea Mangolo a Segerike a Bakreste ea Setetum motseng oa Dili, Timor-Leste. Setetum ke puo e buuoang ke batho ba bangata ka ho fetisisa naheng eo. Nakong e fetileng ke Kereke e K’hatholike feela e neng e hatisa le ho rekisa Bibele ea Mangolo a Segerike a Setetum, ’me e hana ho e rekisetsa Lipaki Tsa Jehova le batho bao e nahanang hore ba ithuta le tsona. Leha ho le joalo, Bibele ena ea Mak’hatholike e ne e e-na le liphoso tse ngata ebile e sebelisitse mantsoe a khale ao ho leng thata ho a utloisisa. Bibele ena ha e  tšoane le ea Phetolelo ea Lefatše le Lecha kaha moromuoa ea bitsoang Darren o re: “Batho ba bangata ba balang Setetum ba khahluoe ke Phetolelo ea Lefatše le Lecha kaha e nepahetse, ’me ba kōpa hore ba e fuoe. E baleha habonolo ’me ba rata mongolo oa eona o moholo, haholo-holo kaha matlo a mangata ha a na motlakase. Ba bangata ba nang le eona ba ithuta Bibele.”

Ka January 2014, mosebetsi oa phetolelo oa Seromany, e leng puo e buuoang Macedonia, o ile oa hatela pele ka tsela e ikhethang. Ho ile ha thehoa sehlopha se secha sa bafetoleli, ’me ha fanoa ka tumello ea hore ho hatisoe lingoliloeng ka puo ena e ngoloang ka litlhaku tsa Secyrillic le ka litlhaku tse tloaelehileng. Sena se thusitse batho ba buang Seromany kaha ba tloaetse mongolo oa Secyrillic, e leng oona o tloaelehileng Macedonia.

 Batho ba bangata ba buang Seromany ba thabetse hore ebe mokhatlo oa Jehova o hatisa lingoliloeng ka puo ea bona. Morali’abo rōna e mong o itse: “Kaha ke bua Seromany, hangata batho ba merabe e meng baa nkhesa, kahoo ke leboha Jehova haholo ha a nka hore kea tšoaneleha hore ke be le lingoliloeng ka puo ea heso. Kahoo ke ikutloa ke le haufi le eena.”

Ho tloha ka la 1 February, 2014, Liphutheho tsa Jamaica le Lihlekehleke Tsa Cayman li ile tsa ba tlas’a ofisi ea lekala ea United States. Ka sebele sena se ile sa etsa hore bahoeletsi ba tšimo ea United States ba fetang limilione tse 1,2 ba momahane. Tšimo ena e akarelletsa linaha tse 50 tsa United States, Lihlekehleke tsa Bahamas, tsa Bermuda, tsa Brithani le tsa United States, Sehlekehleke sa Puerto Rico, sa Turks le sa Caicos.

Bara le barali babo rōna ba Japane ba rata bopula-maliboho haholo, ’me naha ena ke ea bone e nang le bo-pula-maliboho ba bangata ka ho fetisisa lefatšeng. Mathoasong a selemo sa tšebeletso sa 2014, ho ile ha e-ba le bo-pula-maliboho ba bacha ba 2 646, e leng se ileng sa etsa hore palo ea bo-pula-maliboho e nyolohele ho 65 668. Ka March 2014, bahoeletsi ba ka holimo ho halofo e ile ea e-ba bo-pula-maliboho.