Hoo e ka bang ka 1935, Pablo González ea neng a lula Cibao Valley, o ile a qala ho bala Bibele. O ne a ea kerekeng ea Maprostanta, empa a e tlohela ha a hlokomela hore boitšoaro ba batho ba e kenang ha bo lumellane le seo a se balileng ka Mangolong. Leha ho le joalo, o ile a tsoela pele a ithuta Lentsoe la Molimo ’me a bolella ba lelapa, baahisani le batho ba bang ba neng ba lula libakeng tse haufi ka seo a ithutileng sona. O ile a rekisa polasi ea hae le likhomo eaba o sebelisa chelete eo ho nka maeto e le hore a rute batho Bibele.

Ka 1942, Pablo o ne a se a etela malapa a ka bang 200 libakeng tse haufi ’me a tšoara liboka kamehla, le hoja a ne a e-s’o kopane le Lipaki Tsa Jehova. O ne a khothalletsa batho hore ba ithute Bibele le ho phela tumellanong le seo e se rutang. Batho ba bangata ba ile ba mo mamela ’me ba khaotsa ho tsuba koae le banna ba khaotsa ho nyala sethepu.

Celeste Rosario ke e mong oa batho ba ileng ba mamela molaetsa oa Bibele oa Pablo. O re: “Ha ke le lilemo li 17 motsoala oa ’Mè, e leng Negro Jiménez o ne a le sehlopheng  sa ba neng ba rutoa ke Pablo González. O ile a tla heso ’me a re balla litemana tse ’maloa Bibeleng, seo ke ileng ka se utloa se ile sa etsa hore ke etse qeto ea ho tlohela Kereke e K’hatholike. Ha re le kerekeng, ho ne ho baloa ka puo ea Selatine eo re neng re sa e utloisise. Nakoana ka mor’a moo, Pablo González o ile a re etela ’me a re khothatsa. O ile a re: ‘Ha re litho tsa malumeli a tsebahalang, empa re na le barab’abo rōna lefatšeng ka bophara. Ha re ba tsebe ebile ha re tsebe hore na ke ba bolumeli bofe, empa ka le leng re tla ba fumana.’”

Pablo o ile a theha lihlopha tsa liithuti tsa Bibele motseng oa Los Cacaos Salcedo, oa Monte Adentro, oa Salcedo le oa Villa Tenares. Ka 1948, ha Pablo a ne a emetse bese Santiago, o ile a bona Lipaki li le mosebetsing oa seterateng ’me tsa mo fa Molula-Qhooa. Ka letsatsi le leng a kopana le morali’abo rōna e mong ea ileng a mo fa libuka tse peli ’me a mo memela Sehopotsong sa lefu la Kreste, Santiago. Ha a le Sehopotsong o ile a khahloa ke seo a ileng a se utloa ’me a etsa qeto ea hore o fumane ’nete le hore batho ba neng ba le moo ke bona batho bao a neng a labalabela ho kopana le bona.

 Baromuoa ba ile ba etela batho bao Pablo a neng a ithuta le bona. Ha ba fihla ho se seng sa libaka tseo Pablo a neng a tšoarela liboka ho tsona, ba ile ba fumana batho ba 27 ba ba emetse ka tjantjello. Ba bang ba neng ba le moo ba ne ba tsamaile lik’hilomithara tse 25 ka maoto; ha ba bang ba ne ba nkile leeto la lik’hilomithara tse 50 ka lipere! Sebokeng se neng se tšoaretsoe sebakeng se seng, ho ne ho e-na le batho ba 78 ’me ho se seng ho e-na le ba 69.

Pablo o ile a fa baromuoa mabitso a batho ba 150 ba thahasellang. Batho bao ba ikokobelitseng le ba ratang Molimo, ba ne ba se ba ntse ba ithuta Bibele ebile ba phela tumellanong le seo e se rutang. Ba ne ba hloka feela hore ba hlophisoe hantle le ho tataisoa. Celeste o re: “Baromuoa bao ba ile ba re etela ’me ba re tšoarela seboka. Ho ile ha lokisetsoa hore re kolobetsoe. Ke ’na oa pele ea ileng a kolobetsoa lapeng leso. Hamorao ’mè oa ka, Fidelia Jiménez le ngoan’eso e leng Carmen ba ile ba kolobetsoa.”

Kopano ea pele ea potoloho ea Dominican Republic e neng e tšoaretsoe Santiago ka la 23-25 September, 1949 e ile ea etsa hore batho ba chesehele tšebeletso ea tšimo. Batho ba bangata ba thahasellang ba ile ba tla kopanong eo, ’me palo ea ba bileng teng puong ea phatlalatsa ka Sontaha ea e-ba 260. Ho ile ha kolobetsoa ba 28. Kopano eo ea matsatsi a mararo e ile ea kholisa batho ba bangata ba sa tsoa kopanela hore ona ke mokhatlo oo Molimo a o sebelisang ho phetha thato ea hae.