GERMAN GOMERA ke ngoana oa bo10 lelapeng la bana ba 11. Ka mor’a hore ntate oa hae le bana babo ba babeli ba hlokahale, ’mè oa hae e leng Luisa, o ile a fallela toropong. Ha ba le moo, ba ne ba kena kereke ea Mamennone, eo baholoane ba Luisa e neng e le litho tsa eona.

German o re: “Ka 1962, banyalani ba bo-pula-maliboho ba khethehileng ba ile ba fihla motseng oa habo rōna. Ho ne ho thoe ba khelosa batho ka ‘lithuto tsa bosatane.’ Leha ho le joalo, ha banyali bao ba fihla ha Piña, ho ile ha thoe ba kene. E ne e le lelapa le leholo. Ba ile ba khahloa ke tsela eo bo-pula-maliboho bao ba neng ba le mosa ebile ba le botsoalle ka eona, kahoo, ba mamela ka hloko. Ka mor’a ketelo eo, ba ha Piña le bo-ausi oa ka ba bararo ba ile ba qala ho ithuta.”

German o tsoela pele o re: “Ka letsatsi le leng ha bo-pula-maliboho bao ba etetse ba ha Piña, ba ile ba bitsa ’Mè. Li ile tsa bala litemana tse buang ka bophelo bo sa feleng lefatšeng. ’Mè o ile a li botsa a re: ‘Joale ke hobane’ng ha kerekeng ea ka ho thoe re ea leholimong?’ Ka mor’a hore mor’abo rōna a mo bontše hore na Mangolo a re’ng ka tsoho, ’Mè o ile a hlolloa ’me a qala ho bolella ba bang ka seo a ithutileng sona.”

 “Ha baruti ba Kereke ea Mamennone ba utloa hore litho tse ling tsa kereke li ithuta le Lipaki Tsa Jehova, ba ile ba li phehella hore li khaotse ho ithuta. Ba ne ba li tšosa ba bile ba li omanya. Maximina, e leng eena e moholo lelapeng la ha Piña o ile a re: ‘Bonang mona! Ke moholo ha ke le mokana, ha ho na motho ea lokelang ho ntaela.’”

German o re: “Qetellong batho ba 22 ba ile ba furalla Kereke ea Mamennone ’me ba qala ho tla libokeng tsa Lipaki tse neng li tšoareloa sebakeng se hiriloeng. ’Mè o ile a kolobetsoa ka 1965, ’me ’na ka kolobetsoa lilemo tse ’nè hamorao ke le lilemo li 13.”