KA LA 15 ho ea ho la 18 August, 1963, bahoeletsi ba makholo ba tsoang likarolong tse fapaneng tsa Indonesia le ba 122 ba tsoang linaheng tse ling ba ile ba bokana motseng oa Bandung, West Java. Ba ne ba tlile Kopanong ea “Litaba Tse Molemo Tsa ka ho sa Feleng,” e leng kopano ea pele ea machaba e ileng ea tšoaroa Indonesia.

Barab’abo rōna ba ile ba tlameha ho hlōla litšitiso tse ’maloa ha ba ntse ba lokisetsa kopano ena. Ba ile ba tlameha ho fetola sebaka seo kopano e tla tšoareloa ho sona ka makhetlo a mararo, ka lebaka la mekete ea Letsatsi la Boipuso. Kaha theko ea lintho e ile ea nyoloha, litefello tsa lipalangoang le tsona li ile tsa nyoloha, ’me barab’abo rōna ba tlameha ho sebelisa mekhoa e meng e le hore ba be teng kopanong. Mor’abo rōna e mong o ile a tsamaea ka maoto matsatsi a tšeletseng ha a ea kopanong. Bara le barali babo rōna ba 70 ba tsoang Sulawesi, ba ile ba nka leeto la matsatsi a mahlano ba palame likepe tse bulehileng, e le hore ba be teng kopanong.

Bara le barali babo rōna ba Indonesia ba ile ba thaba haholo ha ba kopana le Bakreste-’moho le bona ba tsoang linaheng tse ling, ho akarelletsa le litho tse peli tsa sehlopha se busang, e leng Mor’abo rōna Frederick Franz le Grant Suiter. Mor’abo rōna e mong oa moeti o ile a re: “Bara le barali babo rōna ba mona ba bonahala ba thabile; ba lula ba tšeha le ho bososela.”

Batho ba fetang 750 ba ile ba ba teng kopanong eo, ’me ha kolobetsoa ba 34. Ronald Jacka o ile a re: “Kopano ena e ikhethang e ile ea etsa hore batho ba bangata ba thahasellang e be Lipaki. Ea etsa hore barab’abo rōna ba Indonesia ba chesehe le ho feta mosebetsing oa Molimo.”