Joshua 22:1-34
22 Eaba Joshua o bitsa Barubene, Bagade le halofo ea leloko la Manase
2 ’me a re ho bona: “Le entse sohle seo Moshe mohlanka oa Jehova a le laetseng sona+ ’me le ile la ’mamela linthong tsohle tseo ke le laetseng tsona.+
3 Ha lea tlohela bana ba bo lona nakong ena eohle ho fihlela letsatsing lena+ ’me le bolokile taelo ea Jehova Molimo oa lona.+
4 Joale, Jehova Molimo oa lona o entse hore bana ba bo lona ba lule ba sireletsehile feela joalokaha a ile a ba tšepisa.+ Kahoo, le ka khutlela litenteng tsa lona naheng eo Moshe mohlanka oa Jehova a ileng a le fa eona ka lehlakoreng le leng* la Jordane.+
5 Le mpe le etse bonnete ba hore le phetha taelo le Molao oo Moshe mohlanka oa Jehova a le fileng oona,+ ka ho rata Jehova Molimo oa lona,+ ka ho tsamaea litseleng tsohle tsa hae,+ ka ho boloka litaelo tsa hae,+ ka ho mo khomarela+ le ka ho mo sebeletsa+ ka lipelo tsa lona tsohle le ka moea oa lona oohle.”+
6 Joshua a ba hlohonolofatsa ’me a re ba tsamaee. Eaba ba ea litenteng tsa bona.
7 Moshe o ne a file halofo ea leloko la Manase lefa Bashane+ eaba Joshua o fa halofo e ’ngoe ea leloko leo hammoho le bana ba bo bona naha ka lehlakoreng le ka bophirimela la Jordane.+ Ho feta moo, ha Joshua a re ba ee litenteng tsa bona, a ba hlohonolofatsa
8 ’me a re ho bona: “Khutlelang litenteng tsa lona ka maruo a mangata, ka liphoofolo tse ngata hammoho le silevera le khauta, koporo le tšepe le liaparo tse ngata haholo.+ Nkang karolo ea lona ea thepa+ eo le e hapileng ho lira tsa lona le e arolele le bana ba bo lona.”
9 Ka mor’a moo, Barubene, Bagade le halofo ea leloko la Manase ba tloha ho Baiseraele ba bang, ho tloha Shilo e naheng ea Kanana ’me ba khutlela naheng ea Gileade,+ naheng ea bona moo Jehova a ileng a ba laela a sebelisa Moshe+ hore ba lule teng.
10 Ha ba fihla libakeng tsa Jordane tse naheng ea Kanana, Barubene, Bagade le halofo ea leloko la Manase, ba haha aletare moo haufi le Jordane, aletare e kholo, e ntle.
11 Hamorao, Baiseraele ba bang ba utloa+ ho thoe: “Barubene, Bagade le halofo ea leloko la Manase ba hahile aletare moeling oa naha ea Kanana, libakeng tsa Jordane ka lehlakoreng le ka bophirimela la Baiseraele.”
12 Ha Baiseraele ba utloa taba ena, sechaba sohle sa Baiseraele sa phuthehela Shilo+ ho ea ba loantša.
13 Baiseraele ba romela Finease+ mora oa moprista Eleazare ho Barubene, Bagade le ho halofo ea leloko la Manase naheng ea Gileade.
14 Likhosana tse leshome li ne li e-na le eena, khosana e le ’ngoe ea ntlo ka ’ngoe ea lelapa la habo ntate oa maloko ’ohle a Iseraele ’me e ’ngoe le e ’ngoe e le hlooho ea ntlo ea bo-ntate ba bona ho ba likete* ba Iseraele.+
15 Ha ba fihla ho Barubene, Bagade le ho halofo ea leloko la Manase naheng ea Gileade ba re ho bona:
16 “Molaetsa o tsoang ho sechaba sohle sa Jehova ke ona, ‘Ke hobane’ng ha le entse ntho ee ’me le sa tšepahalla+ Molimo oa Iseraele? Kajeno le tlohetse Jehova ka ho ikahela aletare ’me le fetohetse Jehova.+
17 Na phoso ea Peore e ne e sa lekana? Le hoja sechaba sa Jehova+ se ile sa fuoa kotlo, le kajeno re ntse re kotula litholoana tsa phoso eo.
18 Na joale ha le sa batla ho mamela Jehova? Haeba le fetohela Jehova kajeno, hosane o tla halefela sechaba sohle sa Iseraele.+
19 Haeba lebaka ke hobane naha ea lona ha ea hloeka, le tšelele naheng ea Jehova+ moo tabernakele ea Jehova e lulang teng+ ’me le lule har’a rona empa le se ke la fetohela Jehova ’me le se ke la etsa eka re marabele ka hore le ikahele aletare empa aletare ea Jehova Molimo oa rona e ntse e le teng.+
20 Na Molimo ha aa ka a halefela sechaba sohle sa Iseraele,+ ha Akane+ mora oa Zera a sa tšepahale malebana le ntho e neng e lokela ho felisoa? Ha se eena feela motho ea ileng a shoa ka lebaka la phoso ea hae.’”+
21 Barubene, Bagade le halofo ea leloko la Manase ba araba lihlooho tsa likete* tsa Iseraele+ ba re:
22 “Molimo oa melimo, Jehova, Molimo oa melimo, Jehova+ oa tseba ’me Baiseraele le bona ba tla tseba. Haeba re fetohetse Jehova ebile re sa mo tšepahalla, e se eka Molimo a ke ke a re pholosa letsatsing lena.
23 Haeba re ikahetse aletare hore re tlohele Jehova le ho etsa linyehelo tsa secheso, linyehelo tsa lijo* le mahlabelo a kopanetsoeng ho eona, Jehova o tla fana ka kotlo e loketseng.+
24 Ho e-na le hoo, re entse sena hobane re ne re tšoenyehile ka taba e ’ngoe. Re ile ra nahana ra re, ‘Nakong e tlang, bara ba lona ba tla re ho bara ba rona: “Le na le tokelo efe ea ho rapela Jehova Molimo oa Iseraele le rona?
25 Jehova o behile Jordane e le moeli pakeng tsa rona le lona, Barubene le Bagade. Ha ho na letho le le kopanyang le Jehova.” Bara ba lona ba tla thibela bara ba rona ho rapela* Jehova.’
26 Kahoo re ile ra re, ‘A re etseng bonnete ba hore re haha aletare eseng bakeng sa linyehelo tsa secheso kapa bakeng sa mahlabelo
27 empa hore e be bopaki pakeng tsa rona le lona+ le litloholo* tsa rona hore re tla etsa tšebeletso ea Jehova ka pel’a hae ka linyehelo tsa rona tsa secheso le mahlabelo a rona le mahlabelo a rona a kopanetsoeng+ e le hore nakong e tlang bara ba lona ba tle ba se ke ba re ho bara ba rona: “Ha ho na letho le le kopanyang le Jehova.”’
28 Kahoo ra re, ‘Haeba ba ka bolella rona le litloholo* tsa rona seo nakong e tlang, re tla re: “Bonang aletare e tšoanang le ea Jehova eo baholo-holo ba rona ba e entseng, eseng bakeng sa linyehelo tsa secheso kapa bakeng sa mahlabelo empa hore e be bopaki pakeng tsa rona le lona.”’
29 Le ka mohla re ke ke ra fetohela Jehova kapa ra tlohela Jehova+ ka ho haha aletare bakeng sa linyehelo tsa secheso, linyehelo tsa lijo* le mahlabelo ho ntse ho e-na le aletare ea Jehova Molimo oa rona e ka pel’a tabernakele ea hae.”+
30 Ha moprista Finease, likhosana tsa sechaba le lihlooho tsa likete* tsa Iseraele tse neng li e-na le eena ba utloa mantsoe a builoeng ke litloholo tsa Rubene, tsa Gade le tsa Manase, ba khotsofala.+
31 Kahoo, Finease mora oa moprista Eleazare a re ho litloholo tsa Rubene, tsa Gade le tsa Manase: “Kajeno rea tseba hore Jehova o har’a rona hobane ha lea fetohela Jehova. Le pholositse Baiseraele letsohong la Jehova.”
32 Ka mor’a moo, Finease mora oa moprista Eleazare a khutla le likhosana ho tsoa ho Barubene le Bagade naheng ea Gileade, ba ea naheng ea Kanana ’me ba fihla ba phetela Baiseraele ba bang litaba.
33 Baiseraele ba ile ba khotsofala ha ba utloa tlaleho eo. Eaba ba rorisa Molimo ’me ha baa ka ba hlola ba bua letho ka ho ea loantša Barubene le Bagade, ho ea felisa naha eo ba neng ba lula ho eona.
34 Kahoo, Barubene le Bagade ba reha aletare* lebitso hobane ba ile ba re, “Ke bopaki pakeng tsa rona hore Jehova ke Molimo oa ’nete.”
Linaletsana
^ E leng ka lehlakoreng le ka bochabela.
^ Kapa: “maloko.”
^ Kapa: “maloko.”
^ Ka Seheberu: “lijo-thollo.” Sheba Tlhaloso.
^ Ka Seheberu: “tšaba.”
^ Ka Seheberu: “meloko.”
^ Kapa: “meloko.”
^ Ka Seheberu: “lijo-thollo.” Sheba Tlhaloso.
^ Kapa: “maloko.”
^ Ho ea ka tlhaloso, ho bonahala eka aletare eo e ile ea rehoa Bopaki.
