DANIEL LE MIRIAM ba nyalane ka September 2000 mme ba ne ba dula toropong ya Barcelona e Spain. Daniel o re: “Re ne re phela ha monate, re bile re sebetsa hantle. Ka baka leo, re ne re kgona ho ja direstjhurenteng tsa maemo, re nka maeto ho ya mose ho mawatle re bile re apara diaparo tse turang. Re ne re kgona le ho ya tshimong kamehla.” Empa dintho di ile tsa fetoha.

Ka 2006 kopanong, Daniel o ile a anngwa haholo ke puo eo ho yona ho ileng ha botswa potso e reng: “Na re etsa sohle se matleng a rona ho thusa batho ba ‘thekesellang polaong’ hore ba tsamaye tseleng e isang bophelong bo sa feleng?” (Liprov. 24:11) Puo eo e ile ya bua ka boikarabelo boo re nang le bona ba ho phatlalatsa molaetsa wa Bibele. (Lik. 20:26, 27) Daniel o re: “Ke ile ka utlwa ekare Jehova o bua le nna.” Puo eo e ile ya boela ya re ha motho a etsa ho eketsehileng tshebeletsong o thaba le ho feta. Daniel o ne a tseba hore seo ke nnete. Miriam e ne e se e le pulamadiboho ka nako eo mme o ne a fumana ditlhohonolofatso.

Daniel o re: “Ke ile ka etsa qeto ya ho fetola tsela eo ke phelang ka yona.” O ile a feela a etsa seo. O ile a fokotsa dihora tseo a di sebetsang, a qala ho ba pulamadiboho mme yena le Miriam ba itokisetsa ho ya moo ho nang le tlhokahalo teng.

Ka May 2007, Daniel le Miriam ba ile ba tlohela mosebetsi mme ba fallela Panama, e leng naha eo ba neng ba kile ba e etela. Tshimo ya bona e ntjha e ne e le sehlopha sa dihlekehleke se bitswang Bocas del Toro se lewatleng la Caribbean. Boholo ba baahi ke matswallwa a moo a buang Sengabe. Daniel le Miriam ba ne ba nahana hore tjhelete eo ba e bolokileng e tla ba thusa ho dula Panama dikgwedi tse robedi.

Ba ile ba sebedisa sekepe le dibaesekele ho tsamaya dihlekehlekeng tsa moo. Ba sa ntse ba hopola tsatsi la bona la pele ba tsamaya ka dibaesekele, ba tsamaya dibakeng tse moepa letsatsing le bataolang. Daniel o ile a batla a akgeha ke mokgathala. Leha ho le jwalo, malapa a moo a ile a ba amohela ka mofuthu, haholoholo kaha banyalani bana ba ne ba se ba ithutile mantswe a mmalwa a Sengabe. Kamora nakwana feela, ba ne ba se ba kganna dithuto tsa Bibele tse 23.

Leha ho le jwalo, ha tjhelete eo ba neng ba e bolokile e fela, thabo ya bona e ile ya fetoha maswabi. Daniel o re: “Re ne re utlwile bohloko hoo re ileng ra sekisa meokgo hobane re lokela ho kgutlela hae Spain. Re ne re sa batle ho siya baithuti ba rona ba Bibele.” Empa kamora kgwedi, Daniel le Miriam ba ile ba fumana ditaba tse thabisang. Miriam o re: “Re ile ra fumana kabelo ya ho ba bopulamadiboho ba kgethehileng. Re ne re thabile haholo ho tseba hore ha re sa tsamaya!”

Ka lebaka la diphetoho tse ileng tsa etswa mokgatlong, Daniel le Miriam ba ile ba koptjwa ho sebeletsa jwaloka bopulamadiboho ba kamehla ka 2015. Ba ne ba tla etsa jwang? Ba ile ba kgolwa tshepiso e hlahang ho Pesaleme ya 37:5 e reng: “Rolela tsela ya hao ho Jehova, o itshetlehe ka yena, mme o tla nka bohato.” Ba ile ba fumana mosebetsi e le hore ba ka itlhokomela ha e ntse e le bopulamadiboho, mme hona jwale ba sebeletsa phuthehong e profinseng ya Veraguas, Panama.

Daniel o re: “Pele re tloha Spain, re ile ra ipotsa hore na re ne re tla kgona ho phela bophelo bo bonolo. Empa ke mona re a kgona, mme ha re hloke letho la bohlokwa.” Keng se etsang hore ba thabe hakaale? Ba re: “Ho thusa batho ho ithuta ka Jehova ho re thabisa ka ho fetisisa. Ke thabo eo re ke keng ra e hlalosa!”