Don le Margaret * ba ile ba thabela ho etelwa ke moradi wa bona le lelapa la hae. Margaret eo e neng e le seapehi, o ile a pheha macaroni le tjhisi tse ratwang ke ditloholo tsa hae tse pedi bakeng sa lelapa lohle pele ba ka tsamaya.

Lelapa lohle le ne le dutse fatshe, ha Margaret a beha dijo tseo a neng a qeta ho di pheha tafoleng. Eitse ha a bula pitsa feela, a makala ha a thola hore ho ne ho na le sopho ya tjhisi feela ka pitseng. Margaret o ne a lebetse ntho e ka sehloohong, e leng macaroni! *

Kaofela re etsa diphoso ho sa tsotellehe dilemo le boiphihlelo ba rona bophelong. E ka nna yaba ka ho bua re sa nahana kapa ra etsa ntho e itseng e molemo ka nako e fosahetseng, kapa mohlomong ra lebala ntho e nngwe ya bohlokwa. Empa ke hobaneng ha re etsa diphoso? Hona re ka etsang? Na re ka di qoba? Ho ba le pono e nepahetseng ka diphoso ho ka re thusa hore re arabe dipotso tseo.

Hangata ha re etsa dintho hantle, re amohela thoriso mme re a dumela hore e ne e re tshwanetse. Kahoo, ha re etsa diphoso re sa ikemisetsa kapa ho sena motho ya hlokomelang, e ka ba hantle hore re dumele hore re entse phoso. Empa ho etsa seo ho hloka hore re ikokobetse.

Haeba re nka hore le ka mohla re ke ke ra etsa diphoso, re ka nna ra batla ho di nyenyefatsa, ra beha batho ba bang molato kapa ra hana hore ke rona ba entseng phoso. Hangata ho etsa dintho ka tsela ena ho tlisa ditlamorao tse bosula. Bothata bo ka se rarollwe mme ba bang ba ka behwa molato wa seo ba sa se etsang. Le haeba re ka kgona ho qoba ditlamorao tsa diphoso tsa rona hona jwale, re lokela ho hopola hore qetellong, “e mong le e mong wa rona o tla ikarabella ho Modimo.”​—Baroma 14:12.

Modimo o na le pono e nepahetseng ka diphoso. Lengolo la Pesaleme le re Modimo o “mohau mme o mosa . . . a ke ke a dula a fumana molato ka ho sa feleng, kapa a dule a halefile ho isa nakong e sa lekanyetswang.” O a tseba hore batho ha ba a phethahala, ebile o a utlwisisa hore re hlahile re na le bofokodi ka ha “o a hopola hore re lerole.”​—Pesaleme ya 103:8, 9, 14.

Ho feta moo, ka ha ke ntate ya mohau, o batla hore rona jwalo ka bana ba hae, re be le pono e nepahetseng ka diphoso. (Pesaleme ya 130:3) Lentswe la hae le fana ka tataiso le dikeletso tse ngata tse tla re bontsha hore na re lokela ho etsang ka diphoso tsa rona kapa tsa ba bang.

Hangata ha motho a entse phoso, o nka nako le matla a beha ba bang molato kapa a nyenyefatsa phoso ya hae. Ho e na le hoo, ha o foseditse motho e mong, e ka ba bohlale hore o kope tshwarelo,  le lokise ditaba, e le hore le dule le le metswalle. Na o kile wa etsa phoso e ileng ya utlwisa ba bang bohloko kapa ya o utlwisa bohloko? Ho e na le hore o ikwatele kapa o behe ba bang molato, ke hobaneng ha o sa lokise ditaba? Ho beha batho ba bang molato ho ke ke ha rarolla bothata empa ho tla etsa hore le dule le kwatelane. Ho e na le hoo, ithute diphosong tsa hao, di lokise mme o tswele pele ka bophelo.

Le ha ho le jwalo, ha motho e mong a ka etsa phoso, ho ba bonolo feela hore re bontshe ka diketso hore ha re a thabela seo. Empa ho tla ba molemo hore re latele keletso ena ya Jesu Kreste, ha a ne a re: “Ka hona, dintho tsohle tseo le batlang hore batho ba le etse tsona, le lona ka ho tshwanang le ba etse tsona.” (Matheu 7:12) Bonneteng ha o ka etsa phoso, esita le e sa reng letho, o lebeletse hore ba bang ba o utlwele bohloko kapa ba e hlokomolohe feela jwalo. Jwale ke hobaneng ha le wena o sa etse se tshwanang ho ba bang?​—Baefese 4:32.

Dikshnare e nngwe e hlalosa hore “diphoso di ka hlaha haeba motho a ahlola ba bang a sa tsebe ditaba kaofela kapa a sa tsotelle.” Ka nnete re tlameha ho dumela hore ka dinako tse ding re ye re be le mekgwa ena. Le ha ho le jwalo, re ke ke ra etsa diphoso tse ngata hakaalo haeba re sebedisa melaomotheo ya Bibele.

O mong wa melaomotheo eo ke o hlahang ho Liproverbia 18:13, mme ona o re: “Ha mang kapa mang a araba taba pele a e utlwa, hoo ke bowatla ho yena le tlotlollo.” Nnete ke hore ho utlwa ditaba ka botlalo, ho tla o thusa hore o se ke wa araba o halefile kapa wa bua o sa nahana. Ho mamela ka hloko ho tla o thusa haholo e le hore o se ke wa ahlola pele o utlwa ditaba le hore o qobe ho etsa diphoso.

Molaomotheo o mong wa Bibele o re: “Haeba ho kgoneha, ho fihlela moo ho itshetlehileng ka lona, le be le kgotso le batho bohle.” (Baroma 12:18) Etsa sohle seo o ka se kgonang ho ba le kgotso le ho sebedisana hantle le ba bang. Ha o ntse o sebetsa le ba bang, ba nahanele, o ba hlomphe, o ba babatse o be o ba kgothatse. Ha dintho di etswa ka tsela ena, etlare haeba o ka bua kapa wa etsa ntho e itseng o sa nahana, ho tla ba bonolo hore ba bang ba o tshwarele kapa ba se ke ba nkela dintho tseo hloong mme le di qabang, di tla rarollwa ka pele ho sena ya utlwileng bohloko.

Eba le pono e nepahetseng ka diphoso tseo o di etsang. Ho e na le hore o batle ho lokafatsa diphoso tsa hao, nka sena e le monyetla wa ho o thusa hore o be le makgabane a itseng. Na o hloka ho bontsha tiisetso, mosa kapa boitshwaro ka ho eketsehileng? Hothweng ka bonolo, kgotso le lerato? (Bagalata 5:22, 23) O ka ithuta seo o sa lokelang ho se etsa nakong e tlang. Ka hona, leka hore o se ke wa itjheba bowena feela. Ho ba le nako ya boswaswi ho ka thusa hore ho se ke ha ba le diqabang.

Ho ba le pono e nepahetseng ka diphoso, ho tla re thusa hore re be re itokisitse ha ho ka ba le maemo a re lekang. Re tla kgotsofala mme re be le kgotso le batho ba bang. Haeba re ikemiseditse ho ithuta diphosong tsa rona, re tla ba bohlale, ebile le batho ba tla thabela ho ba le rona. Re ke ke ra nyahama haholo kapa ho itshwayatshwaya diphoso. Ho tseba hore le batho ba bang ba ntse ba leka ho lokisa diphoso tsa bona, ho tla re atametsa haufi le bona. Sa bohlokwa le ho feta, ke hore re tla ithuta ho etsisa lerato leo Modimo a nang le lona le boikemisetso ba hae ba ho tshwarela ka bolokolohi.​—Bakolose 3:13.

Na phoso ya Margaret eo re buileng ka ena qalong, e ile ya senya nako e monate eo ba bileng le yona e le lelapa? Ho hang feela. Kaofela ha bona ba ile ba bona e le ntho e qabolang, haholoholo Margaret, mme ba thabela dijo tsa bona di ntse di sena macaroni jwalo! Esita le ka mora hore ho fete dilemo, ditloholo tsa Margaret, di ile tsa bolella bana ba tsona ka ketsahalo eo e qabolang e ileng ya etsahala. Etswe e ne e mpa e le phoso feela!