Ho tloha ha Modimo a ne a bopa batho, o ne a buisana le bona a sebedisa mangeloi le baprofeta. Ho ekelletsa moo, o ile a kgetha hore melaetsa ya hae le ditshepiso tsa hae di ngolwe fatshe. Ditshepiso tsena tsa Modimo di ama bokamoso ba rona. Jwale o ka fumana dintho tseo Modimo a re tshepisitseng tsona hokae?

Molaetsa wa Modimo re ka o fumana ka Mangolong a Halalelang. (2 Timothea 3:16) Modimo o ile a sebedisa baprofeta jwang hore ba ngole molaetsa wa hae? (2 Petrose 1:21) Modimo o ile a bolella bangodi hore na ba ngole eng, yaba ha morao ba di ngola fatshe. Ho ntse ho etsahala se tshwanang le kajeno. Haeba motho ya nang le kgwebo a kopa mongodi wa hae hore a mo ngolle molaetsa o itseng, re tlo re lengolo leo le ngotswe ke rakgwebo le hoja mongodi e ne e le yena ya ngolang. Ka tsela e tshwanang, le hoja Modimo a ile a sebedisa batho hore ba ngole molaetsa wa hae, ha e le hantle ke yena Mongodi wa Mangolo a Halalelang.

Molaetsa wa Modimo ke wa bohlokwa haholo mme o batla hore batho bohle ba o bale ebile ba o utlwisise. Hona jwale, molaetsa wa hae o thabisang o bolelwa dinaheng tsohle, melokong yohle le dipuong tsohle. (Tšenolo 14:6) Modimo o hlohonolofatsa mosebetsi oo hobane molaetsa ona re ka o bala kaofela ka dipuo tse ka hodimo ho 3 000, ebile ke wona feela o fumanehang ka dipuo tse ngata ho feta dibuka tse ding lefatsheng lohle.