Haeba o batla ho tseba motho hantle, ho bohlokwa hore o tsebe hore na o ile a etsang nakong e fetileng le hore na o batla ho etsang nakong e tlang. Ka tsela e tshwanang, haeba o batla ho tseba Modimo hantle, o lokela ho tseba dintho tseo a di entseng nakong e fetileng. Ha o ntse o etsa jwalo, o tla thabela ho tseba hore na dintho tseo a di entseng di tla re tswela molemo jwang hona jwale le nakong e tlang.

Jehova Modimo ke Mmopi e Moholo mme “ditshobotsi tsa hae tse sa bonahaleng di bonwa ka ho hlaka ho tloha popong ya lefatshe ho ya pele, hobane di lemohuwa ka dintho tse entsweng.” (Baroma 1:20) “Ke Moetsi wa lefatshe ka matla a hae, ya tiisang ka thata ka bohlale ba hae naha e behang, le eo ka kutlwisiso ya hae a otlolotseng mahodimo.” (Jeremia 10:12) Botle ba popo bo bontsha hore Modimo o a re rata.

Nahana ka moo Jehova a entseng batho ka tsela e ikgethang ka teng, ka hore a ba etse “ka setshwantsho sa hae.” (Genese 1:27) Sena se bolela hore o entse batho ba bontshe makgabane a hae ka tsela e itseng. O entse hore re be le takatso ya ho batla ho tseba ka yena le hore re be le bokgoni ba ho utlwisisa melao ya hae. Ha re leka ho phela ka melao ena, re tla thabela bophelo ebile re tla tseba hore na re phelelang. Ho feta moo, o re file bokgoni ba hoba le kamano e ntle le yena.

Ha re bona dintho tse lefatsheng tseo Modimo a di bopileng, re kgona ho bona hore na o ikutlwa jwang ka rona. Mantsweng a moapostola Pauluse, Modimo ha a “ka a itlohela ntle ho bopaki ka hore o ile a etsa se molemo, a [re] fa dipula tse tswang lehodimong le dinako tse behang, a tlatsa dipelo tsa [rona] ka ho phethahetseng ka dijo le ho hlasimoloha ho molemo.” (Liketso 14:17) Modimo o re file se fetang seo re se hlokang e le hore re phele. O re file dintho tse ngata le tse fapaneng e le hore re thabele bophelo. Empa ho na le dintho tse ngata tseo Modimo a re batlelang tsona.

 Jehova o bopile lefatshe e le hore batho ba phele ho lona ka ho sa feleng. Bibele e re: “Lefatshe o le file bara ba batho” mme ha a “le bopela lefeela, ya le etseditseng hore le be le baahi.” (Pesaleme ya 115:16; Esaia 45:18) Ke bomang ba tla phela lefatsheng hona ka nako e kae? “Ba lokileng ba tla rua lefatshe, ba tla dula ho lona ka ho sa feleng.”—Pesaleme ya 37:29.

Ke ka lebaka leo Jehova a ileng a bopa Adama le Eva mme a ba beha serapeng se setle “ho se lema le ho se hlokomela.” (Genese 2:8, 15) Modimo o ile a ba fa mesebetsi e mmedi e ba thabisang mme a re: “Atang le ngatafale le tlale lefatshe mme le le buse.” (Genese 1:28) Le ha ho le jwalo, Adama le Eva ba ne ba na le tshepo ya hore ba tla phela ka ho sa feleng lefatsheng. Ka maswabi ba ile ba kgetha ho se mamele mme ba lahlehelwa ke monyetla wa hoba hara “ba lokileng” ba tla “rua lefatshe.” Le ha ho le jwalo, diketso tsa bona ha di a ka tsa fetola morero wa Modimo ka batho le ka lefatshe. A re qaleng ka ho hlahloba e nngwe ya dintho tseo Modimo a di entseng.

Bibele e tsejwa e le Lentswe la Modimo. Ke hobaneng ha Jehova a re file Bibele? E le hore re ithute ka yena. (Liproverbia 2:1-5) Ke nnete hore Bibele ha e arabe potso e nngwe le e nngwe eo re nang le yona ka Modimo ebile ha hona buka e ka etsang jwalo. (Moeklesia 3:11) Le ha ho le jwalo, ntho e nngwe le e nngwe e ka Bibeleng e re thusa hore re tsebe Modimo. Tsela eo a sebetsanang le batho ka yona, e kgona ho re bontsha hore na ke motho ya jwang. Re ithuta hore na o rata batho ba jwang. (Pesaleme ya 15:1-5) Re boetse re ithuta hore na o ikutlwa jwang ka borapedi, boitshwaro le maruo. Bibele e re bontsha ka ho hlakileng hore na botho ba Jehova bo jwang, ha re sheba mantswe le diketso tsa Mora wa hae, Jesu Kreste.—Johanne 14:9.

Lebaka le leng leo Jehova a faneng ka Bibele ka lona, ke hobane o batla hore re tsebe hore na re phelelang le hore re thabele bophelo. Jehova o sebedisa Bibele ho re bontsha hore na ke jwang re ka bang le malapa a thabileng, ra kgotsofala le hore na ke jwang re ka sebetsanang le mathata. Jwalo ka ha re tla bona dihloohong tse latelang, Bibele e araba dipotso tsa bohlokwa, tse jwalo ka: Ke hobaneng ha re ena le mathata a mangata tjee? Bokamoso bo tla ba jwang? E boetse e re bontsha hore na Modimo o entseng e le hore ditshepiso tsa hae di phethahale.

Hona le ditsela tse ngata tse bontshang hore Bibele ke buka e ikgethang e tswang ho Modimo. O ile a sebedisa banna ba ka bang 40 hore ba e ngole mme e se e le dilemo tse fetang 1 600 e ngotswe, le ha ho le jwalo, e ntse e na le ditaba tsa bohlokwa hobane e tswa ho Modimo. (2 Timothea 3:16) Ho fapana le dibuka tse ding tsa kgale, haesale Bibele e nepahetse ebile e bolokilwe ka dilemo tse ngata. Bibele e ntse e le teng le kajeno le hoja batho ba ile ba leka ho thibela hore e fetolelwe, e fuwe batho kapa e balwe. Kajeno ke yona buka e fetolelwang haholo le e fuwang batho. Hore ebe Bibele e ntse e le teng ke bopaki ba hore “lentswe la Modimo wa rona, le tla tshwarella ho isa nakong e sa lekanyetswang.”—Esaia 40:8.

E nngwe ya dintho tseo Modimo a batlang ho di etsa ke ho phethahatsa morero wa hae. Jwalo ka ha re bone, Modimo o ne a batla hore batho ba phele ka ho sa feleng lefatsheng. Le ha ho le jwalo, ka mora hore Adama a se ke a mamela Modimo mme a etse sebe, seo se ile sa etsa hore yena le bana ba hae ba lahlehelwe ke bophelo bo sa feleng. Bibele e re: “Jwalo ka ha sebe se ile sa kena lefatsheng ka motho a le mong le lefu la kena ka sebe, mme ka hoo lefu la namela ho batho bohle hobane kaofela ba ne ba entse sebe.” (Baroma 5:12) Ka ha Adama o ile a etsa sebe sena, ho ile ha bonahala eka morero wa Modimo o ne o ke ke wa phethahala. Empa Jehova o ile a etsang?

Tsela eo Jehova a ileng a etsa dintho ka yona, e dumellana le makgabane a hae. O ile a etsa hore  Adama le Eva ba patalle sebe seo ba se entseng, empa ka lerato a tshepisa ditloholo tsa bona bokamoso bo molemo. Ka bohlale Jehova o ile a fumana hore na ke jwang a ka rarollang bothata bona. (Genese 3:15) Modimo o ile a fana ka Mora wa hae Jesu Kreste hore a re lokolle sebeng le lefung. Seo se ne se tla akarelletsang?

E le hore Jehova a lokolle batho sebeng se ileng sa etswa ke Adama, o ile a romela Mora wa hae lefatsheng ho tla ruta batho tsela e isang bophelong le “ho fana ka moya wa hae hore e be thekollo e le phapanyetsano bakeng sa ba bangata.” a (Matheu 20:28; Johanne 14:6) Jesu o ile a kgona ho re lokolla sebeng ka ha o ne a phethahetse jwalo ka Adama. Ho fapana le Adama, Jesu o ile a mamela esita le ho isa lefung. Ka ha Jesu o ne a sa tshwanela ho shwa, Jehova o ile a mo tsosa hore a lo phela lehodimong hape. Ka hoo, o ile a kgona ho etsa seo Adama a hlolehileng ho se etsa, e leng ho fa batho ba mamelang Modimo bophelo bo sa feleng. “Etswe feela jwalo ka ha ka ho se mamele ha motho a le mong ba bangata ba ile ba etswa baetsadibe, ka ho tshwanang ka ho mamela ha motho a le mong ba bangata ba tla etswa ba lokileng.” (Baroma 5:19) Ka lebaka la sehlabelo sa lefu la Jesu, Modimo o tla phethahatsa tshepiso ya hae ya hore batho ba phele ka ho sa feleng lefatsheng.

Re ithuta ho hongata ka Jehova tseleng eo a ileng a sebetsana le mathata a bakilweng ke ho se mamele ha Adama. Re a bona hore ha hona letho le ka sitisang Jehova ho qetella seo a se qadileng, lentswe la hae “le tla atleha.” (Esaia 55:11) Re boetse re bona ka moo Jehova a re ratang haholo ka teng. “Lerato la Modimo le ile la bonahatswa ho rona ka sena, hobane Modimo o ile a romela Mora wa hae ya tswetsweng a nnotshi lefatsheng e le hore re ka fumana bophelo ka yena. Lerato le ka tsela ena, eseng hore re ratile Modimo, empa hore o ile a re rata mme a romela Mora wa hae e le sehlabelo sa poelano bakeng sa dibe tsa rona.”—1 Johanne 4:9, 10.

Modimo ha a ka “a qenehela esita le Mora wa hae empa a nehelana ka yena bakeng sa rona bohle” ka hoo, re ka kgodiseha hore Modimo o tla etsa “dintho tse ding kaofela ka mosa” tseo a di tshepisitseng. (Baroma 8:32) Keng eo Modimo a re tshepisitseng yona? Bala sehlooho se latelang.