1. Moprofeta Esaia o ile a bolella Baiseraele molaetsa ofe?

 MOPROFETA Esaia o ile a re Jehova ke “Modimo wa nnete.” Lentswe le fetoletsweng e le “nnete” le bolela “amen.” (Esa. 65:​16, nal.) Lentswe “amen” le bolela “ha ho be jwalo” kapa “ka sebele.” Ha ho sebediswa lentswe “amen” ka Bibeleng ha ho buuwa ka Jehova kapa Jesu, le sebediswa e le ho re kgodisa hore ntho e itseng e tla fela e etsahale. Ka hoo, molaetsa wa Esaia o ne o hlakile ho Baiseraele hore Jehova o phethahatsa dintho tseo a di tshepisitseng. Haesale Jehova a ntse a phethahatsa ditshepiso tsohle tsa hae.

2. Ke hobaneng ha re ka tshepa tshepiso ya Jehova ka bokamoso ba rona, hona re tlo araba dipotso dife?

² Na re ka tshepa hore dintho tseo Jehova a re tshepisitseng tsona ka bokamoso ba rona di tla phethahala? Ka mora dilemo tse ka bang 800 Esaia a shwele, moapostola Pauluse o ile a hlalosa hore na ke hobaneng ha re ka tshepa hore ditshepiso tsa Modimo di dula di phethahala. Pauluse o ile a re Modimo “a ke ke a bua leshano.” (Baheb. 6:18) Jwalo ka ha sedibeng ho sa tswe metsi a hlwekileng le a letswai ka nako e le nngwe, Jehova le yena a ke ke a bua leshano hobane ke Mohlodi wa nnete. Ka hoo, re ka kgodiseha hore dintho tsohle tseo Jehova a reng di tla etsahala di tla fela di etsahale, ho akareletsa le dintho tseo a re tshepisitseng tsona ka bokamoso ba rona. Sehloohong  sena re tlo fumana dikarabo tsa dipotso tsena: Ke eng eo Jehova a re tshepisitseng yona? Ke eng e re kgodisang hore Jehova o tla phethahatsa tshepiso eo?

3. (a) Ke tshepiso efe eo bahlanka ba Modimo ba e ratang haholo? (Tshenolo 21:​3, 4) (b) Batho ba bang ba reng ha re ba bolella tshepiso eo?

³ Bahlanka bohle ba Modimo ba rata tshepiso ena eo re tlo tla re bua ka yona. (Bala Tshenolo 21:​3, 4.) Jehova o re tshepisa hore nakong e tlang “lefu ha le sa tla hlola le eba teng. Maswabi, ho bokolla kapa bohloko le tsona ha di sa tla hlola di eba teng.” Ba bangata ba rona re balla batho ditemana tsena tse kgothatsang ha re buisana le bona ka Bibele mme re ba bontsha hore na bophelo bo tlo ba jwang Paradeiseng. Batho ba bang ba reng ha re ba balla tshepiso ee? Ba ka nna ba re: “Ke a di utlwa ditaba tsena empa ha ke bone eka ke ntho e ka etsahalang.”

4. (a) Ke eng eo Jehova a neng a tseba hore e tla etsahala mehleng ee? (b) Ka mora hore Jehova a etse tshepiso, o ile a etsang hape?

⁴ Jehova o ile a susumetsa moapostola Johanne hore a ngole hore na bophelo bo tla ba jwang Paradeiseng. Jehova o ne a se a ntse a tseba hore mehleng ena re tlo buisana le batho ka tshepiso ena ha re ba bolella molaetsa wa Mmuso. Jehova o ne a boetse a tseba hore ho tlo ba thata hore batho ba bangata ba kgolwe tshepiso ya hore dintho di tlo ba ntjha. (Esa. 42:9; 60:2; 2 Bakor. 4:​3, 4) Re ka etsang hore re kgodisehe re be re kgodise batho ba bang hore ditshepiso tseo ho buuweng ka tsona ho Tshenolo 21:​3, 4 di tla phethahala? Jehova o fane ka mabaka a utlwahalang a hore na ke hobaneng ha re ka kgodiseha hore tshepiso ya hae e tla phethahala. Ke mabaka afe ao a faneng ka ona?

5. Ke mabaka afe ao re nang le ona a ho tshepa hore tshepiso ya Modimo ka Paradeise e tla phethahala, hona re a fumana hokae?

⁵ Re fumana mabaka a ho tshepa tshepiso eo Jehova a e entseng ya hore lefatshe e tla ba Paradeise ditemaneng tse latelang. Di re: “Ya dutseng teroneng a re: ‘Bona, ke etsa hore dintho tsohle di be ntjha.’ Hape a re: ‘Ngola mantswe ana hobane a a tshepahala mme ke a nnete.’ A boela a re ho nna: ‘Mantswe ana a se a phethahetse. Ke nna Alfa le Omega, qalo le qetello.’”—Tshen. 21:​5, 6a.

6. Ke hobaneng ha mantswe a ho Tshenolo 21:​5, 6 a etsa hore re kgodisehe hore tshepiso ya Modimo e tla phethahala?

⁶ Ke hobaneng ha ditemana tsee tsa Bibele di etsa hore re kgodisehe le ho feta hore Modimo o tla phethahatsa tshepiso ya hae? Buka ya Tlhōrō ea Tšenolo e re ka ditemana tsena: “Ho jwalo ka ha eka Jehova ka boyena o saenela batho ba tshepahalang tiiso, kapa lengolo la bopaki, mabapi le ditlhohonolofatso tsena tsa ka moso.” b Tshepiso ya Modimo e tlalehilwe lengolong la Tshenolo 21:​3, 4. Empa temaneng ya bohlano le ya botshelela ho jwalo ka ha eka Jehova o saenne ho re kgodisa hore dintho tseo a re tshepisitseng tsona di tla etsahala. A re hlahlobeng mantswe ao Jehova a a sebedisitseng ho re kgodisa.

7. Ke mang ya etsang tshepiso e temaneng ya bohlano, hona ke hobaneng ha taba ee e le ya bohlokwa?

⁷ Kgodiseho eo Modimo a re fang yona e qala ka mantswe ana: “Ya dutseng teroneng a re.” (Tshen. 21:5a) Mantswe ana ke a bohlokwa haholo hobane ke a mang a mantswe ao Jehova a ileng a a bua ha a ne a bua diponong ka makgetlo a mararo bukeng ya Tshenolo.  Ha se lengeloi kapa Jesu ya faneng ka kgodiseho ena empa ke Jehova. Taba ena ke bopaki ba hore re ka tshepa mantswe ao a a buileng ka mora moo. Hobaneng? Hobane Jehova a ‘ke ke a bua leshano.’ (Tite 1:2) Ka hoo, mantswe ao re a balang ho Tshenolo 21:​5, 6 a tla fela a phethahale.

8. Jehova o reng ho bontsha hore tshepiso ya hae e tla fela e phethahale? (Esaia 46:10)

⁸ A re bueng ka lentswe “bona.” (Tshen. 21:5) Lentswe la Segerike le fetoletsweng e le “bona” le sebedisitswe ka makgetlo a mangata bukeng ya Tshenolo. Buka e nngwe ya dipatlisiso e re lentswe lena le sebedisitswe e le “tsela ya ho bolella motho ya balang hore a hlokomele hore na mantswe a latelang a reng.” Modimo o ile a reng ka mora moo? O ile a re: “Ke etsa hore dintho tsohle di be ntjha.” Temaneng ena Jehova o bua ka dintho tseo a tlo di etsa nakong e tlang empa ka ha o a tseba hore o tlo phethahatsa tshepiso ya hae, o bua jwalo ka ha eka o se a ntse a etsa diphetoho tsena.—Bala Esaia 46:10.

9. (a) Mantswe a reng “ke etsa hore dintho tsohle di be ntjha” a bua ka dintho dife tse pedi tseo Jehova a tla di etsa? (b) Ho tla etsahalang ka “lehodimo” le “lefatshe” tse teng hona jwale?

⁹ A re bueng ka polelo e hlahang lengolong la Tshenolo 21:5 e reng: “Ke etsa hore dintho tsohle di be ntjha.” Kgaolong ena polelo eo e bua ka dintho tse pedi tseo Jehova a di etsang. Ya pele ke hore Jehova o tlo fedisa lefatshe lena mme a tlise lefatshe le letjha. Lengolo la Tshenolo 21:1 le re: “Lehodimo la pele le lefatshe la pele di ne di se di fetile.” “Lehodimo la pele” ke mebuso ya dipolotiki e susumetswang ke Satane le bademona ba hae. (Mat. 4:​8, 9; 1 Joh. 5:19) Ka Bibeleng lentswe “lefatshe” le ka bolela batho ba dulang lefatsheng. (Gen. 11:1; Pes. 96:1) Ka hoo, “lefatshe la pele” ke batho ba kgopo ba phelang mehleng ena. Jehova a ke ke a lokisa “lehodimo” le “lefatshe” tse teng hona jwale feela empa o tla di fedisa ka ho feletseng. O tla fedisa lehodimo le lefatshe tsa hona jwale mme a etse hore ho be le “lehodimo le letjha le lefatshe le letjha” e leng mmuso o motjha o tla busa batho ba lokileng.

10. Ke dintho dife tseo Jehova a tlo etsa hore di be ntjha?

¹⁰ Lengolong la Tshenolo 21:5 re bala ka seo Jehova a ileng a se bua ka ho etsa hore dintho di be ntjha. Hlokomela hore na Jehova o ile a reng. O ile a re: “Ke etsa hore dintho tsohle di be ntjha.” Ha a ka a re: “Ke etsa dintho tsohle tse ntjha.” Jehova o tla lokisa lefatshe a be a etse hore batho ba phethahale. Jwalo ka ha Esaia a ile a bua nakong e fetileng, lefatshe lohle e tla ba serapa se setle sa Edene. Hape o tla etsa hore batho ba fole ka ho feletseng. Batho ba holofetseng, ba foufetseng le ba sa utlweng ditsebeng ba tla fola mme le bafu ba tla tsoswa.—Esa. 25:8; 35:​1-7.

11. Jehova o ile a re Johanne a etseng, hona hobaneng?

¹¹ Modimo o ile a reng hape e le ho re kgodisa hore re ka mo tshepa? Jehova o ile a re ho Johanne: “Ngola mantswe ana hobane a a tshepahala mme ke a nnete.” (Tshen. 21:5) Jehova ha a ka a re Johanne a ngole feela empa o ile a fana le ka lebaka la hore a ngole mantswe ao. O ile a re: “Mantswe ana a a tshepahala mme ke a nnete.” Re ananela hore ebe Johanne o ile a mamela taelo eo ya hore a ‘ngole’ hobane re kgona ho bala ka tshepiso eo Modimo a e entseng ya hore ho tla ba le Paradeise ebile re kgona ho nahanisisa ka ditlhohonolofatso tseo re tla di fumana.

12. Ke hobaneng ha Jehova a ka re: “Mantswe ana a se a phethahetse”?

 ¹² Modimo o reng ka mora moo? O re: “Mantswe ana a se a phethahetse.” (Tshen. 21:6) Jehova o bua mantswe ana jwalo ka ha eka tshepiso eo a e entseng ya hore ho tla ba le Paradeise e se e phethahetse. O na le tokelo ya ho bua mantswe ana hobane ha ho na letho le ka mo thibelang hore a phethahatse morero wa hae. Jehova o re fa lebaka le leng le matla la ho dumela hore tshepiso ya hae e tla phethahala. Lebaka leo ke lefe?

13. Ke hobaneng ha Jehova a ile a re: “Ke nna Alfa le Omega”?

¹³ Dirapeng tse fetileng re ithutile hore Jehova o buile le Johanne ka makgetlo a mararo ponong. (Tshen. 1:8; 21:​5, 6; 22:13) Makgetlong ao a mararo Jehova o ile a bua mantswe ana a reng: “Ke nna Alfa le Omega.” Ka Segerike tlhaku ya pele ke alfa, ya ho qetela ke omega. Ha Jehova a re “ke nna Alfa le Omega” o bontsha hore ntho e nngwe le e nngwe eo a e qalang o a e qeta.

14. (a) Fana ka mohlala o bontshang hore ke neng Jehova a ileng a re “Alfa” le hore ke neng a tla re “Omega.” (b) Lengolo la Genese 2:​1-3 le etsa hore re kgodisehe kang?

¹⁴ Ka mora hore Jehova a bope Adama le Eva, o ile a ba bolella morero oo a nang le ona ka batho le lefatshe. Bibele e re: “Modimo a ba hlohonolofatsa a re ho bona: ‘Atang le ngatafale le tlale lefatshe mme le le buse.’” (Gen. 1:28) Ha Jehova a ne a ba bolella morero wa hae, ho ne ho tshwana le ha eka o ne a re “Alfa.” Ha morero wa Jehova o se o phethahetse mme bana ba Adama le Eva ba tletse lefatshe le ho le etsa paradeise, ho tla tshwana le ha eka Jehova o re “Omega.” Ha Jehova a qeta ho bopa “mahodimo le lefatshe le dintho tsohle tse ho tsona,” o ile a bua ntho e nngwe  lengolong la Genese 2:​1-3 (E bale.) e neng e tla re kgodisa hore morero wa hae o tla phethahala. Jehova o ile a etsa hore letsatsi la bosupa e be le halalelang ho yena. Taba ee e bolelang? E bolela hore Jehova o re kgodisa hore o tla phethahatsa morero wa hae ka lefatshe le ka batho mme morero oo wa hae o tla phethahala qetellong ya letsatsi la bosupa.

15. Ke hobaneng ha Satane a ne a ka nahana hore o entse hore morero wa Modimo o se ke wa atleha?

¹⁵ Ka mora hore Adama le Eva ba fetohele Jehova, ba ile ba eba le sebe mme ba fetisetsa sebe le lefu ho bana ba bona. (Bar. 5:12) Ka lebaka leo, ho ne ho ka bonahala eka Satane o sentse morero wa Modimo wa hore batho ba phethahetseng le ba mamelang Modimo ba tlale lefatshe. Na Satane o ile a etsa hore Jehova a se ke a phethahatsa morero wa hae? E ka nna yaba Satane o ne a nahana hore Jehova a ke ke a phethahatsa morero wa hae. Mohlomong o ne a nahanne hore Modimo o tla fedisa Adama le Eva ebe o bopa batho ba bang ba phethahetseng e le hore a ka phethahatsa morero wa hae ka batho. Empa haeba Modimo a ne a ile a etsa jwalo, Diabolose a ka be a itse Modimo o leshano. Hobaneng? Hobane jwalo ka ha Genese 1:28 e bontsha, Jehova o ile a bolella Adama le Eva hore bana ba bona ba ne ba tla tlala lefatshe.

16. Ke hobaneng ha Satane a ne a nahana hore a ka qosa Jehova ka hore o hlolehile ho phethahatsa morero wa hae?

¹⁶ Ke eng eo e ka nnang yaba Satane o ne a nahana hore Modimo o tla e etsa? Mohlomong Satane o ne a nahana hore Jehova o ne a tla dumella Adama le Eva hore ba be le bana mme bana bao ba ne ba ke ke ba phethahala le ka mohla. (Moek. 7:20; Bar. 3:23) Haeba seo se ne se ka etsahala, Diabolose o ne a tla qosa Jehova ka hore o hlolehile ho phethahatsa morero wa hae. Hobaneng? Hobane morero wa Modimo o ne o ke ke wa phethahala wa hore lefatshe le tlale ka bana ba Adama le Eva ba phethahetseng le ba mamelang Modimo.

17. Jehova o ile a etsang ka mora hore Satane le batho ba pele ba mo fetohele mme qetellong ho tla etsahalang? (Sheba setshwantsho.)

¹⁷ Le hoja Satane, Adama le Eva ba ile ba fetohela Modimo, Jehova o ne a ntse a ena le tsela eo Satane a neng a sa e lebella eo a neng a ka phethahatsa morero wa hae ka yona. (Pes. 92:5) Jehova o ile a dumella hore Adama le Eva ba be le bana e leng ntho e neng e bontsha hore ha a leshano. Jehova o ile a bontsha hore ha a hloleha ho phethahatsa morero  wa hae. O ile a phethahatsa morero wa hae ka hore a etse hore ho be le “ngwana” ya neng a tla pholosa ditloholo tsa Adama le Eva. (Gen. 3:15; 22:18) Satane o ne a sa lebella hore Jehova o tla etsa hore bana ba Adama ba lopollwe. Hobaneng? Hobane ketso ena e bontsha hore Jehova o lerato empa Satane yena ha a na lerato. (Mat. 20:28; Joh. 3:16) Ke eng e neng e tla etsahala ka lebaka la tokisetso ena? Qetellong ya puso ya Kreste ya dilemo tse sekete, bana ba phethahetseng le ba mamelang Modimo ba Adama le Eva ba tla dula lefatsheng la Paradeise jwalo ka ha Jehova a ne a rerile qalong. Ka nako eo, ho tla tshwana le ha Jehova a re “Omega.”

18. Ke mabaka afe a mararo ao Modimo a re fileng ona a re kgodisang hore o tla phethahatsa tshepiso ya hae? (Sheba lebokose le reng “ Mabaka a Mararo a Etsang Hore re Tshepe Tshepiso ya Jehova.”)

¹⁸ Ho latela seo re seng re ithutile sona, ke dintho dife tseo re ka di bolellang batho ba bang tse re kgodisang hore tshepiso ya Modimo ya hore ho tla ba le Paradeise e tla phethahala? Ntho ya pele, Jehova ke yena ya etsang tshepiso eo. Buka ya Tshenolo e re: “Ya dutseng teroneng a re: ‘Bona, ke etsa hore dintho tsohle di be ntjha.’” Jehova o bohlale, o matla ebile o batla hore tshepiso ya hae e phethahale. Ya bobedi, ho latela tsela eo Jehova a shebang dintho ka yona, tshepiso ya hae e se e phethahetse. Ke ka hoo a reng: “Mantswe ana . . . a a tshepahala mme ke a nnete. . . . Mantswe ana a se a phethahetse.” Ya boraro, ha Jehova a qala ho etsa ntho e itseng, o etsa bonnete ba hore o a e qeta mme sena se tiiswa ke mantswe a reng: “Ke nna Alfa le Omega.” Jehova o tla bontsha hore Satane o leshano le hore o hlolehile ho etsa hore morero wa Jehova o se ke wa phethahala.

19. O ka etsang ha batho ba belaela tshepiso ya Modimo ya hore ho tla ba le Paradeise?

¹⁹ Hopola hore ha o bolella batho hore Jehova o tla phethahatsa ditshepiso tsa hae, seo se etsa hore o be le kgodiseho ya hore ditshepiso tsohle tsa hae di tla phethahala. O ka etsang nakong e tlang ha o balla motho tshepiso ya hore ho tla ba jwang Paradeiseng, eo ho buuwang ka yona ho Tshenolo 21:4 mme motho eo a re: “Ke a di utlwa ditaba tsena empa ha ke bone eka ke ntho e ka etsahalang”? O ka mo balla le ho mo hlalosetsa temana ya bohlano le ya botshelela. Mo bontshe ka moo Jehova a re kgodisitseng ka teng hore tshepiso ya hae e tla phethahala jwalo ka ha eka o saenne.—Esa. 65:16.