“Ha ke nyahame, Jehova o nkgothatsa ka dipina tsa JW Broadcasting^®.”—Lorraine, U.S.A.

Haesale Bakreste ba bina dipina ho rorisa Jehova. (Bakol. 3:16) Haeba o ithuta ho tshwara dipina tsa rona ka hlooho, di ka o thusa esita le ha o se na buka ya dipina kapa sesebediswa sa elektronike. Leka mekgwa ena e tla o thusa hore o hopole dipina tsa rona.

• Bala mantswe a dipina ka hloko e le hore o utlwisise moelelo wa tsona. O ka hopola dintlha tse itseng ha bonolo haeba o di utlwisisa. O ka fumana mantswe a dipina tsa rona kaofela, ho akareletsa le dipina tsa broadcasting le tsa bana ho jw.org/st-za karolong ya Laebrari ebe o ya ho Mmino.

• Ngola mantswe a dipina fatshe. Ho etsa jwalo ho ka nna ha o thusa hore o hopole dipina tsa rona haholwanyane.—Deut. 17:18.

• Binela hodimo. Bala kapa o bine pina e itseng ka makgetlo a mangata.

• Leka ho hopola. Leka ho hopola mantswe a pina ntle le hore o a shebe e le hore o bone hore na o a hopola hakae.